১১ জানুৱাৰী, ২০২৫ঃ মৰিগাঁও জিলাৰ ভূৰবন্ধা শিক্ষা খণ্ডৰ অন্তৰ্গত উত্তৰ বালিজান প্ৰাথমিক বিদ্যালয়ৰ সোণালী জয়ন্তী সমাৰোহ অনুষ্ঠানটো অহা ২৬ আৰু ২৭ জানুৱাৰীত দুদিনীয়া বৰ্ণাঢ্য কাৰ্যসূচীৰে অনুষ্ঠিত হ’ব।( Golden Jubilee Celebrations) কাৰ্যসূচী অনুসৰি, ২৬ জানুৱাৰীত বিদ্যালয়ৰ প্ৰৱেশদ্বাৰ মুকলি, গণৰাজ্য দিৱস উপলক্ষে ৰাষ্ট্ৰীয় পতাকা উত্তোলন, সোণালী জয়ন্তী বৰ্ষৰ ৫০ খন পতাকা উত্তোলন, সাংস্কৃতিক শোভাযাত্ৰা, প্ৰদৰ্শনী মঞ্চ উন্মোচন, আলোচনা চক্ৰ, সমবেত সংগীতৰ লগতে সাম্প্ৰতিক সময়ৰ সমাজ ব্যৱস্থাৰ ওপৰত এক আলোচনা অনুষ্ঠিত হ’ব। উক্ত অনুষ্ঠানটোত মুখ্য আলোচক হিচাপে উপস্থিত থাকিব প্ৰতিদিন টাইমৰ মুখ্য সম্পাদক নিতুমনি শইকীয়া।আবেলি স্হানীয় শিল্পীৰ দ্বাৰা সাংস্কৃতিক অনুষ্ঠান অনুষ্ঠিত হ’ব।
দ্বিতীয় দিনাৰ কাৰ্যসূচী অনুসৰি, ২৭ জানুৱাৰীত বৃক্ষৰোপণ, স্বচ্ছ ভাৰত অভিযান ৰূপায়ণ, চিত্ৰাংকন প্ৰতিযোগিতা, কবিতা আবৃত্তি, কুইজ প্ৰতিযোগিতা, গীত- মাত, জিকিৰ প্ৰতিযোগিতা, প্ৰাক্তন ছাত্ৰ-ছাত্ৰীৰ স্মৃতি ৰোমন্থন আৰু বিদ্যালয় খনৰ প্ৰতিষ্ঠাপক শিক্ষক আক্কাছ আলীৰ পৌৰহিত্যত মুকলি সভা অনুষ্ঠিত হোৱাৰ লগতে স্মৃতিগ্ৰন্থ ” স্বৰ্ণ জ্যোতি” উন্মোচন কৰা হ’ব। মুকলি সভাত মৰিগাঁও জিলা প্ৰাথমিক শিক্ষা বিষয়া অপূৰ্ব ঠাকুৰীয়া , জিলা আয়ুক্ত দেৱাশীষ শৰ্মা,অসম চৰকাৰৰ মন্ত্ৰী পিযুষ হাজৰিকা, সাংসদ প্ৰদ্যুৎ বৰদলৈ , বিধায়ক আচিফ মহাম্মদ নাজাৰ উপস্থিত থাকিব। আবেলি ৪-৩০ বজাত আমন্ত্ৰিত শিল্পীৰ দ্বাৰা সংগীতানুষ্ঠান অনুষ্ঠিত হ’ব। অহা ২৬ আৰু ২৭ জানুৱাৰীৰ কাৰ্যসূচীত সকলো ৰাইজৰ সহায় সহযোগিতাৰ লগতে উপস্হিতিৰ কামনা কৰিছে সোণালী জয়ন্তী সমাৰোহ উদযাপন সমিতিৰ সভাপতি আক্কাছ আলী আৰু সম্পাদক নৃপেন দাসে।