পাবজীৰ জড়িয়তে ভাৰতৰ শচীন নামৰ লোকজনৰ প্ৰেমত পৰি চাৰি সন্তানৰ সৈতে পাকিস্তানৰ পৰা ভাৰতলৈ অহা সীমা হায়দৰে হয়তো ২০২৪ ৰ লোকসভা নিৰ্বাচনত প্ৰতিদ্বন্দিতা কৰিব! আপাততঃ তেনে এখন ছবিয়েই পৰিস্ফূট হৈছে। উল্লেখ্য কেন্দ্ৰীয় মন্ত্ৰী ৰামদাস আঠৱালেৰ ৰিপাব্লিকান পাৰ্টি অৱ ইণ্ডিয়া (আৰপিআই) শাসকীয় ভাৰতীয় জনতা পাৰ্টি (বিজেপি)ৰ নেতৃত্বত ৰাষ্ট্ৰীয় গণতান্ত্ৰিক মিত্ৰজোঁটৰ (এন ডি এ) সহযোগী এটা দল। শেহতীয়াকৈ জানিব পৰা মতে আৰপিআই দলেই সীমা হায়দৰৰ কাষ চাপিছে আৰু তেওঁক ৰাজনীতিত যোগদান কৰি আগন্তুক ২০২৪ চনৰ লোকসভা নিৰ্বাচনত প্ৰতিদ্বন্দিতা কৰিবলৈ অনুপ্ৰেৰণা দিছে। আৰপিআইৰ ৰাষ্ট্ৰীয় উপ-সভাপতি মাছুম কিশোৰে এই কথা নিশ্চিত কৰিছে। “সীমা হায়দৰ এগৰাকী পাকিস্তানী নাগৰিক আৰু তেওঁ ভাৰতলৈ আহিছে। যদি সীমাই নিৰাপত্তা সংস্থাৰ পৰা ক্লিন চিট লাভ কৰে আৰু ভাৰতীয় নাগৰিকত্ব লাভ কৰে, তেন্তে সীমাক আমাৰ দললৈ স্বাগতম জনোৱা হ’ব। ভাৰতীয় নাগৰিকত্ব থকা জনে যিকোনো ঠাইতে নিৰ্বাচনত প্ৰতিদ্বন্দিতা কৰিব পাৰে,” মাছুম কিশোৰে কয়।
ইপিনে আৰপিআইৰ এই প্ৰস্তাৱ সীমা হায়দৰে গ্ৰহণ কৰিছে। ইয়াৰ লগে লগে তেওঁ আৰপিআইৰ মহিলা শাখাৰ সভানেত্ৰী আৰু দলটোৰ সম্ভাৱ্য মুখপাত্ৰ হোৱাৰ পথ প্ৰশস্ত হৈ পৰিছে বুলি আৰপিআই দলৰ বিশেষ সূত্ৰ এটাই প্ৰকাশ কৰিছে।
ইয়াৰ মাজতে গুজৰাটৰ এজন ব্যৱসায়ীয়ে সীমা হায়দৰ আৰু তেওঁৰ প্ৰেমিক শচীন মীনাক চাকৰিৰ প্ৰস্তাৱ আগবঢ়াইছে আৰু তেওঁলোকক তেওঁলোকৰ বিত্তীয় পৰিস্থিতি উন্নত কৰাৰ এক লাভজনক সুযোগ প্ৰদান কৰিব বুলি কথা দিছে।সীমা আৰু শচীনে সন্মুখীন হোৱা আৰ্থিক অসুবিধাৰ মাজতে চলচ্চিত্ৰ প্ৰযোজক অমিত জানিয়েও এখন চলচ্চিত্ৰত সীমাক অভিনয় কৰাৰ প্ৰস্তাৱ দিছে।জানিব পৰা মতে সীমা হায়দৰে উদয়পুৰৰ দৰ্জী কানহাইয়া লালৰ হত্যাকলৈ নিৰ্মাণ হ’বলগীয়া ছবি’এ টেইলাৰ মাৰ্ডাৰ ষ্ট’ৰী’ত এজন ৰ’ৰ বিষয়াৰ চৰিত্ৰত অভিনয় কৰিবলৈ সাজু হৈছে। ছবিখন নিৰ্মাণ কৰি থকা সংস্থা জানি ফায়াৰফক্স প্ৰডাকচন হাউচৰ এটা দলে মঙলবাৰে গ্ৰেটাৰ নয়ডাত সীমাক লগ কৰিছে।ইপিনে ভাৰতীয় নাগৰিকত্বৰ বাবে সীমা হায়দৰে আবেদন জনাইছে।ভাৰতত আশ্ৰয় বিচাৰি সীমা হায়দৰে ৰাষ্ট্ৰপতি দ্ৰৌপদী মুৰ্মুকো আবেদন দাখিল কৰিছে।ইয়াৰ মাজতে ভাৰতৰ চোৰাংচোৱা সংস্থাসমূহে সীমা দৰাচলতে পাকিস্তানৰ গুপ্তচৰ নেকি সেয়া জানিবলৈ চেষ্টা অব্যাহত ৰাখিছে।