নগাঁও, ১৭ ডিচেম্বৰঃ নগাঁৱৰ মহাপুৰুষ শ্ৰীমন্ত শংকৰদেৱ বিশ্ববিদ্যালয়ত আজি আয়োজিত এক অনুষ্ঠানত বিশ্ববিদ্যালয়খনৰ অধ্যাপিকা ড° কৰবী কোঁছৰ ‘হৃদয়ৰ নীলা পাহি'(Blue Flower of Heart) নামৰ উপন্যাসখন উন্মোচন কৰা হয়।
উপন্যাসখন উন্মোচন কৰে বিশ্ববিদ্যালয়খনৰ উপাচাৰ্য ড° মৃদুল হাজৰিকাই। উন্মোচনী ভাষণত উপাচাৰ্য গৰাকীয়ে কয়, একোখন উপন্যাস যদিও ফিকচন তাৰ মাজতে সত্যতা লুকাই থাকে।
মানুহৰ জীৱনক লৈয়ে উপন্যাস হয়।(Hridayor Neela Pahi) জীৱন যাত্ৰাত বহু সমস্যা থাকে, আৱেগ থাকে।(Sankardev University) জীৱনত বহু প্ৰত্যাহ্বানৰ প্ৰতিফলন থাকে। সেই প্ৰতিফলনখিনিক একেলগ কৰি বাস্তৱায়িতাৰ লগত লগলগাই উপন্যাস একোখন সৃষ্টি হয়। লেখকৰ নিজস্ব শৈলীৰ মাজেদি এক নতুন সৃষ্টি হয়।
অনুষ্ঠানত বিশিষ্ট সাংবাদিক-শিক্ষাবিদ ড° হিতেশ ডেকাই ভাষণ দি কয়- জীৱনৰ প্ৰথমখন কিতাপ নিজৰ প্ৰথম সন্তানৰ দৰে। মানুহৰ জীৱনত বিভিন্ন ৰং থাকে। ৰংবোৰ মাজে মাজে সলনি হৈ থাকে। জীৱনত প্ৰেমৰ আৱেগ থাকে, বিচ্ছেদৰ বিৰল বেদনা থাকে। কৰবী কোঁচৰ উপন্যাসখনত লেখিকাৰ আৱেগ-আন্তৰিকতা প্ৰথমৰ পৰা শেষলৈকে আছে।
সাহিত্যৰ বিভিন্ন পথাৰ থাকে। প্ৰৱন্ধ আছে, কবিতা আছে, গল্প আছে। আজিকালি চুপাৰ স্পেচিয়েলিষ্টৰ যুগ। সকলো পুখুৰীতে বৰশী বালে মাছ পোৱা নাযায়। গতিকে লেখিকা গৰাকীয়ে সাহিত্যক্ষেত্ৰত কেৱল উপন্যাসত মনোনিৱেশ কৰিব লাগে। ক্ৰান্তিকাল প্ৰকাশনে প্ৰকাশ কৰি উলিওৱা ২৯৪ পৃষ্ঠাৰ উপন্যাস ‘হৃদয়ৰ নীলা পাহি’ৰ লেখিকা ড° কৰবী কোঁছে কয়, মই যে এখন উপন্যাস লিখিম সেয়া মোৰ বাবে এক সপোন আছিল।
বয়স বঢ়াৰ লগে লগে মানুহৰ চিন্তা ধাৰণা পৰিপক্ব হৈ গৈ থাকে। লক ডাউনত ঘৰতে বন্দী হৈ থকা সময়ত কিছুমান চৰিত্ৰ মনলৈ আহিছিল। উপন্যাস বুলি আৰম্ভ কৰা নাছিলো, মানুহৰ জীৱনৰ ৰংবোৰ একেলগ কৰিব বিচাৰিছিলো।
অনুষ্ঠানটোত ক্ৰান্তিকাল প্ৰকাশনৰ স্বত্বাধিকাৰ কৈলাস ৰাজখোৱা, লেখক-সাংবাদিক শৈলেন শইকীয়া, লেখক-প্ৰকাশক প্ৰাঞ্জল কুমাৰ মহন্ত অতিথি হিচাপে উপস্হিত থাকে। অনুষ্ঠানটোৰ আঁত ধৰে অধ্যাপক পাৰ্থপ্ৰতিম ফুকন আৰু সামৰণি ভাষণ দিয়ে অধ্যাপিকা ড° ত্ৰিবেণী বৰাই। অনুষ্ঠানত বিশ্ববিদ্যালয়খনৰ অধ্যাপক- অধ্যাপিকা, ছাত্ৰ-ছাত্ৰী উপস্হিত থাকে।