দেবর্ষি গৌতম
দেশৰ সাধাৰণ নিৰ্বাচন অথবা কোনো ৰাজ্যৰ বিধানসভা নিৰ্বাচনত প্ৰতিটো ৰাজনৈতিক দলে ভোটাৰক আকর্ষণ কৰিবলৈ সমস্ত শক্তি প্ৰয়োগ কৰি নিৰ্বাচনী প্ৰচাৰ চলায়। যিহেতু সাধাৰণ ৰাইজৰ ভোট লাভ কৰিলেহে যিকোনো দলৰ এগৰাকী প্ৰাৰ্থী নিৰ্বাচনত বিজয়ী হব পাৰিব গতিকে ৰাইজক যিকোনো প্ৰকাৰে দলৰ প্ৰতি অথবা প্ৰাৰ্থী গৰাকীৰ প্ৰতি আকৰ্ষিত কৰিবলৈ চেষ্টা চলোৱাটো একেবাৰে সাধাৰণ কথা। ৰাজনৈতিক দল সমূহে ভোটাৰক আকৰ্ষণ কৰিবলৈ ভোটগ্ৰহণৰ পূৰ্বে বিভিন্ন সভা সমিতি অনুষ্ঠিত কৰাৰ উপৰিও আৰু অন্য কিছু পদ্ধতিৰে ৰাইজৰ ওচৰ চাপিবলৈ চেষ্টা চলাই। নির্বাচনকেন্দ্ৰীক সভা সমিতি সমূহত নিৰ্বাচনত প্ৰতিদ্বন্দিতা আগবঢ়োৱা প্ৰাৰ্থী গৰাকীৰ উপৰিও দলীয় নেতা সকলেও ৰাইজক আকৰ্ষণ কৰিবলৈ দীঘলীয়া ভাষণ আগবঢ়াই। বহু ৰাজনৈতিক নেতাই নিজৰ ভাষণত ৰাইজক আকৰ্ষণ কৰিবলৈ বিভিন্ন ধৰণৰ কথা কয়। কিন্তু প্ৰতিটো কথা আৰু কামৰে এটা নিৰ্দিষ্ট সীমা আৰু মৰ্যাদা থাকে। সীমা আৰু মৰ্যাদা অতিক্ৰম কৰি কোনেও কাম নাইবা কথা কব নালাগে। সাম্প্ৰতিক সময়ত যদি আমি লক্ষ্য কৰোঁ তেনেহলে দেখিবলৈ পাম যে বিভিন্ন ৰাজনৈতিক সভা সমূহত নিৰ্দিষ্ট কিছুমান ৰাজনৈতিক নেতাই আক্ৰোশমূলক কিছুমান মন্তব্য আগবঢ়োৱাৰ উপৰিও কিছু অশালীন মন্তব্য আগবঢ়াই আহিছে। এক সুস্থ ৰাজনৈতিক পৰিবেশ আৰু সুস্থ গণতান্ত্ৰিক পৰিবেশত শাসক অথবা বিৰোধী যিকোনো পক্ষৰ নেতাই আগবঢ়োৱা এনে অশালীন মন্তব্য কোনো কাৰণতে গ্রহণযোগ্য হব নোৱাৰে। বিশেষকৈ মহিলা ৰাজনৈতিক নেত্ৰী সকলৰ ক্ষেত্ৰত যি ধৰণৰ অশালীন মন্তব্য কৰা পৰিলক্ষিত হয় সেয়া সচাকৈ গৰিহণাৰ যোগ্য।
মহিলাৰ সুৰক্ষা, মহিলাৰ বাবে আসন সংৰক্ষণ আদি কথা সততে কৈ থকা হয়। এই কামসমূহ কৰিবলৈ যি আইন-কানুন প্ৰস্তুত কৰিব লাগে সেই সমূহো কিন্তু এই ৰাজনৈতিক নেতাসকলে কৰে। তাৰ পিছতো যেতিয়া সেই একেখিনি ৰাজনৈতিক নেতাৰ ভিতৰত নিৰ্দিষ্ট কেইগৰাকীমান ৰাজনৈতিক নেতাই মহিলা ৰাজনৈতিক নেত্ৰীৰ বিৰুদ্ধে অশালীন মন্তব্য আগবঢ়াই তেতিয়া কিন্তু সাধাৰণ ৰাইজৰ মনত প্ৰশ্নৰ উদয় হয় যে আচলতে সেই নেতাসকলে মহিলাৰ বাবে কৈ থকা কাম সমূহ সচাকৈ কৰাটো বিচাৰে নে ? নে কেৱল ভোট লাভৰ স্বাৰ্থ আগত ৰাখি সেই শ্লোগানসমূহ তেনে ৰাজনৈতিক নেতা সকলে প্ৰদান কৰে। মহিলা ৰাজনৈতিক নেত্ৰীৰ বিৰুদ্ধে অশালীন মন্তব্য