গুৱাহাটী, ৬ নবেম্বৰঃ বহৰি শ্বহীদ স্মৃতি ৰঙ্গমঞ্চত ‘জুই'(Drama Jui)। এই জুই এনেকৈ সম্প্ৰসাৰিত হৈ পৰে যে জুই চাই থকা দৰ্শকসকলে মাঘ মহীয়া জুইৰ উত্তাপ লৈহে যেন বহি আছে। যেন জুই এৰি কোনো উঠি যাব নোৱাৰে।
পূৱ বৰপেটাৰ একমাত্র অপেচাদাৰী নাট্য দল বহৰি নাট্য গোষ্ঠীয়ে ১৭ অক্টোবৰত বহৰি শ্বহীদ স্মৃতি ৰঙ্গমঞ্চত(Bahari Shaheed Smriti Rangmanch) নাট্যকাৰ হৰিহৰ মেধিৰ জুই নামৰ নাটখন মঞ্চস্থ কৰি পুনৰ বাৰ দৰ্শকৰ মনত সাচ বহুৱাবলৈ সক্ষম হ’ল। নাট্যগোষ্ঠীটোৱে জুই নাটখন ইমান সুন্দৰ ভাবে মঞ্চায়ন কৰে যে,আদিৰ পৰা অন্তলৈ হাজাৰোধিক দর্শকে নাটখন উপভোগ কৰি থাকে।
প্ৰতিটো নাট্য মূহূৰ্তত দৰ্শকৰ জাউৰি জাউৰি হাত চাপৰিত মুখৰিত হৈ থাকে শ্বহীদ স্মৃতি ৰঙ্গমঞ্চ প্ৰাঙ্গন। নাটকখন সুন্দৰভাৱে মঞ্চায়ন কৰাৰ বাবে প্রবীণ অভিনেতাসকলৰ লগতে এইবাৰ প্রথম বাৰৰ বাবে অভিনয় কৰা কেইবাজনো শিল্পীৰ নাম স্বীকাৰ কৰিবই লাগিব। মূলত নাটখন মনোগ্রাহী কৰাত পৰিচালক অজয় কুমাৰ দাসৰ লগতে সহ:পৰিচালক জয়ন্ত দাস সফল হৈছে।
পৰিচালকদ্বয়ে প্রতিজন অভিনেতা অভিনেত্রীৰ পৰা প্রয়োজনীয় দক্ষতাখিনি উলিয়াই অনাত সফল হৈছে। ইয়াৰ বাবে পৰিচালক অজয় দাস ধন্যবাদৰ পাত্র।শিল্পীসকলৰ সাৱলীল অভিনয় আৰু নাটখনৰ হৃদয়স্পর্শী কাহিনীয়ে দর্শকক মন্ত্রমুগ্ধ কৰি ৰাখিবলৈ সক্ষম হয়। নাটকখনৰ নিপোটল কাহিনীটোক অভিনেতা-অভিনেত্রী সকলে সুন্দৰ অভিনয়েৰে আগবঢ়াই নিয়ে।
নাটক খনৰ বিশ্বজিৎ চৌধুৰীৰ চৰিত্ৰত জয়ন্ত দাসৰ সাবলীল তথা সুন্দৰ অভিনয়ে নাটখন উপভোগ্য কৰি তুলিছে। আনহাতে প্রায়ভাগ নাটকতে খলনায়কৰ চৰিত্রত অভিনয় কৰি সফল হোৱা বিশ্বমধু তালুকদাৰে এইবাৰো জুই নাটখনত মন্ত্ৰী পুত্ৰ ৰাকেশ বৰা নামৰ খলনায়কৰ চৰিত্ৰত অভিনয় কৰি দৰ্শকৰ মনত ঘৃনাৰ উন্মেষ ঘটাবলৈ সক্ষম হৈছে।
পুলিচ ইন্সপেক্টৰ অজয়ৰ চৰিত্ৰত পৰিচালক অজয় কুমাৰ দাসে নাটকখনক এক সুন্দৰ গতি দিয়াবলৈ সক্ষম হৈছে। ভৱ নামৰ অজলা চৰিত্রটোত দামোদৰ দাসৰ সুন্দৰ অভিনয়ে দর্শকক আপ্লুত কৰিছে। মন্ত্ৰীপুত্ৰ(Minister’s Son) ৰাকেশৰ সহযোগী দেৱৰ চৰিত্ৰত ধ্ৰুৱজিৎ দাসে চৰিত্রটোক সফল ৰূপে ডাঙি ধৰিছে যদিও মাজে মাজে উজুতি খাইছে।
