বঙাইগাঁওঃ ১৯ নবেম্বৰঃ কুষ্ঠৰোগ মুক্ত সমাজ গঢ়াৰ উদ্দেশ্যেৰে কাইলৈৰ পৰা বঙাইগাঁও জিলাতো ৰাষ্ট্ৰীয় কুষ্ঠৰোগ নিৰ্মূলকৰণ আঁচনিৰ অধীনত ‘কুষ্ঠৰোগ চিনাক্তকৰণ অভিযান -২০২৪’ আৰম্ভ হ’ব ( Bongaigaon)। বঙাইগাঁও জিলাত কুষ্ঠৰোগ চিনাক্তকৰণ অভিযান -২০২৪৷ এই অভিযান সন্দৰ্ভত মঙলবাৰে জিলা স্বাস্থ্য বিভাগৰ যুটীয়া স্বাস্থ্যসেৱা সঞ্চালকৰ কাৰ্যালয়ত স্বাস্থ্য বিভাগৰ তৰফৰ পৰা এখন সংবাদ মেলৰ আয়োজন কৰে ৷ সংবাদ মেলত জিলা যক্ষ্মা বিষয়া তথা এই অভিযানৰ দায়িত্বত থকা জিলা ন’ডেল বিষয়া ডাঃ প্ৰণৱ কুমাৰ ৰয়ে কয় যে কাইলৈৰ পৰা অৰ্থাৎ ২০ নবেম্বৰৰ পৰা ৩ ডিচেম্বৰলৈ বঙাইগাঁও জিলাত ‘কুষ্ঠৰোগ চিনাক্তকৰণ অভিযান ‘ চলিব ৷
এই সময়চোৱাত প্ৰশিক্ষণপ্ৰাপ্ত স্বাস্থ্যকৰ্মী ঘৰে ঘৰে গৈ প্ৰতিটো পৰিয়ালৰ দুবছৰৰ ওপৰৰ সকলো সদস্যক তেওঁলোকে কুষ্ঠৰোগৰ লক্ষণ যেনে ছালৰ বগা দাগ,ৰঙচুৱা দাগ বা তামবৰণীয়া চেতনাহীন দাগ, চেতনাহীন হাতৰ তলুৱা, ভৰিৰ তলুৱাত ,চকুৰ পতা ভালকৈ বন্ধ কৰিব নোৱাৰা আদি কথাবোৰ সুধিব আৰু পৰীক্ষা কৰিব ৷ যদি এই অভিযানৰ সময়ত তেনে কোনো ব্যক্তিৰ গাত সেই লক্ষণসমূহ থকাটো চিনাক্ত হয় তেতিয়াহলে তেনে ব্যক্তিক নিকটৱৰ্তী স্বাস্থ্য কেন্দ্ৰ অথবা চিকিৎসালয়লৈ পঠিয়াব ৷ চিকিৎসালয়ত পৰীক্ষাৰ অন্তত যদি ৰোগবিধ হোৱাটো ধৰা পৰে তেতিয়াহলে লগে লগে চিকিৎসা প্ৰদানৰ ব্যৱস্থা কৰিব ৷
ডাঃ ৰয়ে এই অভিযানত এগৰাকী আশাকৰ্মীৰ লগত এজন পুৰুষ স্বাস্থ্যকৰ্মীসহ দুজনীয়া একোটাকৈ দলে আশাকৰ্মীসকলৰ নিজ নিজ অঞ্চলৰ প্ৰতি ঘৰে ঘৰে যাব বুলিও কৈ কয় যে এই অভিযানৰ মূল উদ্দেশ্য হৈছে যদিহে সমাজৰ কোনোবা ব্যক্তি ৰোগবিধ চিনাক্ত নোহোৱাৰ ফলত তেনে ৰোগত ভুগি আছে তেতিয়াহলে তেওঁক চিনাক্ত কৰি উচিত চিকিৎসা প্ৰদানৰ জৰিয়তে সম্পূৰ্ণকৈ সুস্থ কৰি তোলাৰ লগতে যাতে তেওঁক আগলৈ গৈ বিকলাংগ হোৱাৰ পৰা ৰক্ষা কৰিব পৰা যায় ৷ লগতে এই অভিযানৰ পিছত যাতে সমাজত এজনো এনে ৰোগী নাথাকে তাৰ বাবে গুৰুত্বাৰোপ কৰা হৈছে আৰু এখন কুষ্ঠৰোগ মুক্ত সমাজ গঢ়াৰ চেষ্টা কৰা হৈছে বুলি কয় ৷ ডাঃ ৰয়ে আৰু কয় যে কুষ্ঠৰোগ হ’ল বীজাণুৰ দ্বাৰা সংক্ৰমিত বেমাৰ ৷ ই কোনো পাপৰ ফলত বা পূৰ্বজন্মৰ অভিশাপৰ ফলত হোৱা বেমাৰ নহয় ৷ এই বেমাৰটো বীজাণুৰ দ্বাৰা সংক্ৰমিত হয় আৰু কম সংক্ৰমিত ৷ কুষ্ঠৰোগ মূলত শ্বাস – প্ৰশ্বাসৰ জৰিয়তে বিয়পি যায় ৷ কুষ্ঠৰোগ জন্মগত বা বংশগত নহয় ৷ এই ৰোগে প্ৰধানকৈ ছাল আৰু স্নায়ুক আক্ৰমণ কৰে ৷
