ৰাজ্যৰ আন ৭৯ খন পৌৰসভাৰ লগতে ভোট গণনা সম্পন্ন হোৱা ঢকুৱাখনা পৌৰসভাৰ ১০ টা ৱাৰ্ডৰ ৯ টাতে শাসকীয় বিজেপি দলৰ প্ৰাৰ্থীয়ে জয়লাভ কৰি বিৰোধী শূণ্য কৰিবলৈ সক্ষম হয় । পৌৰসভা খনৰ ১ নং ৱাৰ্ডত বিজেপি টিকট প্ৰত্যাশী বগেন কোঁৱৰে নিৰ্দলীয় প্ৰাৰ্থী হিচাপে নিৰ্বাচনত অৱতীৰ্ণ হৈ কংগ্ৰেছৰ প্ৰাৰ্থী সুৰজিৎ কোঁৱৰ আৰু বিজেপি – অগপ মিত্ৰজোঁটৰ প্ৰাৰ্থী মনোজ গগৈক পৰাজিত কৰে। ফলাফল ঘোষণাৰ পিছতেই বগেন কোঁৱৰে বিজেপি দলৰ প্ৰতীক সম্বলিত গামোচা লৈ দলটোত যোগদান কৰাত কাৰ্যত ১০ টা ৱাৰ্ডেই গেৰুৱা দলটোৰ দখললৈ যায় । ঢকুৱাখনা পৌৰসভাৰ বিজয়ী প্ৰাৰ্থী সকল হ’ল ক্ৰমে ১ নং ৱাৰ্ডত বগেন কোঁৱৰ ,২ নং ৱাৰ্ডত গুণলতা লাগাচু কুটুম,৩ নং ৱাৰ্ডত সংগীতা বৰুৱা, ৪ নং ৱাৰ্ডত মাণিক বৰুৱা ,৫ নং ৱাৰ্ডত তিলেন দাস,৬ নং ৱাৰ্ডত স্বৰূপ কোঁৱৰ ,৭ নং ৱাৰ্ডত চন্দ্ৰমা গগৈ,৮ নং ৱাৰ্ডত দিপালী দাস,৯ নং ৱাৰ্ডত অপৰূপা দিহিঙীয়া দত্ত আৰু ১০ ৱাৰ্ডত ৰাজীৱ দাসে জয়লাভ কৰে । নিৰ্বাচনী ফলাফল ঘোষণাৰ পিছতেই ঢকুৱাখনা নগৰত আবতৰীয়া দেৱালী আৰু ফাগুৱাৰ সৃষ্টি হয়। ইফালে ১ নং ৱাৰ্ডত বিজেপি -অগপ মিত্ৰজোঁটৰ প্ৰাৰ্থী মনোজ গগৈ পৰাজিত হোৱাত অগপৰ ঢকুৱাখনা বিধান মণ্ডলৰ নেতৃবৃন্দই চৰম অপমান বোধ কৰিছে ।
বিজেপি দলে মিত্ৰতাৰ নামত ১ নং ৱাৰ্ডটো অগপ দলক দিছিল যদিও সকলো প্ৰকাৰে বিজেপি দলৰ শক্তিশালী টিকট দাবীদাৰ নিৰ্দলীয় প্ৰাৰ্থী বগেন কোঁৱৰক সকলো প্ৰকাৰে সহায় -সহযোগ কৰিছিল । বিগত পঞ্চায়ত নিৰ্বাচনতে অস্বিত্বহীন হৈ পৰা অগপৰ সাংগঠনিক দিশতো এইবাৰ একেবাৰে নিচিহ্ন হৈ পৰিল বুলি ৰাইজে মন্তব্য কৰিছে ।বিগত বিধান সভা নিৰ্বাচনত অগপ দলৰ সৰহ সংখ্যক নেতা -পালি নেতাই কংগ্ৰেছৰ প্ৰাৰ্থী পদ্মলোচন দলেক সহায় কৰি নৱ দলেক চিপৰাং মৰাৰ ফল দলটোৱে ভোগ কৰিলে বুলি ৰাইজেপ্ৰকাশ কৰিছে । নৱ নিৰ্বাচিত সমিতিখনৰ সভাপতিৰ পদত ৬ নং ৱাৰ্ডৰ বিজয়ী প্ৰাৰ্থী স্বৰূপ কোঁৱৰ অধিষ্ঠিত হোৱাতো এক প্ৰকাৰ নিশ্চিত বুলি দলীয় সূত্ৰত প্ৰকাশ ।