দৈনন্দিন বাৰ্তা ডেস্ক : দেশৰ প্ৰাক্তন ৰাষ্ট্ৰপতি প্ৰণৱ মুখাৰ্জীৰ শাৰীৰিক অৱস্থা সংকটজনক ৷ ইতিমধ্যে তেওঁক ভেণ্টিলেছনত ৰখা হৈছে ৷ চিকিৎসালয়ৰ সূত্ৰৰ মতে সোমবাৰে ক’ৰোনাত আক্ৰান্ত প্ৰাক্তন ৰাষ্ট্ৰপতিজনৰ ব্ৰেইন ছাৰ্জাৰি কৰা হয় ৷ তাৰ পাচৰ পৰাই তেওঁক ভেণ্টিলেছনত ৰখা হয় ৷ উল্লেখ্য যে ৮৪ বছৰীয়া প্ৰণৱ মুখাৰ্জীয়ে ক’ৰোনাত আক্ৰান্ত হোৱাৰ কথা নিজেই টুইট কৰি জনাইছিল ৷ টুইট কৰোতে তেওঁ লিখিছিল, আন এটা দৰকাৰত চিকিৎসালয়লৈ গৈছিল ৷ তাতেই ক’ৰোনা পৰীক্ষা হয় ৷ সেই পৰীক্ষাত তেওঁৰ পজিটিভ পায়৷ নিজকে ক’ৰোনাত আক্ৰান্ত হোৱাৰ কথা কোৱাৰ লগতে যোৱা এটা সপ্তাহত তেওঁৰ সংগলৈ অহা লোকক সাৱধানতা অৱলম্বন কৰিবলৈ কয় ৷ তদুপৰি সকলোকে ছেল্ফ আইচলেচনত থাকি ক’ভিড পৰীক্ষাৰ বাবে প্ৰাক্তন ৰাষ্ট্ৰপতিজনে আহ্বান কৰে৷ আনহাতে দিল্লীৰ আৰ্মি ৰিচাৰ্চ এণ্ড ৰেফাৰেল হাস্পতালত তেওঁক ক’ৰোনাত আক্ৰান্ত হোৱাৰ দিনা ভৰ্ত্তি কৰে ৷ চিকিৎসালয়ৰ সূত্ৰ মতে তেওঁৰ মস্তিস্কৰ এঠাইত তেজ জমা হৈছে ৷ সোমবাৰে ৰাতি তেওঁৰ ব্ৰেইন ছাৰ্জাৰি কৰা হয় ৷ উল্লেখ্য যে দেওবাৰে ৰাতি ঘৰৰ শৌচগাৰত পৰি মুৰত আঘাত পাইছিল প্ৰণৱ মুখাৰ্জীয়ে ৷ ৰক্তপাত নহ’লেও সোমবাৰে পুৱাৰ পৰা স্নায়ুৰ সমস্যাই দেখা দিয়ে ৷ বাওঁহাতখন লৰচৰ কৰাত সমস্যা হয় ৷ তেতিয়াই চিকিৎসকৰ পৰামৰ্শ মতে তেওঁ উক্ত চিকিৎসালয়ত ভৰ্ত্তি হয় ৷ এমআৰআই স্কেন কৰি পায় যে তেওঁ আঘাত পোৱাৰ ফলত মুৰৰ ভিতৰত তেজ জমা হৈছে ৷ সেয়ে জৰুৰী ভিত্তিত অস্ত্ৰোপচাৰৰ সিদ্ধান্ত লয় চিকিৎসকে ৷ অস্ত্ৰোপচাৰ কৰি তেওঁৰ জমা তেজ বাহিৰ কৰি দিয়া হয় ৷ কিন্তু শাৰীৰিক অৱস্থা সংকটজনক হোৱাত তেওঁক চিকিৎসালয়খনতে ভেণ্টিলেছনত ৰখা হয় ৷ উল্লেখ্য যে ২০১২ চনৰ পৰা ২০১৭ চনলৈকে ভাৰতৰ ৰাষ্ট্ৰপতি আছিল এইজন বৰ্ষীয়ান কংগ্ৰেছ নেতা ৷
