চামগুৰি ,২১ নৱেম্বৰ:— (Nagaon) নগাঁও জিলাৰ চামগুৰি আৰক্ষী থানাৰ অন্তৰ্গত পুৰণিগুদাম মিকিৰহাট হাতীৰ গাঁৱত জীৱশ্ৰেষ্ঠ মানুহৰ নৃশংসতাৰ বলি হ’ল এজনী প্ৰভূভক্ত মাইকী কুকুৰ (DOG) ৷ পাঁচটাকৈ সদ্যোজাত পোৱালিক মাতৃহীনা কৰি স্থানীয় দিব্যজ্যোতি শইকীয়া ওৰফে দাদুল নামৰ যুৱকজনে মৰিয়াই মৰিয়াই নৃশংসভাৱে মাইকী কুকুৰজনীক হত্যা কৰাৰ বাবে সমগ্ৰ অঞ্চলজুৰি সৃষ্টি হৈছে এক প্ৰতিবাদমুখৰ পৰিস্থিতি ৷
জানিব পৰা মতে, ব্ৰইলাৰ ফাৰ্মত সোমাই ব্ৰইলাৰ খোৱাৰ অপৰাধতে দাদুলে কুকুৰজনীক নৃশংস ভাৱে মৰিয়াই মৰিয়াই হত্যা কৰিছিল , যদিও নৃশংসতাৰ বলি হোৱা কুকুৰ জনীয়ে মাত্ৰ দুদিন পূৰ্বে জন্ম দিছিল পাঁচটাকৈ কুকুৰ পোৱালী । সম্প্ৰতি সদ্যোজাত পোৱালী কেইটাই মাতৃক বিচাৰি ব্যাকুল হৈ পৰিছে । মাতৃৰ মৃতদেহৰ কাষত পোৱালী কেইটাই মাতৃৰ দুগ্ধ বিচাৰি বিচাৰি কান্দি থকা হৃদয় বিদাৰক দৃশ্য দেখিলে প্ৰতিগৰাকী প্ৰকৃতিপ্ৰেমীৰ হৃদয় হয়তো আন্দোলিত নোহোৱাকৈ নাথাকিব ৷ এই ঘটনা সংঘটিত হোৱাৰ পাছতে স্থানীয় মহিলা সকলে মৃত কুকুৰ জনীৰ পক্ষত ন্যায় বিচাৰি ওলাই আহিল ৷
সদ্যোজাত পোৱালী কেইটাই মাকক বিচাৰি ব্যাকুল হোৱাৰ দৃশ্য দেখি স্থানীয় আইমাতৃ সকলো কান্দি কান্দি ব্যাকুল হৈ পৰা পৰিলক্ষিত হয় । মাতৃত্বৰ বেদনা উপলব্ধি কৰা মহিলা সকলে ন্যায় বিচাৰি পুৰণিগুদাম আৰক্ষীৰ চকীৰ কাষ চাপিছে। স্থানীয় মহিলা সকলে দোষীক উপযুক্ত শাস্তিৰ দাবী জনোৱাৰ লগতে অৰণ্য সুৰক্ষা সমিতি ,অসমৰ নগাঁও জিলা সমিতিয়েও গৰিহণা দিয়ে বুলি জানিব পৰা গৈছে ।