দৈনন্দিন বাৰ্তা ডেস্ক : ৰাম মন্দিৰৰ আধাৰশিলা অনুষ্ঠানৰ বাবে প্ৰধানমন্ত্ৰী নৰেন্দ্ৰ মোডী বুধবাৰে অযোধ্যাত উপস্থিত হ’ব ৷ মহানগৰখনত প্ৰধানমন্ত্ৰীয়ে তিনি ঘণ্টা কটাব ৷ সেই সময়তে প্ৰধানমন্ত্ৰীয়ে ভগৱান হনুমান মন্দিৰ দৰ্শন কৰিব ৷ উল্লেখ্য যে ৰাম জন্মভূমি তীৰ্থ ক্ষেত্ৰ ট্ৰাষ্টে এই আধাৰশিলা অনুষ্ঠানৰ বাবে ১৭৫ জন অতিথি নিমন্ত্ৰণ কৰিছে ৷ ইয়াৰ ভিতৰত ১৩৫ জন আধ্যাত্মিক ব্যক্তি আছে ৷ প্ৰধানমন্ত্ৰী মোডীয়ে অযোধ্যালৈ পুৱা ৯.৩৫ বজাত নতুন দিল্লীৰ পৰা যাত্ৰা কৰিব ৷ দিনৰ ১০.৩৫ বজাত লক্ষ্ণৌ বিমানবন্দৰত অৱতৰণ কৰিব ৷ তাৰ পাচত ১০.৪০ বজাত অযোধ্যা অভিমুখে হেলিকপ্টাৰেৰে তেওঁ ৰাওনা হ’ব ৷ ১১.৩০ বজাত অযোধ্যাৰ ছাকেট কলনিৰ হেলিপেড পাবগৈ ৷ ১১.৪০ বজাত হনুমান গাৰহি দৰ্শন কৰিব ৷ ১২ বজাত ৰাম জন্মভূমি পাবগৈ প্ৰধানমন্ত্ৰী ৷ আনহাতে ৰাম লালা ১০ মিনিট দৰ্শন কৰিব ৷ তদুপৰি ১২.১৫ বজাত গছপুলি ৰোপন অনুষ্ঠানত থকাৰ পাচত ১২.৩০ বজাত ভূমি পূজা আৰম্ভ হ’ব ৷ ১২.৪০ বজাত আধাৰশিলা অনুষ্ঠান অনুষ্ঠিত হ’ব ৷ ইয়াৰ উপৰি ১.১০ বজাত ৰাম জন্মভূমি ট্ৰাষ্টৰ স্বামী নৃত্য গোপাল দাস আৰু আন সদস্যৰ লগত সভাত অংশগ্ৰহণ কৰিব প্ৰধানমন্ত্ৰীয়ে ৷ প্ৰধানমন্ত্ৰীয়ে ২.০৫ বজাত ছাকেট হেলিপেডৰ পৰা পুনৰ উভি যাব আৰু ২.২০ বজাত লক্ষ্ণৌ পাবগৈ ৷ উল্লেখ্য যে এই আধাৰশিলা স্থাপনৰ বাবে ৫ কিলোগ্ৰাম সোণ আৰু ২০ কিলোগ্ৰাম ৰূপৰ ইটা ব্যৱহাৰ কৰা হ’ব ৷
