৬ জানুৱাৰী,২০২৪ঃ Dr. Basanta Kumar Goswami । অসম সাহিত্য সভাৰ নৱনিৰ্বাচিত সভাপতি ড০ বসন্ত কুমাৰ গোস্বামীৰ জয়ে অসম সাহিত্য সভাৰ সৰ্বস্তৰৰ সাহিত্যপ্ৰেমীলৈ আনন্দৰ বতৰা কঢ়িয়াই অনাত সমগ্ৰ মাজুলীৰ লগতে মাজুলীৰ অন্যতম শাখা সাহিত্য সভা উত্তৰ কমলাবাৰী শাখা সাহিত্য সভাও উৎফুল্লিত হৈ পৰিছে ।
উত্তৰ কমলাবাৰী সাহিত্য সভাৰ তৰফৰ পৰা মাজুলী জিলা সাহিত্য সভাৰ প্ৰাক্তন সম্পাদক মনোজ্যোতি ৰেগন, শাখাৰ প্ৰাক্তন সম্পাদক শংকুসিদ্ধ নাথে নৱনিৰ্বাচিত সভাপতি ড০ বসন্ত কুমাৰ গোস্বামীৰ যোৰহাট সুৱাগপুৰস্থিত বাসগৃহত উপস্থিত হৈ ব্যাপক সম্বৰ্ধনা জ্ঞাপন কৰে ।
অসম সাহিত্য সভাৰ সভাপতি পদত অধিষ্ঠিত হৈ গোস্বামীয়ে কয় যে অসম সাহিত্য সভাক এক নতুন গতিৰে আগবঢ়াই নিব লাগিব; মহাপুৰুষ শ্ৰীমন্ত শঙ্কৰদেৱ, লক্ষ্মীনাথ বেজবৰুৱা আৰু জ্যোতি প্ৰসাদ আগৰৱালাৰ দৰে অসমীয়া জাতিৰ পুৰোধা সকলক বিশেষভাৱে বিশ্ববাসীৰ সন্মুখত দাঙি ধৰিব লাগিব।
তেওঁ লগতে কয় যে অনাগত দিনত অসম সাহিত্য সভাৰ কেন্দ্ৰীয় কাৰ্যালয় চন্দ্ৰকান্ত সন্দিকৈ ভৱনে হেৰুওৱা ঐতিহ্য ঘূৰাই পাব আৰু এই ভৱনৰ পৰা সভাৰ সকলো কাম-কাজ পৰিচালনা কৰা হʼব ।প্ৰতিজন সাহিত্য সভাপ্ৰেমীৰ সহযোগত অসম সাহিত্য সভাৰ বিশ্বমুখী যাত্ৰা অধিক ক্ষিপ্ৰতৰ হ’ব । উত্তৰ কমলাবাৰী শাখা সাহিত্য সভাৰ সভাপতি দাসীৰাম পামেগাম, সম্পাদক কৃষ্ণা ৰাণী শইকীয়া বৰুৱাৰ স্বাক্ষৰিত সম্বৰ্ধনা পত্ৰ আৰু অংগ বস্ত্ৰ গ্ৰহণ কৰি নৱনিৰ্বাচিত সভাপতি গৰাকীয়ে জাতীয় জীৱনৰ মহৎ সেৱাত উৎসৰ্গিত হʼবলৈ সকলোকে আহ্বান জনায় ।