উজনি অসমৰ ঐতিহ্যমণ্ডিত চৰাইদেউ জিলাৰ পৰা প্ৰকাশিত একমাত্ৰ পষেকীয়া সংবাদপত্ৰ ‘চৰাইদেউ বাতৰি’ৰ ত্ৰয়োদশ বাৰ্ষিক বৰ্ষপূৰ্তি আৰু বঁটা প্ৰদান অনুষ্ঠানটো অহা ৯ জুন তাৰিখে চৰাইদেউ চ্যুকাফা পৰ্যটনভৱনত আয়োজন কৰিছে । ‘চৰাইদেউ বাতৰি’ৰ উদ্যোগত আৰু অসম ৰাজ্যিক সাংবাদিক সন্থাৰ চৰাইদেউ জিলা সমিতিৰ সহযোগত আয়োজন কৰা এই অনুষ্ঠান পুৱা ১০ বজাত শুভাৰম্ভ কৰা হ’ব । অসম ৰাজ্যিক সাংবাদিক সন্থাৰ কেন্দ্ৰীয় সাংগঠনিক সম্পাদক প্ৰণৱ বৰগোঁহাই বন্তি প্ৰজ্বলন কৰাৰ পিছতে মুকলি সভা, বঁটা প্ৰদান আৰু বিশেষ সম্বৰ্ধনা অনুষ্ঠান অনুষ্ঠিত হ’ব । জ্যেষ্ঠ সাংবাদিক মনোজ বৰঠাকুৰৰ পৌৰোহিত্যত অনুষ্ঠিত হ’বলগীয়া সভাখন উদ্বোধন কৰিব চৰাইদেউ জিলা প্ৰাক্তন জিলা আয়ুক্ত বিবেকানন্দ ফুকনে ।
সভাত আদৰণি ভাষণ আগবঢ়াব ‘চৰাইদেউ বাতৰি’ কাকতৰ মুখ্য উপদেষ্টা তথা সোণাৰি বিধান সভা সমষ্টিৰ বিধায়ক ধৰ্মেশ্বৰ কোঁৱৰে । উক্ত অনুষ্ঠানতে ‘ বৰ্তমান সাংবাদিকতাত মূল্যবোধৰ অভাৱ’ শীৰ্ষক বিষয়ত বক্তৃত্বা প্ৰদান কৰিব অসম ৰাজ্যিক সাংবাদিক সন্থাৰ সম্পাদক প্ৰদীপ ডেকাই । সভাত বিশিষ্ট অতিথি হিচাপে অসম ৰাজ্যিক সাংবাদিক সন্থাৰ প্ৰতিষ্ঠাপক প্ৰধান সম্পাদক ৰাতুল বৰা, কেবিনেট মন্ত্ৰী যোগেন মহন, চৰাইদেউৰ জ্যেষ্ঠ আইনীজীৱি মহেশ গদুকা, সোণাৰি প্ৰেছ ক্লাৱৰ সভাপতি আলিম আহমেদ, সোণাৰিৰ জ্যেষ্ঠ সাংবাদিক নাৰায়ণ দে, সোণাৰিৰ বিশিষ্ট সমাজকৰ্মী সমুদ্ৰ প্ৰসাদ বৰুৱা, সদৌ অসম ছাত্ৰ সন্থাৰ উপ-সভাপতি প্ৰশান্ত দত্ত আৰু টাই আহোম ছাত্ৰ সন্থাৰ যুটীয়া সম্পাদক দিগন্ত চাংমাই উপস্থিত থাকিব ।
উক্ত অনুষ্ঠানতে ‘চৰাইদেউ বাতৰি’য়ে প্ৰথমবাৰলৈ প্ৰদান কৰিবলগীয়া মানৱীৰাম বৰুৱা সোঁৱৰণী ‘চৰাইদেউ ৰত্ন’ বঁটা প্ৰতিষ্ঠিত সংগীত শিল্পী প্ৰশান্ত ৰাজখোৱা, যুৱ সাংবাদিকতা বঁটা শিৱসাগৰ জিলাৰ নিতাইপুখুৰী সাংবাদিক দীপক বড়া, সমাজহিতৈষী সুফল তাছা সোঁৱৰণী ‘সাহিত্য জ্যোতি’ বঁটা নলবাৰীৰ নিপ কুমাৰ মেধি, বীণাৰাণী ভূমিজ সোঁৱৰণী ‘সমাজ ৰত্ন’ বঁটা নলবাৰীৰ দেৱীপ্ৰসাদ অধিকাৰী আৰু যোৰহাটৰ বিশিষ্ট পৰিৱেশ কৰ্মী তথা সাংবাদিক জিতু কলিতাক ‘প্ৰজ্ঞাৰ সাধক’ বঁটা প্ৰদান কৰাৰ লগতে চৰাইদেউ জিলাৰ বহুকেইগৰাকী বিশিষ্ট সাংবাদিক, লেখক আৰু শিক্ষকক ‘চৰাইদেউ বাতৰি’ তৰফৰ পৰা সম্বৰ্ধনা জনোৱা হ’ব বুলি ‘চৰাইদেউ বাতৰি’ৰ মুখ্য সম্পাদক মৃদুল কুমাৰ চাহু আৰু অসম ৰাজ্যিক সাংবাদিক সন্থাৰ চৰাইদেউ জিলা সমিতিৰ সম্পাদক ধ্ৰুৱজ্যোতি বৰুৱাই জানিবলৈ দিছে ।