দৈনন্দিন বাৰ্তাৰ সেৱা
ননৈ : নগাঁও জিলাৰ বৰক’লা আদৰ্শ লালুং গাৱঁৰ চিংকু বৰদলৈ নামৰ এজন যুৱক (৩৫) হাৰিয়া নৈত গা ধুবলৈ বুলি যাওঁতে নৈৰ বুকুত ডুব গৈছিল যোৱা শনিবাৰে ৷ কালি দিনৰে পৰা এছ ডি আৰ এফৰ লোকে যুৱক জনৰ সন্ধানত সমগ্ৰ অঞ্চলতে অভিযান আৰম্ভ কৰিছিল যদিও যুৱক জনৰ কোন সন্ধান লাভ কৰা নাছিল ৷ অৱশ্যে আজি দুপৰীয়া এছ ডি আৰ এফে অশেষ কষ্ট কৰি ঘটনাস্থলীৰ কিছু নিলগত মৃত যুৱক জনৰ নশ্বৰ দেহ উদ্ধাৰ কৰিবলৈ সক্ষম হয় ৷ উল্লেখ্য যে, যোৱা ৪ জুলাই শনিবাৰে দিনৰ ভাগত গাৱঁৰ এগৰাকী ব্যক্তিৰ মৃতদেহ সৎকাৰ কৰি হাৰিয়া নৈত গা ধুৱলৈ বুলি নামোতেই উক্ত ঘটনাটো সংঘটিত হয় ৷ বৰ্তমান হাৰিয়া নৈ ফেনেফুটুকাৰে বাঢ়ি অহা নৈৰ বুকুত ডুব যোৱা যুৱক জনৰ আজি দুপৰীয়া সন্ধান পোৱাৰ পিছতে বৰ্তমান সমগ্ৰ অঞ্চলতে এক শোকাকুল পৰিৱেশে বিৰাজ কৰিছে ৷