এ জে আকন্দ, নগাঁও
নগাঁও মহাবিদ্যালয়ৰ একাংশ ছাত্ৰ-ছাত্ৰীয়ে গ্ৰহণ কৰা এক অভিনৱ কাৰ্যসূচীয়ে সকলোৰে দৃষ্টি আকৰ্ষণ কৰিবলৈ সক্ষম হৈছে। মহাবিদ্যালয়খনৰ পঙ্কজ বৰা, সৌৰভ দাস, ধিৰাজ কাশ্যপ নাথ, সুপ্ৰিয়া চৰকাৰ, পিন্স ডেকা আদিকে ধৰি কে’বাগৰাকী ছাত্ৰ-ছাত্ৰীৰ নেতৃত্বত গঠিত ”প্ৰাণ-দান” নামৰ এক অনুষ্ঠানৰ উদ্যোগত নগাঁও মহাবিদ্যালয়ৰ ছাত্ৰী আবাসৰ লগতে নগাঁও চৰকাৰী উচ্চতৰ মাধ্যমিক বালক বিদ্যালয়, নগাঁও চৰকাৰী উচ্চতৰ মাধ্যমিক বালিকা বিদ্যালয়কে প্ৰমুখ্য কৰি চহৰখনৰ কে’বাখনো বিদ্যালয়ত কালি অনুষ্ঠিত বিশ্ব পৰিৱেশ দিৱস উপলক্ষে বৃক্ষৰোপন কৰাৰ লগতে চহৰখনৰ বাটে পথে লগ পোৱা একাংশ জনতা, ব্যৱসায়ী আদিক বিনামূলীয়াকৈ মাস্ক বিতৰণ কৰে। আটাইতকৈ গুৰুত্বপূৰ্ণ কথাটো এই যে, মহাবিদ্যালয়খনৰ এই কেইগৰাকী ছাত্র-ছাত্ৰীয়ে তেওঁলোকৰ অভিভাৱকে দিয়া টিফিন খৰচৰ পৰা এটা অংশ ৰাহি কৰি দীৰ্ঘদিন ধৰি ধন গোটাই গৈছিল আৰু সেই সাঁচতীয়া ধনেৰেই আজি তেওঁলোকে বিভিন্ন অনুষ্ঠান-প্ৰতিষ্ঠানত বৃক্ষৰোপন কৰাৰ লগতে ক’ৰণা ভাইৰাছৰ এই ভয়াবহ পৰিৱেশৰ মাজতে চহৰখনৰ বিভিন্ন ঠাই পৰিভ্ৰমণ কৰি একাংশ ৰাইজক মাস্ক বিতৰণ কৰি মহানুভৱতাৰ পৰিচয় দাঙি ধৰে। লগতে নৱ প্ৰজন্মৰ প্ৰতিনিধি হিচাপে এক আদৰ্শ দাঙি ধৰিবলৈ সক্ষম হৈছে। যি সময়ত একাংশ নৱ প্ৰজন্মই মদ-ড্ৰাগছ আদি ৰাগিয়াল দ্ৰব্য সেৱন কৰাকে ধৰি বিভিন্ন কাৰণত উশৃংখলতাৰ দিশে গতি কৰিছে, সেই সময়ত একাংশ কলেজীয়া ছাত্ৰ-ছাত্ৰীৰ এনে গঠন মুলক কাৰ্যক সকলোৱে প্ৰশংসা কৰিছে।