মধ্য গুৱাহাটী উন্নয়ন সমিতিৰ প্ৰশসংনীয় পদক্ষেপ : অসমত আবদ্ধ হৈ থকা বিহাৰৰ ৬ ব্যক্তিক ৰে’লযোগে প্ৰেৰণৰ ব্যৱস্থা

গুৱাহাটী

বিহাৰৰ পৰা প্ৰায় ২০ ব্যক্তিয়ে কামাখ্যা মন্দিৰ দৰ্শন কৰিবলৈ আহি লকডাউন বাবে অসমত আবদ্ধ হৈ থাকিবলগীয়া হৈছিল৷ ১৮ মাৰ্চত গুৱাহাটী উপস্থিত হৈ কামাখ্যা মন্দিৰ দৰ্শন কৰি ২৬ মাৰ্চ তাৰিখে ৰে’ল যোগে বিহাৰলৈ উভতি যোৱাৰ কথা আছিল৷ ক’ৰোনা ভাইৰাছৰ বাবে যোৱা ২৪ মাৰ্চাৰ পৰা প্ৰথম পৰ্যায়ৰ লকডাউন আৰম্ভ হয়৷ পিছত একেৰাহে চতুৰ্থ পৰ্যায়লৈ লকডাউন আৰম্ভ হৈ আজি পৰ্যান্ত প্ৰযোজ্য হৈ আছে৷ ইয়াৰ বাবে ব্যক্তি কেইগৰাকীয়ে খাদ্য সামগ্ৰীৰ বাবে যথেষ্ট অসুবিধাৰ সন্মুখীন হৈছে৷ সেই বাবে মধ্য গুৱাহাটী উন্নয়ন সমিতিয়ে বিগত দিনকেইটাত যথেষ্ট খাদ্য সামগ্ৰী যোগান ধৰি মানৱতাৰ পৰিচয় দিয়ে৷ ইয়াৰ উপৰি বুধবাৰে ছগৰাকী ব্যক্তিক ৰে’ল যোগে বিহাৰৰ বাৰণী ষ্টেচনলৈ যোৱাৰ বাবে ৰে’লৰ টিকট সংগ্ৰহ কৰি দীপা মালাৰ হাতত অৰ্পন কৰে৷ মহানগৰীৰ পল্টনবজাৰত এক অনুষ্ঠানত বিশিষ্ট সমাজকৰ্মী তথা পদ্মশ্ৰী অজয় দত্তই ৰে’লৰ টিকট সমুহ দীপা মালা দেৱীৰ হাতত অৰ্পন কৰে৷ অনুষ্ঠান মধ্য গুৱাহাটী উন্নয়ন সমিতিৰ সভাপতি তথা প্ৰাক্তন মেয়ৰ মৃগেন শৰণীয়া, সাধাৰণ সম্পাদক ৰাজীব দাস, কাৰ্যকৰী সভাপতি দেৱশিষ সেন গুপ্তা উপস্থিত থাকে৷ সভাপতি মৃগেন শৰণীয়াই এই সন্দৰ্ভত কয় যে  বিহাৰৰ ২০ গৰাকী ব্যক্তি আবদ্ধ হৈ থকা আটাইকেইগৰাকীক ৰে’ল যোগে যোৱাৰ ব্যৱস্থা কৰা হ’ব৷ এতিয়া ছগৰাকী ব্যক্তিৰ টিকট প্ৰদান কৰা হ’ল৷ এই সপ্তাহৰ শেষৰ পিনে বাকী কেইগৰাকীৰ টিকটৰ ব্যৱস্থা কৰা হ’ব৷ তেওঁ লগতে কয় ৰাজ্যৰ বাহিৰত আবদ্ধ হৈ থকা অসমৰ ব্যক্তিসকলক এনেদৰে কিছু ব্যক্তিয়ে সহযোগিতা কৰি ৰে”লৰ টিকট সংগ্ৰহ কৰি দিবলৈ তেওঁ আহ্বান জনায়৷