ধনশিৰি
যিটো সময়ত লক্ষ্য লক্ষ্য অসমীয়া যুৱকে কৰ্ম সংস্হাপন বিচাৰি বহিঃৰাজ্যলৈ ঢাপলি মেলিছে, সেই সময়তে বহুতো কৰ্মোদ্যমী অসমীয়া যুৱকে ঘৰতে থাকি বিভিন্ন ধৰণৰ ব্যৱসায় কৰি নিজৰ পৰিয়াল পোহপাল দিয়াৰ উপৰি আন দহটা পৰিয়ালক সংস্হাপন দি নিজকে অসমীয়াৰূপে পৰিচয় দিবলৈ সক্ষম হোৱা দেখা পোৱা গৈছে৷ ধনশিৰি মহকুমাৰ সৰুপথাৰতো বহু শিক্ষিত যুৱকৰ লগতে ৰেংমা গাঁৱৰ উচ্চ শিক্ষিত কৰ্মোদ্যমী কৃষক দ্বীপেন চুতীয়াই কৃষি কৰ্মৰ লগত সংগতি ৰাখি ব্ৰইলাৰ, গাহৰী পালন, জৈৱিক সাৰ, পান-তামোলৰ খেতি কৰাৰ উপৰি লকডাউনৰ ফলত বহিঃজিলাৰ পৰা এইবাৰ ধনশিৰি মহকুমালৈ মাছৰ পোনা আমদানী কৰিব নোৱৱাৰ ফলত বৰ্তমান ধনশিৰি মহকুমাত মৎস্য পালকসকলৰ সন্মুখত দেখা দিয়া পোনাৰ অভাৱ পুৰণ কৰিবলৈ আগবাঢ়ি আহিছে৷ দ্বীপেন চুতীয়াই ঘৰৰ বাৰীতে পাঁচটা কৈ পুখুৰী খান্দি মাছৰ পোনা ব্যৱসায় কৰিবলৈ আৰম্ভ কৰি নিজৰ লগতে আন দহটি পৰিয়ালক সংস্হাপন দিবলৈ চেষ্টা কৰিছে৷ দ্বীপেনে স্হানীয় এটা মাছ পোনা উৎপাদন কোন্দ্ৰৰ পৰা প্ৰায় চল্লিছ লাখ মাছৰ কণি আনি পুখুৰীত ডাঙৰ কৰি মহকুমাটোৰ বিভিন্ন গাঁৱলৈ বিক্ৰী কৰিৰ বাবে প্ৰেৰণ কৰিছে। উল্লেখ্যযোগ্য যে দ্বীপেন চুতীয়াই ১৯৯০ চনতে দুটা বিষয়ত লেটাৰসহ মেট্ৰিক পৰীক্ষাত উৰ্ত্তীণ হৈছিল। অৰ্থনৈতিক বিষয় স্নাতক দ্বীপেন চুতীয়াই চাকৰিৰ পিছত দৌৰি সময় নষ্ট নকৰি কৃষি কৰ্মৰ যোগেদি স্বাৱলম্বী হৈ পৰিয়াল পোহপাল দিবলৈ সক্ষম গৈছে৷ দ্বীপেন চুতীয়াই তেওঁৰ জ্যেষ্ঠ ভাতৃ জীৱন চুতীয়াৰ সহযোগত এই কৰ্মৰ বাবে নিজকে মনোনীত কৰিছে৷ ৰেংমাই গাঁৱৰ কৰ্মোদ্যমী উচ্চ শিক্ষিত যুৱক দ্বীপেন চুতীয়াৰ এনে পদক্ষেপত স্থানীয় ৰাইজে ভূয়সী প্ৰশংসা কৰিছে৷