স্বাস্থ্য মন্ত্ৰী হিমন্ত বিশ্ব শৰ্মাৰ দ্বাৰা শিৱসাগৰত ক’ভিড-১৯ ৰোগৰ সংক্ৰমণ ৰোধৰ ক্ষেত্ৰত গ্ৰহণ কৰা ব্যৱস্থাৱলীৰ পয্যালোচনা ।
শিৱসাগৰ
ৰাজ্য চৰকাৰৰ স্বাস্থ্য আৰু পৰিয়াল কল্যাণ, বিত্ত, শিক্ষা আদি বিভাগৰ মন্ত্ৰী ডঃ হিমন্ত বিশ্ব শৰ্মাই যোৱা নিশা শিৱসাগৰ জিলাত উপস্থিত হৈ জিলাখনত প্ৰশাসনৰ লগতে বিভিন্ন বিভাগে ক’ভিড-১৯ ৰোগৰ সংক্ৰমণ ৰোধৰ ক্ষেত্ৰত গ্ৰহণ কৰা ব্যৱস্থাৱলীৰ বিষয়ে বিস্তৃতভাৱে পয্যালোচনা কৰে। উপায়ুক্ত কাৰ্য্যালয়ৰ চুকাফা সভাকক্ষত অনুষ্ঠিত এক পয্যালোচনা সভাত সভাপতিত্ব কৰি স্বাস্থ্য মন্ত্ৰী গৰাকীয়ে স্বাস্থ্য, আৰক্ষী, গড়কাপ্তানী, জনস্বাস্থ্য কাৰিকৰী আৰু শিক্ষা বিভাগৰ মূৰব্বী বিষয়া সকলৰ পৰা ক’ভিড-১৯ ৰোগ প্ৰতিহত কৰাৰ বাবে গ্ৰহণ কৰা ব্যৱস্থাৱলী সন্দৰ্ভত বুজ লয়। এই পৰ্যালোচনা সভাত ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী যোগেন মহন, স্বাস্থ্য বিভাগৰ ৰাজ্যিক মন্ত্ৰী পীযুষ হাজৰিকা, যোৰহাট লোকসভা সমষ্টিৰ সাংসদ তপন কুমাৰ গগৈ, তেজপুৰ লোকসভা সমষ্টিৰ সাংসদ পল্লব লোচন দাস, ৰাজ্যসভাৰ সাংসদ কামাখ্যা প্ৰসাদ তাছা, থাওৰা সমষ্টিৰ বিধায়ক কুশল দুৱৰী, নাজিৰা সমষ্টিৰ বিধায়ক দেৱব্রত শইকীয়া, সোনাৰী সমষ্টিৰ বিধায়ক নৱনিতা সন্দিকৈ, শিৱসাগৰ জিলাৰ উপায়ুক্ত লক্ষীননন্দন গগৈকে আদি কৰি জিলা প্ৰশাসন আৰু আৰক্ষী বিভাগৰ জ্যেষ্ঠ বিষয়াসকল উপস্থিত থাকে। সভাৰ অন্তত মন্ত্ৰী ডঃ শৰ্মাই এখন সংবাদমেল সম্বোধন কৰে। জিলাখনৰ স্বাস্থ্য মন্ত্ৰী গৰাকীয়ে তেওঁৰ ভ্ৰমণ কালত আজি পুৱা জয়সাগৰস্থিত শিৱসাগৰ অসামৰিক চিকিৎসালয় পৰিদৰ্শন কৰি চিকিৎসালয় খনৰ সামগ্ৰিক ব্যৱস্থাপনা আৰু আন্তঃগাঁথনি সন্দৰ্ভত বিতংভাৱে বুজ লয়।