জামুগুৰিহাট : কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা ওলাই আহি চতিয়াৰ দক্ষিণ প্ৰান্তৰ ভোজমাৰীৰ ১ নং কলাইকাটিত আশ্ৰয় লোৱা এটা হৰিণা কালি স্বেচ্ছাসেৱী সংগঠন ‘উপত্যকা’ৰ সদস্যসকলে উদ্ধাৰ কৰি বনবিভাগক চমজাই দিয়ে। বানৰ কৱলত পৰি ষষ্ঠ সংযোজনৰ পৰা ওলাই আহি উদ্ধাৰ হোৱা হৰিণাটো পিছত বনবিভাগৰ লোকে বিহালীৰ সমীপৰ লাহৰিজান বনাঞ্চলত এৰি দিয়ে। ইফালে বানপানীৰ সময়ত বনাঞ্চলৰ পৰা ওলাই আহি দিগবিদিগ হেৰুৱাই জনাঞ্চলত প্ৰৱেশ কৰা বন্য জীৱ-জন্তু দেখিলেই বনবিভাগক তৎকালে খৱৰ দিবলৈ বনবিভাগৰ ফালৰ পৰা সকলোকে আহ্বান জনাইছে।
