অযোধ্যা, ৩০ অক্টোবৰ: আজি এক ঐতিহাসিক মুহূৰ্তৰ সাক্ষী হ’ব ৰামনগৰী অযোধ্যাবাসী ৰাইজ। ৰাম কি পেইৰিৰ ৫৫ টা ঘাটত একেলগে ২৫ লাখ বন্তি প্ৰজ্বলন কৰা হ’ব(Deepotsav celebration in Ayodhya)। ইয়াৰ সমান্তৰালকৈ ৰাজ্যখনৰ মুখ্যমন্ত্ৰী যোগীৰ উপস্থিতিত সৰয়ুৰ পাৰত ১১০০ সাধু আৰু বেদাচাৰ্যই মহা আৰতিও কৰিব(Maha Aarti on Banks of Saryu)। এই দুই কাৰ্যসূচীৰ জৰিয়তে অযোধ্যাবাসীয়ে চলাইছে দুটা নতুন বিশ্ব অভিলেখ সৃষ্টিৰ প্ৰস্তুতি। তাৰোপৰি সন্ধিয়ালৈ ভগৱান শ্ৰীৰামৰ(Lord Shri Ram) আগমনৰ বাবে কৰা হৈছে বিশাল প্ৰস্তুতি । ৰাম মন্দিৰক আটকধুনীয়াকৈ সজাই তোলাৰ লগতে বিভিন্ন স্থানত স্থাপন কৰা হৈছে আদৰণি তোৰণ।
পোহৰৰ উৎসৱৰ আয়োজনক লৈ ইতিমধ্যে ইয়াৰ আখৰাও সম্পূৰ্ণ কৰা হৈছে। সৰ্যু আৰতিৰ সমন্বয়ক শশীকান্ত দাসে কয় যে ভগৱান শ্ৰীৰামক তেওঁৰ ঘৰত স্থাপন কৰাৰ পিছত এইটো হৈছে প্ৰথম পোহৰৰ উৎসৱ আৰু সামগ্ৰিকভাৱে ই হৈছে অষ্টম পোহৰৰ উৎসৱ । আজি সন্ধিয়া ২৫ লাখ বন্তি জ্বলোৱাৰ লগে লগে ইয়াক গিনিজ বুক অৱ ৱৰ্ল্ড ৰেকৰ্ডত লিপিবদ্ধ কৰা হ’ব। পোহৰৰ উৎসৱৰ বাবে ৰামৰ চহৰখনক ইতিমধ্যে আটকধুনীয়াকৈ সজাই পৰাই তোলা হৈছে। তাৰোপৰি ২০০ কৈও অধিক মঠ আৰু মন্দিৰত জ্বলোৱা হ’ব বন্তি ।
সমন্বয়কগৰাকীয়ে লগতে কয় যে, প্ৰতিদিনে ৫১০০ বন্তিৰে আৰতি কৰা হয়। আজি ইয়াৰ লগতে ১১০০ সাধুৱে একেলগে মাতা সৰ্যুৰ আৰতি প্ৰদৰ্শন কৰিব। এই কাৰ্যসূচীকো বিশ্ব অভিলেখ হিচাপে গিনিজ বুক অৱ ৱৰ্ল্ড ৰেকৰ্ডত লিপিবদ্ধ কৰা হ’ব। ইয়াৰ পূৰ্বে ইমান বৃহৎ সংখ্যক সন্ত আৰু ঋষিয়ে কেতিয়াও এনেধৰণৰ মহা আৰতি কৰা নাছিল। এই মহা আৰতিৰ অনুষ্ঠানটোত বহুসংখ্যক বিশিষ্ট ব্যক্তিয়েও অংশগ্ৰহণ কৰিব । এই ঐতিহাসিক মুহূৰ্তৰ সাক্ষী হ’বৰ বাবে ৰাজ্যৰ মুখ্যমন্ত্ৰীগৰাকীও আজি দুপৰীয়াৰ পৰা প্ৰায় ২০ ঘণ্টা ৰামনগৰীত উপস্থিত থাকি তেওঁ পিছদিনা তেওঁ গোৰখপুৰলৈ যাত্ৰা কৰিব।
এটি শোভাযাত্ৰাৰে পুৱা ৯ বজাৰ পৰা আৰম্ভ হোৱা পোহৰৰ এই উৎসৱ উপলক্ষ্যে ৰামনগৰী অযোধ্যাত বিভিন্ন কাৰ্যসূচী অন্তৰ্ভূক্ত কৰা হৈছে। ৰাজ্যখনৰ মুখ্যমন্ত্ৰী আদিত্যানাথ যোগীয়ে(CM Adityanath Yogi) সৰয়ু আৰতিত ভাগ লৈ সন্ধিয়া প্ৰায় ৬.৩০ বজাত দীপোৎসৱৰ কাৰ্যসূচীত অংশগ্ৰহণ কৰিব ।
উল্লেখ্য যে, এই অনুষ্ঠানৰ পূৰ্বে মঙলবাৰে সন্ধিয়া অজস্ৰ মহিলাই মা সৰয়ুৰ আৰতি প্ৰদৰ্শন কৰে। ২০১৭ চনৰ পৰা আৰম্ভ হোৱা দীপোৎসৱৰ প্ৰথম বৰ্ষত ১.৭১ লাখ বন্তি জ্বলাই আলোকিত কৰা হৈছিল। ইয়াৰ পিছত ক্ৰমান্বয়ে ২০১৮ চনত ৩.০১ লাখ, ২০১৯ চনত ৪.০৪ লাখ, ২০২০ চনত ৬.০৬ লাখ, ২০২১ চনত ৯.৪১ লাখ, ২০২২ চনত ১৫.৭৬ লাখ, ২০২৩ চনত ২২.২৩ লাখ বন্তি জ্বলোৱা হৈছিল। এই বৰ্ষৰ দীপোৎসৱত ২৫ লাখ বন্তি জ্বলোৱাৰ প্ৰস্তুতি চলোৱা হৈছে ।