লংকা
লংকা চহৰৰ ফাতেমা হোটেল কোৱাৰেণ্টাইনত থকা চাৰিজন লোকৰ দেহত ক’ভিড -১৯ পজিটিভ ধৰা পৰিছে। লোক কেইজন হৈছে আব্দুল ৰহিম, জয়নাল হক, ইকবাল হুছেইন আৰু হবিবুৰ ৰহমান। আক্ৰান্ত গোটেইকেইজন বহিঃৰাজ্যৰ পৰা উভতি অহা। ইয়াৰে তিনিজনৰ ঘৰ লংকাৰ খাৰিখানা আৰু এজনৰ দক্ষিণ লস্কৰপথাৰৰ। উল্লেখ যে যোৱা ২৩ মে’ত যুৱককেইজন শ্ৰমিক ৰে’লেৰে পুনেৰ পৰা আহি গুৱাহাটীত নামিছিল আৰু তাৰ বাছেৰে আহি ২৪ মে’ত পুৱা লংকা পোৱাৰ পিছত স্বাস্হ্য বিভাগে লংকাৰ ফাতেমা হোটেলত স্হাপন কৰা কোৱাৰেণ্টাইনত কেন্দ্রত ৰখা হৈছিল। উল্লেখ যে কেন্দ্রটোত মুঠ ১৫ জন লোকক কোৱাৰেণ্টাইনত ৰখা আছে৷ ইয়াৰ পাছতে লোককেইজনৰ শ্বোৱাব সংগ্রহ কৰি পৰীক্ষা কৰিবলৈ দিয়া হৈছিল। যোৱা নিশা চাৰিগৰাকী লোকৰ পৰীক্ষাৰ ফলাফল পজিটিভ অহাত নিশায়েই নগাঁওৰ ভোগেশ্বৰী অসামৰিক চিকিৎসালয়ত ভৰ্ত্তি কৰা হয়।