দৈনন্দিন বাৰ্তা ডেস্ক : কেৰালাত যোৱা তিনি দিন ধাৰাসাৰ বৰষুণ হৈ থকাত জনসাধাৰণ সমস্যাত পৰিছে৷ যোৱা দেওবাৰে কেৰালাৰ ছখন জিলাক সতৰ্ক কৰি ভাৰতীয় বতৰ বিভাগে কয় যে সোমবাৰে ২০ চেণ্টিমিটাৰৰ অধিক বৰষুণ হ’ব৷ এই বৰষুণৰ পৰিমাণ মঙলবাৰে কমাৰ সম্ভাৱনা আছে৷ ইপিনে এই বৰষুণৰ লগতে ভূমিস্খলন হোৱাত ইডোক্কি জিলাত মানুহৰ মৃত্যু হৈছে৷ এই ভূমিস্খলনত ৪৮ জন লোকৰ মৃত্যু হৈছে৷ আনহাতে ১২ জন লোকক উদ্ধাৰ কৰা হৈছে৷ ইপিনে প্ৰধানমন্ত্ৰী নৰেন্দ্ৰ মোডীয়ে বান সমস্যাক লৈ কেন্দ্ৰ আৰু ৰাজ্যৰ মাজত সম্পৰ্ক উন্নত কৰাত গুৰুত্ব আৰোপ কৰিছে৷ ইতিমধ্যে প্ৰধানমন্ত্ৰীয়ে ছখন ৰাজ্য অসম, বিহাৰ, উত্তৰ প্ৰদেশ, মহাৰাষ্ট্ৰ, কৰ্ণাটক আৰু কেৰালাৰ মুখ্যমন্ত্ৰীসকলৰ সৈতে ভিডিঅ’ কনফাৰেন্স যোগে সোমবাৰে এখন সভাত মিলিত হৈ বান পৰিস্থিতিৰ ওপৰত পৰ্যালোচনা কৰে৷ আনহাতে ক’ৰোনা ভাইৰাছ সংক্ৰমণৰ ওপৰত গুৰুত্ব দি পৃথকে বানাক্ৰান্তৰ বাবে শিবিৰ মুকলি কৰিছে৷ ইতিমধ্যে ইৰনাকুলাম জিলাত ১২০৩ গৰাকী বানাক্ৰান্তক সাহায্য শিবিৰলৈ স্থানান্তৰিত কৰা হৈছে৷
