‘বড়ো, তিৱা, কাৰ্বি, কোঁচ- ৰাজবংশী আদি জনগোষ্ঠীৰ গলবস্ত্ৰ, নগা পাহাৰৰ গলবস্ত্ৰ, তামিলনাডুৰ গলবস্ত্ৰৰে মোক সম্ভাষণ জনাইছে।(Debojit Borah) হয়, কাব্যকাননৰ লগত মই বহুবছৰৰে পৰা জড়িত। নৱ ৰাজনে প্ৰায়বোৰ কথা মোৰ লগত আলোচনা কৰিছিল। কিন্তু আজিৰ এই সম্বৰ্ধনা মোক জনোৱা নাই, জনাইছে অসম সাহিত্য সভাক। সাহিত্য সভাৰ প্ৰতি আপোনালোক দায়বদ্ধ। লগতে আজি আৰু এটা কথাত গৌৰৱবোধ কৰিছোঁ, সেইটো হৈছে কাব্য কানন সু–সংগঠক জন্ম দিয়া সাহিত্য সংগঠন’।
অসম কাব্য কাননৰ উদ্যোগত অসম সাহিত্য সভাৰ গুৱাহাটী প্ৰশাসনিক কাৰ্যালয় ভগৱতী প্ৰসাদ বৰুৱা ভৱনৰ ৰাধা গোবিন্দ বৰুৱা সভাকক্ষত আয়োজিত গাম্ভীৰ্যপূৰ্ণ সম্বৰ্ধনা অনুষ্ঠানত সম্বৰ্ধনা গ্ৰহণ কৰি এইদৰে বক্তব্য ৰাখে অসম সাহিত্য সভাৰ প্ৰধান সম্পাদক দেৱজিৎ বৰাই।
অসম কাব্য কাননৰ সদ্য প্ৰাক্তন প্ৰতিষ্ঠাপক সম্পাদক তথা সদ্য মনোনীত সাহিত্য সভাৰ কবি সন্মিলনৰ আহ্বায়ক নৱ ৰাজনকো এই অনুষ্ঠানতে সম্বৰ্ধনা জনোৱা হয়। কাননৰ ভাৰপ্ৰাপ্ত সম্পাদক অৰ্চনা ঠাকুৰীয়াই আঁত ধৰা সভাখনত উদ্দেশ্য ব্যাখা কৰে কাননৰ আনগৰাকী ভাৰপ্ৰাপ্ত সম্পাদক অনামিকা ৰায়ে।
কাননৰ সভাপতি ডাঃ হীৰেন্দ্ৰ কুমাৰ ভাগৱতী, কাৰ্যকৰী সভাপতি ড° প্ৰহ্লাদ বসুমতাৰী, উপদেষ্টা প্ৰদীপ চন্দ্ৰ শৰ্মা, পবিত্ৰ কুমাৰ নাথ, জুৰি ভট্টাচাৰ্য, গিৰিজা শৰ্মা, মেঘালী বৰুৱা শইকীয়া, ভূমিকা দাস, বিনীতা গোস্বামী, বিভা দেৱী, বিশ্বজিৎ গগৈ, হিমাদ্ৰী দাস, ড° ববিতা বৰ্মন, নন্দিতা বৰঠাকুৰ প্ৰমুখ্যে অৰ্ধশতাধিক কাব্যনুৰাগীয়ে দুয়োগৰাকী ব্যক্তিকে বিভিন্ন জনগোষ্ঠীৰ গলবস্ত্ৰৰ লগতে জাপি, শৰাই, স্মাৰক, সম্বৰ্ধনা পত্ৰ আদিৰে সম্বৰ্ধনা জনায়।।