ৰোগবিধ ধৰা পৰাৰ পিছত চিকিৎসা আৰম্ভ কৰাৰ পিছত আনৰ সৈতে একেলগে বহিব পাৰে, সমাজত একেলগে বিয়া – বাৰু খাব পাৰে আৰু বিবাহ কৰিবও পাৰে ৷ তেওঁ বৰ্তমান বঙাইগাঁও জিলাত সাতগৰাকী ৰোগী থকা বুলি কৈ তেওঁলোকৰ চিকিৎসা চলি থকা বুলিও জানিব দিয়ে ৷ ইপিনে সংবাদ মেলত জিলা স্বাস্থ্য বিভাগৰ যুটীয়া স্বাস্থ্য সেৱা সঞ্চালক ডাঃ বলেন্দ্ৰ নাৰায়ণ ডেকাই কয় যে এই অভিযানৰ মূল উদ্দেশ্য হৈছে যাতে আমাৰ সমাজত কাৰোবাৰ যদি কুষ্ঠৰোগ চিনাক্ত নোহোৱাকৈ আছে তাক চিনাক্ত কৰিব পৰা যায় ৷ অভিযানৰ সময়ত আশাকৰ্মীসকলে লগত এজন পুৰুষ স্বাস্থ্যকৰ্মীক লৈ ঘৰে ঘৰে যাব আৰু কুষ্ঠৰোগৰ যিকেইটা লক্ষণ যেনে চেতনাহীন ছালৰ দাগ দেখা যায় ৷ কিছুমান অলপ বগা দাগ, ৰঙচুৱা দাগ বা তামবৰণীয়া দাগ, হাত -ভৰিবিলাক জিন – জিনাই থকা লক্ষণ থাকিলে সেয়া কুষ্ঠৰোগ হ’ব পাৰে বুলি ধাৰণা কৰা হয় ৷ গতিকে অভিযানৰ সময়ত যদি তেনে লক্ষণ থকা ব্যক্তি চিনাক্ত কৰা হয় তেতিয়াহলে তেওঁলোকক আশাকৰ্মীসকলে চিকিৎসকৰ ওচৰলৈ আনিব আৰু আমি তেওঁলোকৰ সকলো বিতং তথ্য লোৱাৰ লগতে তেওঁলোকৰ সংস্পৰ্শত থকা লোকসকলৰো সকলো কথা জানি লৈ জানিব পাৰিম যে তেওঁলোকৰ কুষ্ঠৰোগ হৈছে নে নাই ৷ যদি হৈছে তেতিয়া সেইমতে চিকিৎসাৰ ব্যৱস্থা কৰা হ’ব ৷ মূলত হৈছে সজাগতা ৷ কাৰণ কুষ্ঠৰোগ কোনো লাজ কৰিবলগীয়া, ভয় কৰিবলগীয়া, ঘৃণ কৰিবলগীয়া বা কাৰোবাৰ পূৰ্বজন্মৰ পাপৰ ফলত হোৱা তথা ভগবানৰ অভিশাপৰ বাবে হোৱা বেমাৰ নহয় ৷ কুষ্ঠৰোগ হ’ল বীজাণুৰ পৰা হোৱা বেমাৰ ৷ আমাৰ বীজাণুৰ পৰা যিকোনো বেমাৰ হ’ব পাৰে ৷ সেয়ে আমি যদি প্ৰথমাৱস্থাতে ৰোগটো চিনাক্তকৰণ কৰি চিকিৎসা প্ৰদান কৰিব পাৰো তেতিয়াহলে সম্পূৰ্ণৰূপে সুস্থ হয় আৰু পিছলৈও কোনো অসুবিধা নহয় ৷ সুস্থ সৱল জীৱন যাপন কৰিব পাৰিব ৷ সেয়ে এই অভিযানৰ সময়ত সকলোকে আগবাঢ়ি আহি অভিযানৰ উদ্দেশ্যক সফল কৰি তুলি এখন কুষ্ঠৰোগ মুক্ত সমাজ গঢ়াৰ ক্ষেত্ৰত সহযোগিতা আগবঢ়াবলৈ সকলোকে আহ্বান জনায় ৷