বনৰীয়া হাতীৰ জাক এটা জনাঞ্চলৰ পৰা বনাঞ্চললৈ খেদি পঠিয়াবলৈ বনকৰ্মীয়ে শূন্যলৈ গুলি চালনা কৰাত আকস্মিক ঘটনা ক্ৰমে যোৱা ১০ ডিচেম্বৰত মৃত্যু হৈছিল কণমানি আৰ্বী দৈমাৰী। এই ঘটনাত আৰ্বী দৈমাৰীৰ মাতৃ মালবিকা দৈমাৰী গুৰুতৰভাৱে আঘাতপ্ৰাপ্ত হৈ সম্প্ৰতি গুৱাহাটী চিকিৎসা মহাবিদ্যালয়ত চিকিৎসাধীন হৈ আছে। ইফালে এই মৰ্মান্তিক ঘটনাৰ উচিত তদন্ত বিচাৰি বন বিভাগৰ বিষয়া কৰ্মচাৰীৰ বিৰুদ্ধে সৰৱ হৈ পৰিছে সকলো জাতীয় দ’ল সংগঠন।মৃতক আৰু আঘাতপ্ৰাপ্ত পৰিয়ালটোৱেও বিচাৰিছে উচিত ন্যায়।
উক্ত ঘটনা সন্দৰ্ভত চৰকাৰৰ তৰফৰ পৰা জিলা পৰ্যায়ৰ বিশেষ তদন্ত কৰিবলৈ বকোত বাহৰ পাতিছে কামৰূপ জিলা উপায়ুক্ত কাৰ্য্যালয়ৰ অতিৰিক্ত উপায়ুক্ত সিদ্ধাৰ্থ গোস্বামী। উল্লেখ্য যে, কেইবাদিনো একেলেঠাৰিয়ে তদন্ত চলাই আজি সিদ্ধাৰ্থ গোস্বামী উপস্থিত হয় বন্দাপাৰা /ৰাজাপাৰা অঞ্চলৰ ঘটনা সংঘটিত হোৱা স্থানত। ইফালে তদন্তত ব্যস্ত থকা সিদ্ধাৰ্থ গোস্বামী দেৱ উপস্থিত হোৱা সময়ত সমবেত হয় একাংশ গঞা। আৰু সমবেত ৰাইজৰ লগত ঘটনা সন্দৰ্ভত আলোচনা কৰি বিষয়টো গুৰুত্ব সহকাৰে লোৱাৰ কথা ব্যক্ত কৰে গোস্বামীয়ে। আনহাতে পৰিয়ালৰ লোকেও উক্ত ঘটনাৰ উচিত তদন্ত বিচাৰিছে। আজিৰ চৰজমিন তদন্তৰ সময়ত সিদ্ধাৰ্থ গোস্বামীক সহযোগ আগবঢ়াই ৰাভা হাছং স্বায়ত্ব শাসিত পৰিষদৰ সাধাৰণ পাৰিষদ অৰ্জুন ছেত্ৰীয়ে।