১২ জানুৱাৰী,২০২৫ : Debjit Bora ।অসম সাহিত্য সভা সম্পৰ্কত দীৰ্ঘদিনে ঠাই পাই অহা বিতৰ্কসমূহৰ অৱসান ঘটিব লাগিব। অসম সাহিত্য সভাই হওক নাইবা জিলা সাহিত্য সভাসমূহেই হওক, ভিতৰচ’ৰাৰ লবীকেন্দ্ৰীক ৰাজনীতি আৰু বোকা ছটিওৱা খেল পৰিহাৰ কৰিবই লাগিব। এনে প্ৰৱণতাই সম্প্ৰতি এক ভয়াবহ ৰূপ লৈছে। অসম সাহিত্য সভাৰ নৱ-নিৰ্বাচিত সভাপতি ভাষাবিদ ড° বসন্ত কুমাৰ গোস্বামীৰ সবল নেতৃত্বত অসমীয়া ভাষা-সাহিত্য সংস্কৃতিৰ চৰ্চাৰ পৰিৱেশ ৰচনাৰে সমগ্ৰ অসমখনত এক বৌদ্ধিক আন্দোলন গঢ়ি তুলি সৰ্বস্তৰৰ ৰাইজক অংশীদাৰ কৰাৰ কৰাৰ আগন্তুক দিনত ব্যাপক কৰ্মসূচী গ্ৰহণ কৰাৰ আমি সংকল্পবদ্ধ । সাহিত্য সভা ভাল মানুহৰ স্থান হৈ পৰক, সভাখন জীৱবিহীন জীৱন্ত সংগঠন; সভাৰ উপযুক্ত বাতাবৰণ আমি সকলোৱে সৃষ্টি কৰিব লাগিব।
মোৰ ভুল হʼলে মোক আঙুলিয়াই দিব; এশ শাখা সাহিত্য সভা গঠনত গুৰুত্ব প্ৰদান কৰক, পঞ্চায়তে পঞ্চায়তে, ৱাৰ্ডে ৱাৰ্ডে, গাঁৱে গাঁৱে শাখা সাহিত্য সভা হওক । অসম সাহিত্য সভাৰ মৃত কৰ্মচাৰীৰ বিধৱা পত্নীৰ প্ৰাপ্য ধন আদায় পাব পৰাকৈ কৰ্পাচ পূঁজি আমি দহ কোটিলৈ বৃদ্ধি কৰিব লাগিব। গোলাঘাট জিলা সাহিত্য সভাৰ কাৰ্যালয় সাহিত্যাচাৰ্য চৈয়দ আব্দুল মালিক ভৱনত আজি আয়োজিত অভিনন্দন অনুষ্ঠানত বিপুল সম্বৰ্ধনা গ্ৰহণ কৰি অসম সাহিত্য সভাৰ নৱ-নিৰ্বাচিত প্ৰধান সম্পাদক দেৱজিৎ বৰাই এনেদৰে মন্তব্য কৰে।
তেওঁ লগতে কয় যে, সাহিত্য সভাত কথা কম আৰু কাম বেচি কৰিব লাগিব। অসম সাহিত্য সভাৰ কাৰ্যনিৰ্বাহক সমিতিৰ পদবী নাইবা স্থানৰ ক্ষেত্ৰত জিলা সাহিত্য সভাৰ কোনো ধৰণৰ অবাঞ্চিত হেঁচা মানি লোৱা নহ’ব বুলিও তেওঁ মুকলিভাৱে প্ৰকাশ কৰে। অসম সাহিত্য সভাৰ যোৰহাটস্থিত কেন্দ্ৰীয় কাৰ্যালয় ঐতিহ্যমণ্ডিত চন্দ্ৰকান্ত ভৱনলৈ সাহিত্যানুৰাগী নাইবা বিশিষ্ট ব্যক্তি সকল পূৰ্বৰ দৰে নোযোৱাৰ এক পৰিৱেশ সৃষ্টি হোৱা বুলি তেওঁ ক্ষোভ প্ৰকাশ কৰি এক সুস্থ বাতাবৰণ সৃষ্টিৰে নৱ-নিৰ্বাচিত সভাপতি ড° বসন্ত কুমাৰ গোস্বামীৰ নেতৃত্বত চন্দ্ৰকান্ত ভৱনে ন-ৰূপ পাব বুলিও উল্লেখ কৰে নৱ-নিৰ্বাচিত প্ৰধান সম্পাদক দেৱজিৎ বৰাই। গোলাঘাট জিলা সাহিত্য সভাৰ উদ্যোগত অনুষ্ঠিত হোৱা অভিনন্দন অনুষ্ঠানৰ সভাৰ সভাপতিত্ব কৰে গোলাঘাট জিলা সাহিত্য সভাৰ সভাপতি বন্তি বৰাই। জিলা সাহিত্য সভাৰ সম্পাদক দুলাল দাসে আঁত ধৰা অনুষ্ঠানত অসম সাহিত্য সভাৰ কেন্দ্ৰীয় সাংগঠনিক সম্পাদক দিগন্ত কুমাৰ ভূঞা, অসম সাহিত্য সভাৰ ‘কুঁহি’ উপ-সমিতিৰ আহ্বায়ক শংকুসিদ্ধ নাথ, সাহিত্য সভাৰ কেন্দ্ৰীয় বিষয়ববীয়া নুৰুল চুলতান, নৰেন শইকীয়া, যোৰহাট জিলা সাহিত্য সভাৰ প্ৰাক্তন সহকাৰী সম্পাদক বিদ্যুৎ ভূষণ বৰা, তৰাজান সন্মিলিত শাখা সাহিত্য সভাৰ সম্পাদক মনোজ্ঞপ্ৰাণ বৰদলৈ, যোৰহাট সাহিত্য সভাৰ সম্পাদক উত্তম কুমাৰ হাজৰিকা, গোলাঘাট জিলা সাহিত্য সভাৰ প্ৰাক্তন সভাপতিত্ৰয় পৱিত্ৰ বৰবৰা, সুৰেন্দ্ৰ মোহন হাজৰিকা, তফজুল হক বৰবৰা, গোলাঘাট জিলা সাহিত্য সভাৰ উপ-সভাপতি মুহিৰাম লুইং , বিষয়ববীয়া ড° যতীন নাথ,অধ্যাপক দেৱজিৎ ফুকন, বিশিষ্ট লেখক তিতাৰাম শইকীয়া, সদৌ অসম কৰ্মচাৰী পৰিষদৰ গোলাঘাট জিলাৰ সম্পাদক প্ৰবীণ কুমাৰ গগৈ, আদি উপস্থিত থাকি নৱ-নিৰ্বাচিত প্ৰধান সম্পাদকক সম্বৰ্ধনা জনোৱাৰ লগতে জিলাখনৰ শাখা সাহিত্যসমূহে বিপুল সম্বৰ্দ্ধনা জনায়।