নলবাৰী জিলাৰ ঘগ্ৰাপাৰৰ, বড়িগোগ-বনভাগ শিক্ষাখণ্ডৰ অন্তৰ্গত পূব বনভাগ মধ্য ইংৰাজী বিদ্যালয়, সঠামৌত ‘বহনক্ষম ভবিষ্যতৰ বাবে বিজ্ঞান আৰু প্ৰযুক্তিবিদ্যাৰ সমন্বিত অভিগমন’ক মূল বিষয় হিচাপে লৈ সোমবাৰে ৰাষ্ট্ৰীয় বিজ্ঞান দিৱস উদ্যাপন কৰা হয়। এই উপলক্ষে বিজ্ঞানী চন্দ্ৰশেখৰ ভেংকট ৰমনৰ স্মৃতিত বন্তি প্ৰজ্জ্বলন আৰু মাল্যাৰ্পণ কৰে বিদ্যালয়খনৰ অৱসৰপ্ৰাপ্ত প্ৰধান শিক্ষক বসন্ত বৰ্মনে। ৰাষ্ট্ৰীয় বিজ্ঞান দিৱসৰ লগত সংগতি ৰাখি ৰাতিপুৱা ১১ বজাত আয়োজিত আলোচনা চক্ৰ আৰু বঁটা বিতৰণী সভা এখন অনুষ্ঠিত কৰা হয়। সভাখনত মুখ্য অতিথি হিচাপে যোগদান কৰে শিক্ষা বিষয়া ৰাজেন্দ্ৰ কলিতাই। ভাষণ প্ৰসংগত কলিতাই ৰাষ্ট্ৰীয় বিজ্ঞান দিৱসৰ তাৎপৰ্য সম্পৰ্কে বিৱৰি কয়।
সভাখনত বিশিষ্ট অতিথিৰূপে যোগদান কৰা বড়িগোগ-বনভাগ শিক্ষাখণ্ডৰ সমল ব্যক্তি সুভাষ বৰ্মনে কয় যে তথ্যৰ প্ৰতি সন্মানেই এটা জাতিৰ প্ৰাপ্তবয়স্কতাৰ লক্ষণ। যিকোনো ঘটনাৰ বিজ্ঞানসন্মত বিচাৰ-বিশ্লেষণৰ প্ৰতি শিক্ষকে ছাত্ৰ-ছাত্ৰীক আগ্ৰহী কৰি তুলিব লাগে। ভাষণ প্ৰসংগত তেওঁ বিজ্ঞানী চি ভি ৰমণৰ জীৱন আৰু কৃতিত্বৰ বিষয়েও সবিশেষ ব্যাখ্যা কৰে। ছাত্ৰ-ছাত্ৰীৰ মাজত আয়োজিত কুইজ প্ৰতিযোগিতাৰ বিজয়ীসকলক এইখন সভাতে পুৰস্কৃত কৰা হয়। পূব বনভাগ মধ্য ইংৰাজী বিদ্যালয়ৰ প্ৰধান শিক্ষক কালীচৰণ হালৈ, জ্যেষ্ঠ সহঃ শিক্ষক ৰহিম আলী, ছবিকান্ত শীল, নিৰদা বৈশ্য, আৰু কবিতা ভৰদ্বাজৰ তৎপৰতাত আয়োজিত সভাখনৰ আঁত ধৰে প্ৰধান শিক্ষকে। শিক্ষকসকলে বিজ্ঞান শিক্ষা জনপ্ৰিয় কৰাৰ বাবে নতুন শিক্ষানীতি অনুসৰি বিদ্যালয়ৰ স্তৰ অনুযায়ী বিজ্ঞানাগাৰ নিৰ্মাণৰো পোষকতা কৰে। উল্লেখ্য যে অসম বিজ্ঞান সমিতিৰ যুটীয়া সচিব (কাৰ্যালয়)ৰ দায়িত্ববাহী ড° ৰাজলক্ষ্মী দেৱীয়ে যোগান ধৰা জনপ্ৰিয় বিজ্ঞান আলোচনী ‘বিজ্ঞান জেউতি’ ছাত্ৰ-ছাত্ৰীৰ মাজত বিতৰণ কৰে খণ্ড সমল ব্যক্তি সুভাষ বৰ্মনে।