ধনজিৎৰ চৰিত্ৰত সঞ্জীৱ শৰ্মাই সফলতা দাবী কৰিব পাৰে। অভয়ৰ চৰিত্ৰত অৱনি দাস সফল হৈছে বুলি কব পাৰি। বাদলৰ চৰিত্ৰত গৌতম গোস্বামীয়ে দৰ্শকৰ হৃদয় চুমিবলৈ সক্ষম হৈছে। কনিষ্টবলৰ চৰিত্ৰ আৰু ড্ৰাইভাৰ ওৰফে চিআইডি ইন্সপেক্টৰৰ ৰূপত দুই নবাগতা অভিনেতা ক্ৰমে সীমান্ত পাঠক আৰু বিশ্বজিত তালুকদাৰৰ হাস্যৰসে ভবিষ্যতৰ স্বাক্ষৰ বহন কৰিছে।
চিকিৎসকৰ চৰিত্ৰত সত্যজিত দাস সফল। প্ৰথম দৃশ্যতে মৃত্যুবৰন কৰা হৰ্ষৰ চৰিত্রত দেৱৰাজ দাসে ভালেই কৰিছে। হৰ্ষৰ পত্নী শেৱালীৰ চৰিত্ৰত বন্দনা তালুকদাৰে দৰ্শকক কন্দুৱাবলৈ সক্ষম হোৱাৰ বিপৰীতে শেৱালীৰ শাহুমাক ৰত্নাৰ চৰিত্ৰত অভিনয় কৰি মেঘালী দাস বৰুৱাই দৰ্শকক ক্ৰোধান্বিত কৰিবলৈ সক্ষম হৈছে।
এইবাৰ প্ৰথমবাৰৰ মঞ্চত অভিনয় কৰা জিমি পাঠকে কৰবীৰ চৰিত্ৰটোক জীৱন্ত কৰি তুলিবলৈ সক্ষম হৈছে। জিমিয়ে নাট্য চৰ্চা অব্যাহত ৰাখিলে প্ৰতিষ্ঠিত হোৱাটো নিশ্চিত। নাটকৰ প্ৰতিটো মূহূৰ্তত দৰ্শকৰ হাত চাপৰিত ৰজনজনাই পৰিছিল প্রেক্ষাগৃহ।
আৰু এই হাত চাপৰিয়ে উৎসাহিত কৰি তুলিছিল প্ৰতিজন নাট্যকৰ্মীকে। প্ৰেম, ৰোমান্স, চাচপেন্স, হাঁহি,কান্দোনেৰে নাটক খনৰ প্ৰতিটো চৰিত্ৰকে সমান গুৰুত্ব দি আগবঢ়া সুন্দৰ কাহিনীৰ বাবেই পুৱা ৪ বজালৈকে সহস্ৰাধিক দৰ্শক গিজগিজাই আছিল।
সফল অভিনেত্রী বন্দনাৰ কৰিঅগ্রাফো সুন্দৰ। ইপিনে মঞ্চৰ ভিতৰত থাকি ৰমেন মেধি, ব্রজেন পাঠক আৰু ক্ষিতিশ তালুকদাৰে নাটখনৰ সফল মঞ্চায়নৰ বাবে কৰা কামৰ বাবে ধন্যবাদৰ পাত্র।
শব্দ ধনজিৎ ডেকা আৰু পোহৰ ব্ৰজেন মেধিৰ। বহৰি নাট্যগোষ্ঠীৰ প্রতিবছৰে নতুনক উলিয়াই অনাব যি প্রচেষ্টা এইবাৰো সফল হৈছে। অপেচাদাৰী নাতিগোষ্ঠীটোৱে নাট্য চর্চা অব্যাহত ৰাখি নৱ প্রজম্মক বহৰিৰ নাট্য চৰ্চাৰ লগত সংপৃক্ত কৰক। নতুন চামচ উদ্বুদ্ধ কৰক, তাকেই কামনা কৰিছে নাট্যপ্ৰেমী ৰাইজে।