বৰডুবি, ২৬ নৱেম্বৰ : কালি নিশা দুলীয়াজানত এক ভয়াৱহ পথ দূৰ্ঘটনা সংঘটিত হয় । নিশা প্ৰায় ১ বজাত দুখন বাহনৰ মাজত মুখামুখি সংঘৰ্ষত হোৱা পথ দুৰ্ঘটনাত ৭ জনকৈ লোক আহতপ্ৰাপ্ত হয় । প্ৰাপ্ত খবৰ অনুসৰি এ এচ ০৪ জে ৫৪৪৮ ইয়ন বাহনখনে নাহৰকটীয়াৰ এখন বিয়া ঘৰৰ পৰা দুলীয়াজানৰ পোৱালী পথাৰত কইনা থবলৈ আহোতে দুলীয়াগাঁওৰ পথৰ সমীপত হঠাৎ টেঙাখাটৰ পৰা দুলীয়াজানমুখী এ এচ ২৩ ডব্লিউ ৭৫৬৫ নম্বৰযুক্ত এস্ক ইউ ভি ৩০০ আন এখন বাহনৰ সৈতে মুখামুখি সংঘৰ্ষ হয় । পথ দূৰ্ঘটনাত গুৰুতৰভাৱে আহত হয় এস্ক ইউ ভি বাহনখনত অহা দুলীয়া গাঁওৰ সত্যজিত গগৈ (৪০), ইন্দ্ৰপুৰীৰ সুৰজিৎ দেব(৩৩) । ইফালে ইয়ন বাহনখনৰ চালক ডিব্ৰুগড় দক্ষিণ আমোলাপট্ৰীৰ ৰাজু গগৈ(২৫), একে অঞ্চলৰ অভিনৱ বৰুৱা(৩০), ৰিমা সোনাৰ (১৪), মানসপ্ৰতিম বৰুৱা(১৪) আৰু নাহৰকটীয়া চাচনিৰ ৰূপম চমুৱা(১৬) গুৰুত্বৰ ভাৱে আহত হয় । স্থানীয়লোকে আহতলোক সকলক ঘটনাস্থলীৰ পৰা উদ্ধাৰ কৰি ততাতৈয়াকৈ অইল ইণ্ডিয়া লিমিটেডৰ হাস্পতাললৈ অনা হয় । পিছত আঘাত অধিক গুৰুত্বৰ হোৱা বাবে চিকিৎসকে সত্যজিত গগৈ, ৰাজু গগৈ, অভিনৱ বৰুৱা, ৰিমা সোনাৰ, মানসপ্ৰতিম বৰুৱা আৰু ৰূপম চমুৱাক উন্নত চিকিৎসাৰ বাবে অসম চিকিৎসা মহাবিদ্যালয়ৰ হাস্পতাললৈ প্ৰেৰণ কৰে । শেহতীয়া খবৰ অনুসৰি উপৰোক্ত লোককেইজন ডিব্ৰুগড়ৰ চিকিৎসা মহাবিদ্যালয়ৰ হাস্পতালত চিকিৎসাধীন হৈ আছে আৰু সংকটমুক্ত বুলি জানিব পৰা গৈছে ।
