বৃহত্তৰ পালহাজী আঞ্চলিক গাওঁৰক্ষী সমিতি (বাহিনী) ৰ উদ্যোগত আজি পালহাজী বজাৰত ৰাইজৰ মাজত মাস্ক আৰু ছেনিটাইজাৰ বিতৰণ কৰা হয়। জিলাখনত বৃদ্ধি পোৱা ক’ৰোনাৰ ভয়াবহতাৰ আৰু ইয়াৰ পৰা পৰিত্ৰাণ পোৱাৰ লক্ষ্যৰে পালহাজী গাওঁৰক্ষী সমিতিয়ে এই উদ্যোগ লৈ ক’ৰোনাৰ বিৰুদ্ধে সকলোকে সাৱধানতাৰে যুঁজাৰ বাবে আহ্বান জনায় । ক’ৰোনাৰ সংক্ৰমণক লৈ জনসাধাৰণক সজাগ কৰি তোলাৰ প্ৰয়াসেৰে পালহাজী বজাৰৰ মাজেৰে কোভিড প্ৰটকল মানি পদযাত্ৰা উলিয়াই বজাৰত মাস্ক পৰিধান নকৰা লোকক মাস্ক বিতৰণ কৰাৰ লগতে সামাজিক দূৰত্ব বজাই ৰখাৰ বাবে আহ্বান জনায়। এই উদ্যোগত সহযোগ কৰে পালহাজী অমৰ , পালহাজী খানাপাৰা, চকাবাউসী, দামালজাৰ, ধকুৱা, শুহাবিল দলনি ভিজিপিৰ সমুহ কাৰ্যকৰ্তাসকল। এই সন্দৰ্ভত এখন অনুষ্টুপীয়াকৈ পতা সজাগতামূলক সভাত পালহাজী অমৰ ভিডিপিৰ সম্পাদক নুৰুল ইছলামে ক’ৰোনাময়ী এই ভয়াবহ পৰিস্থিতিৰ মাজত জীয়াই থাকিব লাগিলে মাস্ক, ছেনিটাইজাৰ ব্যৱহাৰ কৰাৰ লগতে সামাজিক দূৰত্ব বজাই ৰখাৰ বাদে কোনো গত্যন্তৰ নাই বুলি কয়। ক’ৰোনাৰ সংক্ৰমণৰ প্ৰতি লক্ষ্য ৰাখি ঈদৰ নামাজো ঈদগাহ ময়দানত আদায় নকৰি ঘৰতে কৰাৰ বাবেও ৰাইজক আহ্বান জনায় ।
