গুৱাহাটী : বানৰ কবলত পৰা পবিতৰা বন্যপ্ৰাণী অভয়াৰণ্যৰ জীৱ-জন্তুক খাদ্যৰ যোগান ধৰাৰ বাবে আগবাঢ়ি আহিছে আসাম ৰিয়েল ইষ্টেট ইনফ্ৰাষ্টাকচাৰ ডেভলপাৰচ এছোচিয়েশ্বন চমুকৈ ‘এৰিডা’। বন বিভাগৰ সহযোগত ‘এৰিডা’ই পবিতৰাত খাদ্যৰ সংকটত ভোগা বন্যপ্ৰাণীৰ বাবে বিশেষকৈ তৃণভোজী প্ৰাণীৰ বাবে ঘাঁহৰ যোগান ধৰিছে। বন্যপ্ৰাণীৰ বিচৰণ ভূমি তথা ঘাঁহনি অঞ্চল বানৰ কবলত পৰাৰ বাবে অভয়াৰণ্যখনৰ জীৱ-জন্তুৱে খাদ্যৰ সংকটত ভোগিবলগীয়া হৈছে। বিস্তৃৰ্ণ অঞ্চল বানত বুৰ যোৱাৰ পৰিপ্ৰেক্ষিতত খাদ্যৰ বাবে হাহাকাৰ কৰিবলগীয়া হৈছে জীৱ-জন্তুৱে। অভয়াৰণ্যখনৰ জীৱ-জন্তুৰ খাদ্য সংকটৰ প্ৰতি লক্ষ্য ৰাখি ‘এৰিডা’ই বিশেষ উদ্যোগ গ্ৰহণ কৰিছে। বন বিভাগৰ সহযোগত ‘এৰিডা’ৰ সদস্যসকলে অভয়াৰণ্যখনৰ বিভিন্ন ওখ ঠাইত নাও যোগে ঘাঁহৰ যোগান ধৰে। অভয়াৰণ্যখনলৈ ট্ৰাকযোগে ঘাঁহৰ যোগান ধৰা হয়। এইক্ষেত্রত ‘এৰিডা’ৰ সভাপতি পি কে শৰ্মাই অভয়াৰণ্যখনৰ ৰেঞ্জ অফিচাৰ মুকুল তামুলীৰ লগতে আন বিষয়া-কৰ্মচাৰীসকলৰ সহযোগীতাৰ শলাগ লয়।
