দেশত ভয়ানক ৰূপত বৃদ্ধি পাইছে পথ দুৰ্ঘটনাৰ সংখ্যা। বহুজনে প্ৰাণ হেৰুৱাইছে বহুজন ঘূণীয়া হৈছে। ২০২৪ চনতেই পথ দুৰ্ঘটনাত মৃত্যু হৈছে প্ৰায় ১ লাখ ৮০ হাজাৰ লোকৰ। তথ্য প্ৰকাশৰ পাছতেই বিষয়টোক লৈ উদ্বেগ প্ৰকাশ কৰিছে কেন্দ্ৰীয় মন্ত্ৰী নীতিন গাডকাৰীয়ে আৰু গ্ৰহণ কৰিছে এটা বিশেষ সিদ্ধান্ত। [Cashless Treatment Scheme]
পথ দুৰ্ঘটনাত পতিত হোৱা লোকৰ চিকিৎসাৰ বাবে নতুন আঁচনি ঘোষণা কেন্দ্ৰৰ। কেন্দ্ৰীয় পথ আৰু পৰিবহণ মন্ত্ৰী নীতিন গাডকাৰীয়ে পথ দুৰ্ঘটনাত আহতসকলৰ বাবে ‘নগদবিহীন চিকিৎসা’সেৱাৰ কথা ঘোষণা কৰিছে। পথ দুৰ্ঘটনাত আহতসকলৰ সাতদিনীয়া চিকিৎসাৰ বাবে ডেৰ লাখ টকা পৰ্যন্ত খৰচ চৰকাৰে বহন কৰিব বুলিও তেওঁ উল্লেখ কৰিছে। কেৱল সেয়াই নহয়, গাডকাৰীয়ে হিট এণ্ড ৰান কাণ্ডত মৃতকৰ পৰিয়ালক ক্ষতিপূৰণ দিয়াৰ কথাও ঘোষণা কৰে। কেন্দ্ৰীয় মন্ত্ৰীগৰাকীয়ে কয় যে যদিহে ২৪ ঘন্টাৰ ভিতৰত আৰক্ষীক এই পথ দুৰ্ঘটনাৰ বিষয়ে অৱগত কৰা হয় তেন্তে আহতসকলৰ চিকিৎসাৰ খৰচ চৰকাৰে বহন কৰিব। লগতে পথ সুৰক্ষা নিশ্চিত কৰিবলৈও কেন্দ্ৰীয় মন্ত্ৰীগৰাকীয়ে আৰক্ষী প্ৰশাসনক আহ্বান জনাইছে। গাডকাৰীয়ে লগতে কয় যে যোৱা এবছৰত কেৱল হেলমেট পৰিধান নকৰাৰ বাবেই ৩০ হাজাৰ লোকৰ মৃত্যু হৈছে। তদুপৰি এই দুৰ্ঘটনা সমূহৰ বেছিভাগেই ১৮ৰ পৰা ৩৪ বছৰ বয়সৰ ভিতৰত সংঘটিত হৈছিল।
বিশেষকৈ বিদ্যালয়-মহাবিদ্যালয়ৰ দৰে শিক্ষানুষ্ঠানৰ প্ৰৱেশ-প্ৰস্থান পইণ্টৰ সমীপত বহু দুৰ্ঘটনা সংঘটিত হয়। সঠিক পৰিকল্পনাৰ অভাৱত পথ দুৰ্ঘটনাত ১০ হাজাৰ শিশুৰ মৃত্যু হয়। এই সংখ্যা হ্ৰাস কৰিবলৈ চৰকাৰে চেষ্টা চলাইছে বুলি গাডকাৰীয়ে উল্লেখ কৰাৰ লগতে কয় যে মঙলবাৰে দিল্লীৰ ভাৰত মাণ্ডপামত ৰাজ্যৰ গড়কাপ্তানী মন্ত্ৰীসকলৰ সৈতে বৈঠকত বহিছিল গাডকাৰীয যি বৈঠকৰ উদ্দেশ্য আছিল কেন্দ্ৰ আৰু ৰাজ্য চৰকাৰৰ মাজত সহযোগিতামূলক সম্পৰ্ক উন্নত কৰাৰ লগতে পৰিবহণ সম্পৰ্কীয় নীতিৰ বিষয়ে আলোচনা কৰা। সেই বৈঠকতে তেওঁ নতুন প্ৰকল্পটোৰ বিষয়ে অৱগত কৰিছিল।