মৰিগাঁও জিলাৰ মৈৰাবাৰীৰ গাঁৱ পঞ্চায়তৰ ৫ নংৱাৰ্ডৰ পৰা যোৱা ৰাতি প্ৰায়ে ১১-৩০মান বজাত মৈৰাবাৰী আৰক্ষীয়ে বাল্য বিবাহ কাৰ্যত জড়িত তিনি জনক গ্ৰেপ্তাৰ কৰাৰ লগতে তেওঁ লোকৰ বিৰূদ্ধে ৭০/২০২২ নম্বৰত এটি গোচৰ ৰুজু কৰি আজি উক্ত আচামী তিনি জনক জেললৈ প্ৰেৰণ কৰে। জানিব পৰা মতে মৈৰাবাৰী পঞ্চায়তৰ ৫ নং ৱাৰ্ডত থকা ৰুস্তম আলীৰ ঘৰত যোৱা ৰাতি এগৰাকী ১৬বছৰীয়া কিশোৰীক ছামছুল হকৰ পুত্ৰ আতাবুৰ ৰহমান নামৰ ২১বছৰীয়া যুৱকৰ লগত বিবাহ কৰায় কন্যাক দৰাৰ ঘৰলৈ লৈ যোৱাৰ অৱস্থাত মৈৰাবাৰীৰ আৰক্ষীয়ে খবৰ পায় আৰু থানাৰ ভাৰপ্ৰাপ্ত আৰক্ষী বিষয়া চাবিৰ আলীৰ নেতৃত্বত আৰক্ষীৰ দলটো গৈ বিবাহ স্হলীত উপস্থিত হয় আৰু এই বাল্য বিবাহ কাৰ্যত জড়িত দৰা আতাবুৰ ৰহমান, পিতৃ ছামছুল হক, আৰু কন্যাজনীৰ খোৰায়েক ৰুস্তম আলীক গ্ৰেপ্তাৰ কৰাৰ লগতে উক্ত বাল্য বিবাহ ভংগ কৰি দিয়ে। উল্লেখযোগ্য যে বাল্য বিবাহ বন্ধ কৰিবলৈ চৰকাৰকে ধৰি বিভিন্ন দল সংগঠনে বিভিন্ন প্ৰচাৰৰ জৰিয়তে বিভিন্ন পদক্ষেপ গ্ৰহণ কৰি অহাৰ পাছতো সমাজত এনে অনীতি কাৰ্য চলি আছে।
বিশেষকৈ মুছলমান এলেকাত এই বাল্য বিবাহ প্ৰচলনৰ হাৰ কমি আহিছে যদিও গ্ৰামাঞ্চলত শিক্ষা আৰু সচেতনতাৰ অভাৱৰ ফলত প্ৰায়েই বাল্য বিবাহ চলি থকা দেখা যায়। গতিকে এই ক্ষেত্ৰত চৰকাৰৰ লগতে বিভিন্ন দল সংগঠনে আৰু অধিক প্ৰচাৰ আৰু আইন কানুনৰ বিষয়ে ৰাইজক সচেতনতা বৃদ্ধি কৰিবলৈ ৰাইজে দাবী জনাইছে ।