নগাঁও, ৩১ ডিচেম্বৰ,২০২৪ঃ happy new year । সম্ভাৱনা, আশা আৰু নতুনত্বৰ বাটেৰে আহিল ইংৰাজী বৰ্ষ ২০২৫। আশা-নিৰাশা,প্ৰাপ্তি-অপাপ্তি মাজেৰে পৰিসমাপ্তি ঘটিল ইংৰাজী বৰ্ষ ২০২৪। মধ্য অসমৰ অন্যতম জিলা হিচাপে পৰিচিত নগাঁও জিলাত ২০২৪ বৰ্ষটোত শিক্ষা, সাহিত্য, সংস্কৃতি, ক্ৰীড়া আদিত কিছু ক্ষেত্ৰত সফলতা আহিল যদিও বিৰল সফলতা লাভ কৰা পৰিলক্ষিত নহ’ল। আনকি, কোনো এগৰাকী নগঞাই ৰাজ্যিক তথা ৰাষ্ট্ৰীয় বঁটা -সন্মান আদি কঢ়িয়াই আনিবলৈ সক্ষম নহ’ল। অৱশ্যে নিজস্ব প্ৰতিভাৰে জিলা বাসীক গৌৰাম্বিত কৰিলে একমাত্ৰ ভাস্বত শইকীয়াই। ভাৰতীয় প্ৰশাসনিক সেৱাৰ পৰীক্ষাত (আই এ এছ)ত উজ্বলিল নগাঁৱৰ এই গৰাকী মেধাৱী ছাত্ৰ ভাস্বত শইকীয়া। তেওঁ ভাৰতীয় প্ৰশাসনিক সেৱাৰ পৰীক্ষাত ৫৫২ সংখ্যক স্থান লাভ কৰি নগাঁও জিলালৈ গৌৰৱ কঢ়িয়াই আনিলে। ২০২৪ বৰ্ষটোত, সংস্কৃতিৰ ক্ষেত্ৰখনৰ জৰিয়তে বহু সন্মানীয় বঁটা-পুৰষ্কাৰে নগাঁও জিলা বাসীক গৰ্বিত কৰে নগঞা বিশিষ্টা অভিনেত্ৰী-পৰিচালক আইমী বৰুৱাই। নগাঁৱৰ জীয়ৰী সু অভিনেত্ৰী-পৰিচালিকা আইমী বৰুৱাই “বিৰুবালা-‘উইটচ’টু পদ্মশ্ৰী”ৰ বাবে ৰাষ্ট্ৰীয় চলচ্চিত্ৰ প্ৰতিযোগিতাত বিচাৰকৰ বিশেষ বঁটা লাভ কৰাৰ লগতে তেওঁ কাঁ চলচ্চিত্ৰ মহোৎসৱত উপস্থিত থাকি গৰ্বিত কৰে নগঞা ৰাইজক।
তদুপৰি, ক্ৰীড়া ক্ষেত্ৰত সুনাম কঢ়িয়াই আনিলে নগঞা দুই কীতিমানে। বহি:ৰাজ্য হাৰিয়ানাত অনুষ্ঠিত ৩৮ তম ৰাষ্ট্ৰীয় চাৱ জুনিয়ৰ টাইকুণ্ড চেম্পিয়ন শ্বিপত অসমৰ হৈ প্ৰতিনিধিত্ব কৰি সোণৰ পদক লাভ কৰিলে নগঞা ছাত্ৰী ৰাইছা ৰহমানে। আনহাতে, ৰাষ্ট্ৰীয় পৰ্যায়ৰ জীট কণ্ডু চেম্পিয়ন হিচাপে সোণৰ পদক অর্জন কৰিবলৈ সক্ষম হৈছে আন এগৰাকী নগঞা কন্যা ছাদিয়া তাবাচ্ছুম। ইপিনে, অসম প্ৰশাসনিক সেৱাৰ পৰীক্ষাতো এইবাৰ সুখ্যাতিৰে উত্তীৰ্ণ হয় কৃতীমান। ২০২৪ বৰ্ষটোত একাধিক আন্তঃৰাষ্ট্ৰীয় চিত্ৰ প্ৰদৰ্শনী-কৰ্মশালাত অংশগ্ৰহণ কৰি জিলাবাসীক গৰ্বিত কৰে খ্যাতনামা চিত্ৰশিল্পী ক্ৰমে সুজিত দাসে আৰু ৰাজীৱ দাসে। ২০২৪ বৰ্ষটোত নগাঁৱৰ সুসন্তান প্ৰসিদ্ধ চিত্ৰশিল্পী প্ৰণৱ বৰুৱাৰ স্মৃতিত নিৰ্মান কৰা প্ৰণৱ বৰুৱা কলাক্ষেত্ৰৰ উদ্বোধন কৰে মুখ্যমন্ত্ৰী ড° হিমন্ত বিশ্ব শৰ্মাই। সি নিঃসন্দেহে জিলা খনৰ বাবে ভাল খবৰ আছিল। আনহাতে, ২০২৪ বৰ্ষটোত নগাঁও জিলা বাসীয়ে হেৰুৱাব লগীয়া হয় বিশিষ্ট সংগীতজ্ঞ, গণশিল্পী সূৰ্য দাস, সংগীতজ্ঞ দিগেন মহন্ত, ৰহা সমষ্টিৰ প্ৰাক্তন বিধায়ক জগদীশ দাস, ধিং সমষ্টিৰ প্ৰাক্তন বিধায়ক মোস্তাফা শ্বহিদুল ইছলাম, বিশিষ্ট শিক্ষাবিদ -সাহিত্যিক ক্ৰমে ড° সাগৰ বৰুৱা আৰু শ্বেখ আব্দুল মালিক, সদৌ অসম গ্ৰাম্য পুথিভঁৰাল সন্থাৰ প্ৰধান সম্পাদক বল্লদেৱ শৰ্মা, নগাঁও মহাবিদ্যালয়ৰ অৱসৰপ্ৰাপ্ত অধ্যাপক ক্ৰমে আব্দুল মন্নান ফাৰুকী আৰু শ্বিৰাজুল ইছলাম, নগাঁও ছোৱালী কলেজৰ অৱসৰপ্ৰাপ্ত অধ্যাপক নিজাম উদ্দিন, বিশিষ্ট চিকিৎসক ডাঃ বিজয় কুমাৰ চাওচাৰীয়া, জ্যেষ্ঠ সাংবাদিক অখিল চন্দ্ৰ দাস আদিক।