কাকজান : যোৰহাট জিলা টীয়কৰ কাকজান খেলপথাৰৰ আন্ত:গাঁঠনি উন্নয়নৰ ক্ষেত্ৰত চৰকাৰৰ অমনোযোগিতাৰ অভিযোগ ৷ আন্তঃৰাষ্ট্ৰীয় পৰ্যায়ৰ সফলতা আঁজুৰি অনাৰ ক্ষেত্ৰত গুৰুত্বপূৰ্ণ অৰিহণা থকা এই খেলপথাৰখনক লৈ এলাগী কৰাৰ অভিযোগ তুলি সচেতন ৰাইজে ৷ স্থানীয় ৰাইজে জানিবলৈ দিয়া অনুসৰি ২০০৭ চনত কাকজান ক্ৰীড়া সন্থা আৰু কাকজান ফুটবল কচিং চেন্টাৰৰ উদ্যোগত উক্ত খেলপথাৰখনত ফুটবলৰ প্ৰশিক্ষণ আৰম্ভ হৈছিল ৷ ৰাইজৰ অভিযোগ, আন্তঃগাঁথনি বিহীন খেলপথাৰখনত বোকা, গাঁত, ঘাঁহনিৰ মাজত অনুশীলন কৰি ইতিমধ্যে বহু খেলুৱৈয়ে জিলা, ৰাজ্যিক, ৰাষ্ট্ৰীয় তথা আন্ত:ৰাষ্ট্ৰীয় পৰ্যায়ত পাৰদৰ্শিতা প্ৰদৰ্শন কৰি সমগ্ৰ টীয়ক তথা অসমলৈ গৌৰৱ কঢ়িয়াই আনিছে৷ তথাপি খেলপথাৰখন উন্নীতকৰণৰ ক্ষেত্ৰত আজিও চৰকাৰখনে কোনো গুৰুত্ব প্ৰদান কৰা পৰিলক্ষিত ন’হল ৷ উল্লেখ্য যে ২০০৭ চনৰ পৰাই অঞ্চলটোৰ ছাত্ৰ-ছাত্ৰীসকলক বৌদ্ধিক ক্ৰীড়াৰ ক্ষেত্ৰখনত আগুৱাই নিয়াত কাকজান খেলপথাৰে এক গুৰুত্বপূৰ্ণ ভূমিকা পালন কৰি আহিছে ৷ ইতিমধ্যে এই খেলপথাৰখনে বহুকেইগৰাকী ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ খেলুৱৈৰ জন্ম দিছে ৷ খেল’ ইণ্ডিয়াৰ দৰে প্ৰতিযোগিতাত এই ক্ৰীড়া সন্থাৰ প্ৰশিক্ষাৰ্থীয়ে সফলতা আনিবলৈ সক্ষম হোৱাৰ লগতে, এই সন্থাৰে অন্যতম পাৰ্গত মহিলা খেলুৱৈ অঞ্জনা শইকীয়াই ইতিমধ্যে ভাৰতৰ হৈ আন্ত:ৰাষ্ট্ৰীয় প্ৰেক্ষাপটত গ’ল ৰক্ষক হিচাপে খেলি অসমলৈ গৌৰৱ কঢ়িয়াই আনিবলৈ সক্ষম হৈছে ৷ তৎসত্বেও ৰাষ্ট্ৰীয় ঘাইপথৰ নিচেই দাঁতিতে থকা খেলপথাৰখনে আজি পৰ্যন্ত চৰকাৰৰ দৃষ্টি আকৰ্ষণ কৰিবলৈ সক্ষম নহ’ল ৷ প্ৰশিক্ষকে জানিবলৈ দিয়া মতে খেলপথাৰখনৰ পুতৌজনক অৱস্থাৰ বাবে কঠোৰ অনুশীলনত ব্যস্ত থকাৰ মাজত আঘাতপ্ৰাপ্ত হৈ বহু সময়ত খেলুৱৈসকলে খেলত অংশ ল’ব নোৱাৰাৰ বহুত উদাহৰণ আছে ৷ সচেতন ৰাইজৰ অভিযোগ, যি সময়ত চৰকাৰে ক্ৰীড়া জগতৰ প্ৰচাৰ তথা প্ৰসাৰৰ বাবে উদাত্ত ভাষণেৰে সকলোৰে দৃষ্টি আকৰ্ষণ কৰাৰ চেষ্টা কৰি আহিছে তেনে সময়তে ৰাষ্ট্ৰীয় ঘাইপথৰ কাষতে অৱস্থিত খেলপথাৰখনৰ দূৰৱস্থাই আচলতে চৰকাৰৰ ফোপোলা স্বৰূপটোকহে উদঙাই দিছে ৷ ইমানখিনি অসুবিধাৰ মাজতো হাৰ নামানি অনুশীলনত ব্ৰতী খেলুৱৈসকলে যাতে ক্ৰীড়াক জীৱনৰ পেচা হিচাপে গ্ৰহণ কৰিব পাৰে তাৰ বাবে অসম চৰকাৰ তথা মুখ্যমন্ত্ৰীক উচিত ব্যৱস্থা গ্ৰহণ কৰাৰ বাবে এতিয়া সচেতন ৰাইজে আহ্বান জনাইছে ৷
