ক’ৰোনা ভাইৰাছ সংক্ৰমণ : ব্ৰিটেইনক পিছ পেলাই চতুৰ্থ স্থানত ভাৰত ।
দৈনন্দিন বাৰ্তা
দেশত আনলক-১ চলি থকাৰ সময়তে ক’ৰোনা ভাইৰাছত আক্ৰান্তৰ সংখ্যাই অভিলেখ গঢ়িছে৷ কালিলৈকে বিশ্বৰ পঞ্চম স্থানত থকা ভাৰতত আক্ৰান্তৰ সংখ্যাই ব্ৰিটেইনক পিছ পেলাই চতুৰ্থ স্থান দখল কৰিলে৷ বৃহস্পতিবাৰে ভাৰতে পিছ পেলালে ব্ৰিটেইনক৷ বৰ্তমানে ব্ৰিটেইনত আক্ৰান্তৰ সংখ্যা ২,৯১,৫৮৮জন৷ আনহাতে ভাৰতে দুই লাখ ৯৫ হাজাৰ অতিক্ৰম কৰিছে৷ আক্ৰান্তৰ দিশৰ প্ৰতি লক্ষ্য কৰিলে শুকুৰবাৰে তিনি লাখ অতিক্ৰম কৰাৰ সম্ভাৱনা আছে৷ কেৱল মহাৰাষ্ট্ৰত যোৱা ২৪ ঘণ্টাত অভিলেখ সংখ্যক লোক আক্ৰান্ত হৈছে৷ ৰাজ্যখনত যোৱা ২৪ ঘণ্টাত ৩৬০৭জন লোক আক্ৰান্ত হয়৷ ফলত এইখন ৰাজ্যত মুঠ আক্ৰান্তৰ সংখ্যা ৯৭,৬৪৮ জন হ’লগৈ৷ উল্লেখযোগ্য যে বিগত ২৪ ঘণ্টাত দেশত কৰোনা আক্ৰান্তৰ মুঠ সংখ্যা হৈছে ২,৯৭,২০৫জন। আনহাতে, কালিৰ দিনটোত আক্ৰান্তৰ সংখ্যা আছিল ৯,৫০০জন৷ তদুপৰি মৃতকৰ সংখ্যাই প্ৰথমবাৰৰ বাবে ৩০০ অতিক্ৰম কৰে। বৰ্তমান ভাৰতৰ স্থান আমেৰিকা (২০,৭৬,৪৯৫), ব্ৰাজিল (৭,৮৭,৪৮৯) আৰু ৰাছিয়া (৫,০২,৪৩৬)ৰ পিছতে৷ শুকুৰবাৰে পুৱা ৮ বজাত কেন্দ্ৰীয় স্বাস্থ্য মন্ত্ৰালয়ে এই তথ্য প্ৰদান কৰি কয় যে ভাৰতত বৃহস্পতিবাৰৰ দিনটোত এটা দিনত বৰ্তমানলৈ ৰেকৰ্ড সংখ্যক মৃত্যু ৩৫৭ আৰু সংক্ৰমণ ৯,৯৯৬ হৈছে। ইয়াৰ জৰিয়তে মুঠ মৃত্যুৰ সংখ্যা ৮,১০২ আৰু আক্ৰান্তৰ সংখ্যা ২,৮৬,৫৭৯লৈ বৃদ্ধি পাইছে।