অত্যধিক সুৰাপান কৰাৰ পাছত দেখা দিয়া মূৰ কামোৰণি আদি উপসৰ্গৰ (হেং অ’ভাৰ) বাবে ডাবৰ পানী এটা উৎকৃষ্ট প্ৰতিকাৰ। সুৰাপানৰ প্ৰভাৱত হোৱা ডিহাইড্ৰেচন ডাবৰ পানীয়ে দূৰ কৰে। তদুপৰি ইয়াত থকা বিভিন্ন এণ্টি-অক্সিডেণ্টসমূহে সুৰাপানে কৰা শৰীৰৰ বিভিন্ন ক্ষতিবোৰ প্ৰতিৰোধ কৰে।
নিয়মিত ডাবৰ পানী সেৱন কৰিলে শৰীৰত কলেষ্টেৰল, ট্ৰাইগ্লিচাৰাইড আৰু এল ডি এলৰ মাত্ৰা হ্ৰাস কৰে বুলি কোৱা হৈছে। অৱশ্যে এই বিষয়ে অধিক গৱেষণাৰ প্ৰয়োজন আছে।
ডাবৰ পানী এটা খুব বিশুদ্ধ পানীয়। খুব জৰুৰী আপদকালীন স্থিতিত ডাবৰ পানী শৰীৰৰ সিৰাত ছেলাইনৰ দৰে ব্যৱহাৰ কৰিব পাৰি। দ্বিতীয় মহাযুদ্ধৰ সময়ত যেতিয়া ছেলাইনৰ খুব নাটনি হৈছিল, সেই সময়ত ডাবৰ পানী ছেলাইনৰ পৰিৱৰ্তে ব্যৱহাৰ কৰা হৈছিল। আফ্ৰিকা মহাদেশৰ কিছুমান খুব দুখীয়া দেশত এতিয়াও এই ধৰণৰ ব্যৱহাৰ আছে।
ডাবৰ পানীয়ে ছালৰ শালমন বা ব্ৰন ৰোগ (একনি) দূৰ কৰাত সহায় কৰে। ডাবৰ পানীয়ে ছালৰ আৰ্দ্ৰতা বৃদ্ধি কৰি ছালৰ উজ্জ্বলতা আনে। বহুতো প্ৰসাধন সামগ্ৰীত আজিকালি নাৰিকল ব্যৱহাৰ কৰা হয়।
