হোজাই জিলা আইনসেৱা প্ৰাধিকৰণৰ উদ্যোগত হোজাইত বিশ্ব শিশু শ্ৰমিক নিৰ্যাতন বিৰোধী দিৱস উদযাপন ।

দৈনন্দিন বাৰ্তা প্ৰতিবেদন

 আজি হোজাই জিলা আইনসেৱা প্ৰাধিকৰণৰ উদ্যোগত হোজাইত পালন কৰা হয় বিশ্ব শিশু শ্ৰমিক বিৰোধী দিৱস৷ লগতে শিশু আৰু কিশোৰ শ্ৰমিক নিষিদ্ধকৰণ ও অধিনিয়ম আইন সন্দৰ্ভত হোজাই জিলা আইনসেৱা প্ৰাধিকৰণৰ উদ্যোগত  হোজাই তথা লংকা চহৰৰ ব্যৱসায় প্ৰতিষ্ঠান, মানুহৰ  ঘৰে ঘৰে গৈ সজাগতা কৰা হয়৷  আইনসেৱা প্ৰাধিকৰণৰ সম্পাদিকা প্ৰনিতা মৰাঙ, পেনেল অধিবক্তা ৰোহিনা ৱাৰিছ, অমৰজ্যোতি শইকীয়া, চাইল্ড লাইনৰ মনজিত দাস, মিন্টু শৰ্মা, টিলাৰাম ওৰাং, জিলা শিশু সুৰক্ষা বিভাগৰ ৰুহি দাস আৰু লংকা থানাৰ আৰক্ষী বিষয়া  দিবজ্যোতি শৰ্মাই শিশু শ্ৰমিক নিয়োগ নকৰিবলৈ সকলোকে সজাগ কৰাৰ প্ৰয়াস কৰাৰ লগতে শিশু শ্ৰমিক নিয়োগ কৰাসকলৰ বিৰুদ্ধে কঠোৰ ব্যৱস্থা গ্ৰহণ কৰাৰ পোষকতা কৰে৷ হোজাই জিলা আইনসেৱা প্ৰাধিকৰণে জিলাখনৰ বিভিন্ন প্ৰান্তত সজাগতা মূলক পত্ৰ বিতৰণ কৰি সকলোকে শিশু শ্ৰমিক নিয়োগ কৰাৰ বিৰুদ্ধে সজাগ কৰাৰ প্ৰয়াস কৰে৷ ইফালে শিশু শ্ৰমিক বিৰোধী দিবস উদযাপন কৰাৰ সময়তে হোজাই জিলা আইনসেৱা প্ৰাধিকৰণৰ তৎপৰতাত চাইল্ড লাইন, জিলা শিশু সুৰক্ষা বিভাগ তথা লংকা আৰক্ষীৰ সহযোগত লংকাৰ বিভিন্ন প্ৰান্তৰ পৰা উদ্ধাৰ কৰা হয় ৫ গৰাকীকৈ শিশু শ্ৰমিক৷ এই শিশু শ্ৰমিকসকলক বিভিন্ন দোকান, হোটেল আদিত নিয়োগ কৰি শ্ৰম কৰিবলৈ বাধ্য কৰাইছিল একাংশ পূজিপতি ব্যৱসায়ীয়ে৷ উদ্ধাৰ কৰা শিশু শ্ৰমিক কেইজনৰ স্বাস্থ্য পৰীক্ষাৰ অন্তত শিশু সুৰক্ষা সমিতিৰ ওচৰত হাজিৰ কৰি নগাঁওৰ শিশু সুৰক্ষা গৃহলৈ প্ৰেৰণ কৰা হয়।