দৈনন্দিন বাৰ্তা ডেস্ক : বিচিচিআইৰ তৰফৰ পৰা ঘোষণা কৰা হৈছে যে এইবাৰ আইপিএলৰ মূল স্পনশ্বৰ হিচাপে নাথাকে চীনা ফোন প্ৰস্তুতকাৰী কোম্পানী ভিভ’ ৷ এক বিবৃতিত কয় যে বিচিচিআই আৰু ভিভ’ ম’বাইল ইণ্ডিয়া প্ৰাইভেট লিমিটেডৰ মাজত হোৱা আইপিএল সংক্ৰান্তীয় চুক্তি চলিত বছৰৰ বাবে বাতিল কৰা হৈছে ৷ ইয়াৰ অৰ্থ কেৱল আসন্ন আইপিএলৰ বাবে বিচ্ছেদ ঘটিছে দুয়োটা পক্ষৰ ৷ টুৰ্ণামেণ্টখনৰ আন তিনি বছৰৰ চুক্তি বাকী আছে ভিভ’ৰ ৷ ২০২১, ২০২২ আৰু ২০২৩ এই তিনি বছৰৰ চুক্তিৰ ম্যাদ শেষ কৰিব ৷ আনহাতে অহা ছেপ্টেম্বৰৰ পৰা আৰম্ভ হোৱাৰ কথা আইপিএলৰ নতুন টাইটোল স্পনশ্বৰ হিচাপে আহিছে ৰিলায়েন্স, বানজু আৰু আমাজনৰ নাম ৷ উল্লেখ্য যে লাডাখত চীনৰ আগ্ৰাসন আৰু ২০ জন ভাৰতীয় সেনা জোৱান শ্বহীদ হোৱাৰ পাচত ভাৰতত চীনা সামগ্ৰী বৰ্জনৰ দাবী উঠিছিল ৷ তদুপৰি বহু চীনা এপ ভাৰতত বন্ধ কৰি দিয়া হৈছিল ৷ সমগ্ৰ দেশত চীনৰ বিৰুদ্ধে সৰৱ হৈ থকা সময়ত ভিভ’ক ত্যাগ কৰাৰ সিদ্ধান্ত লয় বিচিচিআই-এ ৷ উল্লেখ্য যে অহা ১৯ ছেপ্টেম্বৰৰ পৰা ১০ নৱেম্বৰলৈকে আইপিএল আয়োজন কৰা হৈছে ৷ এতিয়া আইপিএলৰ টাইটোল স্পনশ্বৰ কোন হ’ব তাকে লৈ আলোচনা চলিছে ৷
