কলিয়াবৰ
দেশত ক’ভিড -১৯ৰ সংক্ৰমণ প্ৰতিৰোধ কৰিবলৈ দেশত বলৱৎ হোৱা লকডাউনৰ চতুৰ্থ পৰ্যায়ত ভালেমান শিথিলতা ঘোষিত হৈছে। জনসাধাৰণক নিৰ্দ্ধাৰণ কৰি দিছে কিছু বিশেষ সাৱধানতা। সেই উদ্দেশ্যেৰে জনসাধাৰণক সজাগ হৈ ক’ৰোনা ভাইৰাছৰ সংক্ৰমণ প্ৰতিহত কৰিবলৈ ৰাজ্য চৰকাৰে নীতি-নিৰ্দেশনা মানি চলিবলৈ আহ্বান জনাইছে৷ কলিয়াবৰ মহকুমা প্ৰশাসনে স্থানীয় জনসাধাৰণক সজাগ কৰিবলৈ লকডাউনৰ চতুৰ্থ পৰ্যায়ৰ নীতি-নিৰ্দেশনা কলিয়াবৰৰ বিভিন্ন বাণিজ্যিক কেন্দ্ৰসমূহত ঘোষণাৰ ব্যৱস্থা কৰিছে। এই নীতি-নিৰ্দেশনা যাতে আন্তৰিকতাৰে প্ৰতিজন ব্যক্তিয়ে পালন কৰে তাৰ বাবে আহ্বান জনাইছে মহকুমা প্ৰশাসনে। তদুপৰি, উত্তৰ-পূৰ্বাঞ্চলৰ বিখ্যাৎ কলিয়াবৰৰ চুলুং স্থিত মাছৰ নীলাম কেন্দ্ৰ সম্পূৰ্ণ ৰূপে মুকলি কৰিবলৈ মহকুমা প্ৰশাসনে নিৰ্দেশনা জাৰি কৰিছে। ইতিমধ্যে ৰে’লেৰে বহিঃৰাজ্যৰ পৰা ৰাজ্যলৈ অহা লোকসকলৰ পৰা যাতে সংক্ৰমণ হ’ব নোৱাৰে তাৰ বাবেও স্বাস্থ্য বিভাগ স্থানীয় প্ৰশাসন আৰু আৰক্ষীৰ সহযোগত সষ্টম হৈ আছে। ৰাজ্যৰ বিভিন্ন স্থানত নতুনকৈ বহিঃৰাজ্যৰ পৰা অহা লোকসকলক আছুতীয়াকৈ ৰখাৰ বাবে কোৱিৰেণ্টাইন কেন্দ্ৰ সাজূ কৰি তুলিছে। এই ক্ষেত্ৰত কলিয়াবৰো ব্যতিক্ৰম নহয়। মহকুমাটোত সাতটা কোৱাৰেণ্টাইন কেন্দ্ৰত সাজু কৰি তুলিছে ৩৪৮ খন বিচনাসহ অনান্য সুবিধাসমূহ। অন্ধ্ৰ প্ৰদেশৰ পৰা কলিয়াবৰত উপস্থিত হোৱা কুঠৰী আৰু কঞ্চনজুৰি অঞ্চলৰ সাতজন লোকক আমনিস্থিত বহুমুখী গৃহত কোৱাৰেণ্টাইনত ৰখা হৈছে।