“কৈলা বাবা কি জয়, ভাল লাগিল ৷”জৰ্জিয়াৰ ৰাষ্ট্ৰদূত আৰ্চিল জুলিয়াছভিলিয়ে আজি বিয়লি বৰপেটা সত্ৰৰ দৌল উৎসৱৰ সুৱেৰীত অংশ গ্ৰহণ কৰি এইদৰে সংবাদ মাধ্যমৰ আগত নিজৰ অনুভৱ অসমীয়াত ব্যক্ত কৰে ৷জৰ্জিয়াৰ ৰাষ্ট্ৰদূত গৰাকীয়ে বৰপেটাৰ দৌল উৎসৱ চাবলৈ অহাৰ পিছত ৰঙতে মতলীয়া হৈ থকা সত্ৰ নগৰীৰ যুৱক যুৱতী সকলৰ আনন্দত অংশ গ্ৰহণ কৰি ফাকুগুৰিৰে সকলোকে হোলীৰ শুভেচ্ছা জনায় ৷
ৰাষ্ট্ৰদূত গৰাকীক সত্ৰ পৰিচালনা সমিতিয়ে নহাটী চকত গামোছাৰে আদৰণি জনোৱাৰ পিছত ঢুলীয়া, হোলীগীতৰ দলে সত্ৰলৈ আদৰি আনে ৷সত্ৰৰ চৌহদত প্ৰবেশ কৰি গোঁসাই কলবাৰী সত্ৰলৈ হেকতা খুৱাবলৈ নিয়া দৃশ্য প্ৰত্যক্ষ কৰি পিছত সত্ৰ চৌহদ পৰিভ্ৰমণ কৰে ৷