পুহ আৰু মাঘৰ সংক্ৰান্তিৰ দিনা অসমীয়াই পালন কৰা বিহুক ভোগালী বিহু বা মাঘ বিহু বুলি কোৱা হয় । কৃষিজীৱি ৰাইজে বছৰজুৰি কৰা পৰিশ্ৰমৰ অৱসাদ দূৰ কৰিবলৈকে পালন কৰে এই উৎসৱ ৷ উৰুকা নিশা হাঁহে-মাহে এসাঁজ খোৱাৰ প্ৰস্তুতিৰে ব্যস্ত হৈ পৰিছে অসমবাসী ।(Bhogali Bihu) মাঘ বিহুৰ সময়ত খোৱা কিছুমান সুস্বাদু পৰম্পৰাগত খাদ্যৰ বিষয়ে জানো আহক-
তিল পিঠা – বৰা চাউলৰ পিঠাগুৰিৰ মাজত তিল আৰু গুৰৰ মিশ্ৰণ সুমুৱাই শুকানকৈ খোলাত ভজা পিঠা।
নাৰিকল পিঠা – তিল পিঠাৰ দৰেই ইয়াক ভজা হয়। মাথোঁ তিল আৰু গুৰৰ জেগাত নাৰিকল ৰুকি চেনিৰ লগত অলপ ভাজি পিঠাগুৰি খিনিৰ মাজত দিয়া হয়।
ঘিলা পিঠা – এই পিঠা বনাবলৈ পিঠাগুৰিখিনিত গুৰ সানি কিছু সময় থৈ দি হাতৰ তলুৱাত লৈ গোলাকৃতিৰ কৰি মিঠাতেলত ভাজিব লাগে। ইয়াক নিমখদিও ভাজিব পাৰি। এই পিঠা অতি জনপ্ৰিয়।
খোলা চপৰীয়া পিঠা – ফেনী পিঠাৰ দৰেই এই পিঠা ভজা হয় মাথোঁ গুৰৰ ঠাইত নিমখ আৰু অকণমান তেল লাগে। ইয়াকো কম জুইত ঢাকোন মাৰি ভাজিব লাগে। কিছুমানে অৱশ্যে গুৰ দিও ভাজে।
টেকেলি পিঠা- এই পিঠা পিঠাগুৰি, ৰোকা নাৰিকল আৰু চেনিৰ মিশ্ৰণ কৰি টেকেলি মুখত ভাপত ভজা হয়। ইয়াত তেল ব্যৱহাৰ নহয় যদিও খাবলৈ সোৱাদ হয়।
চুঙা পিঠা- কেঁচা পিঠাগুৰি আৰু গুৰ মিহলাই কোমাল বাঁহৰ চুঙাত পুৰি ভজা হয়।
সুতুলি পিঠা- এই পিঠা ঘিলা পিঠাৰ দৰেই ভজা হয় যদিও তাত তিল ভাজি গুৰৰ লগত মিশ্ৰণ কৰি লাডুটোৰ ভিতৰত সুমুৱাই তেলত ভজা হয়। ইয়াক সুতুলিৰ আকৃতিত বনোৱা হয় বাবে সুতুলি পিঠা বুলি কয়। ইয়াক গৰমে গৰমে খাবলৈ বৰ ভাল।
আনহাতে মাঘ বিহুৰ খাদ্যৰ কথা ক’বলৈ গ’লে মাঘ বিহুৰ সময়ত খোৱা অন্যতম ব্যঞ্জন হৈছে মাছ ৷ মাছৰ টেঙা, মাছৰ জোল আদি নানান ধৰণেৰে মাছ খোৱা হয়।
খাৰ এবিধ নিৰামিষ খাদ্য । খাৰ হ’ল কলৰ বাকলি অথবা মূঢ়া শুকুৱাই পুৰি সেই ছাইত পানী দি থৈ পিচত তাৰ পৰা নিগৰি ওলোৱা ৰস । ভীমকল গছৰ পটুৱা ছিৰলা-ছিৰিলিকৈ ফালি ৰ’দত শুকুৱাই, জুইত পুৰি, তাৰ ছাইৰ পৰা কলাখাৰ তৈয়াৰ কৰা হয় । কেতিয়াবা কলৰ গছ অংশও ৰ’দত শুকুৱাই পুৰি কলাখাৰ তৈয়াৰ কৰা হয় । যাৰ ফলত খাদ্যৰ সোৱাদ বেলেগ আৰু বিশেষ হৈ পৰে । ভাতৰ লগত খোৱা হয় খাৰ ।
এতিয়া যিহেতু শাক-পাচলিৰ খেতিৰ সময়। গতিকে ঘৰৰ শাক-পাচলি, মাছ-মাংস, গাখীৰ-দৈ, চিৰাৰ পুষ্টিমূল্যৰ কথা আমি সকলোৱে জানো। উৰুকাৰ নিশা খোৱা হাঁহ-কোমোৰা, মাছ-মাংস, মাটিমাহ-কাঠ আলুৰ দাইল, অমিতা খাৰত সুস্বাস্থ্যৰ বাবে প্ৰয়োজনীয় প্ৰায়বোৰ উপাদানেই থাকে। ভোগালীৰ খাদ্যত প্ৰচুৰ পৰিমাণে ভিটামিন, কেলছিয়াম, মেগনেছিয়াম, জিংকৰ দৰে বহু খনিজ পদাৰ্থ পোৱা যায়। গতিকে ভোগালীত লগে-ভাগে এসাঁজ উপভোগ কৰক।