গুৱাহাটীৰ লংকেশ্বৰ নিবাসী, কামৰূপ জিলাৰ নগৰবেৰাৰ বিমলা প্ৰসাদ চলিহা মহাবিদ্যালয়ৰ অৱসৰপ্ৰাপ্ত অধ্যাপক দীপ্তিৰেখা পাঠক মজুমদাৰৰ “মই গুণগুণৰ মাকে কৈছোঁ” শীৰ্ষক সামাজিক উপন্যাসখন ২৬ জুলাইত তেওঁৰ নিজা বাসগৃহত উন্মোচন কৰা হয়। এই উপলক্ষে দুধনৈ মহাবিদ্যালয়ৰ অৱসৰপ্ৰাপ্ত অধ্যাপক ড° হৰকুমাৰ নাথে সভাপতিত্বত অনুষ্ঠিত অনুষ্ঠানটোত গ্ৰন্থখন উন্মোচন কৰে কুমাৰ ভাস্কৰ বৰ্মা সংস্কৃত আৰু পুৰাতন অধ্যয়ন বিশ্ববিদ্যালয়ৰ প্ৰাক্তন উপাচাৰ্য অধ্যাপক ডঃ দীপক কুমাৰ শৰ্মাই। উন্মোচনি ভাষণত ডঃ শৰ্মাই উপন্যাসখনৰ বিষয়বস্তুৰ উপৰিও উপন্যাস সাহিত্যৰ গতিধাৰাৰ ওপৰত এক মনোজ্ঞ ভাষণ প্ৰদান কৰে।
লেখিকা দীপ্তিৰেখা পাঠক মজুমদাৰে গ্ৰন্থখন ৰচনাৰ আঁৰৰ কথা চমুকৈ ব্যাখ্যা কৰে। অনুষ্ঠানত গুৱাহাটী বিশ্ববিদ্যালয়ৰ অৱসৰপ্ৰাপ্ত অধ্যাপক ডঃ সোণেশ্বৰ শৰ্মা, ডঃ মোহন চন্দ্ৰ কলিতা, অসমীয়া বিভাগৰ অধ্যাপিকা ডঃ দীপামণি বৰুৱা দাস, গণেশ মজুমদাৰ আৰু প্ৰকাশক ৰতন দাসে চমু ভাষণ প্ৰদান কৰে। আনহাতে লেখিকা মণিৰূপা মিশ্ৰই আঁত ধৰা অনুষ্ঠানটোৰ উদ্দেশ্য ব্যাখ্যা কৰে ডঃ সন্ধ্যা পাঠকে। অনুষ্ঠানত গীতিকা দাসে কবিতা আবৃত্তি কৰে।