আগবঢ়োৱা নেতা সকলৰ বিৰুদ্ধে নিৰ্বাচন আয়োগ অধিক কঠোৰ হোৱাটো প্ৰয়োজনীয় যাতে কোনো নেতাই মহিলা ৰাজনৈতিক নেত্ৰীৰ বিৰুদ্ধে কোনো অশালীন মন্তব্য আগবঢ়াব নোৱাৰে, সেয়া লাগিলে শাসকীয় দলৰে হওক অথবা বিৰোধী দলৰে হওক। যিহেতু ৰাজনৈতিক নেতা সকলে ৰাইজক প্ৰতিনিধিত্ব কৰে গতিকে ৰাজনৈতিক সভাত কোনো ৰাজনৈতিক নেতাই আন দলৰ ৰাজনৈতিক নেতাক ব্যক্তিগত আক্ৰমণ কৰাটো একেবাৰে অশোভনীয়। যিহেতু ৰাজনীতি ৰাইজৰ সেৱা কৰা এক মাধ্যম গতিকে কোনেও সেয়া ব্যক্তিগত যুজঁ বুলি গণ্য কৰিব নালাগে। নিৰ্বাচনত ভোট লাভ কৰাৰ স্বাৰ্থ আগত ৰাখি যদি ৰাজনৈতিক নেতা সকলে প্রতিদ্বন্দী মহিলা ৰাজনৈতিক নেত্ৰী সকলক সন্মান জনাবলৈ নিজৰ শালীনতা খিনি বজাই নাৰাখে তেনেহলে তেনে ৰাজনৈতিক নেতাৰ পৰা ৰাইজে কি আশা কৰিব ? প্ৰতিদ্বন্দী ৰাজনৈতিক মহিলা নেত্ৰী এগৰাকীৰ বিৰুদ্ধে যদি এগৰাকী ৰাজনৈতিক নেতাই অশালীন মন্তব্য কৰিবলৈ কুণ্ঠাবোধ নকৰে তেনেহলে তেনে ৰাজনৈতিক নেতা এগৰাকীয়ে সাধাৰণ মহিলা সকলৰ প্ৰতি কি মনোভাব ৰাখিব সেয়া সহজে অনুমান কৰিব পাৰি। নিৰ্দিষ্ট কিছুমান ৰাজনৈতিক নেতাৰ অশালীন মন্তব্যৰ বাবে সমগ্ৰ ৰাজনৈতিক নেতা সকলক মানুহে বেয়া বুলি ভাবিবলৈ আৰম্ভ কৰে।
দেশত এক সুস্থ গণতন্ত্ৰ প্ৰতিষ্ঠা কৰিবলৈ এক সুস্থ ৰাজনৈতিক ব্যৱস্থাৰ প্ৰয়োজন। এনে ক্ষেত্ৰত কেৱল দেশৰ নিৰ্বাচন আয়োগৰে দায়িত্ব নাই। এই ক্ষেত্ৰত নিৰ্বাচন আয়োগৰ লগতে ৰাজনৈতিক দলসমূহৰো কৰণীয় যথেষ্ট আছে। দেশ, ভোটাৰ তথা নিজ দলৰ কথা নাভবি কেৱল নিজৰ ব্যক্তিগত ৰাজনৈতিক ভৱিষ্যতৰ কথা ভাবি অশালীন মন্তব্য আগবঢ়োৱা ৰাজনৈতিক নেতা সকলক নাকী লগাবলৈ প্ৰতিটো ৰাজনৈতিক দলে কিছু সুকীয়া অনুশাসনমূলক ব্যৱস্থা ৰাখিব লাগে। অন্যথা এনে ধৰণৰ ৰাজনৈতিক নেতা সকলে কোনো দিনে ভুল-শুদ্ধৰ পৰ্য্যালোচনা কৰিবলৈ চেষ্টা নকৰিব। অশালীন মন্তব্য কৰি দলীয় অনুশাসন ভঙা ৰাজনৈতিক নেতা সকলে যাতে দল বাগৰি আন দলত যাব নোৱাৰে তাৰ বাবেও প্ৰতিটো ৰাজনৈতিক দলে কিছু শক্তিশালী নিয়ম নিৰ্ধাৰণ কৰিব লাগে। কোনো কাৰণতে যাতে ৰাজনীতিত কোনোধৰণৰ অৰুচিপূৰ্ণ মন্তব্যৰে কাৰোবাক আক্ৰমণ নহয়, ইতিকিং সূচক মনোভাৰেৰে কোনেও একো মন্তব্য প্ৰদান নকৰে তাৰ বাবে প্ৰতিগৰাকী ৰাজনৈতিক নেতাই সংযত হোৱাটো অতিকৈ দৰকাৰী। ৰাজনীতিৰ যি গুণগত মানদণ্ড সেয়া জীয়াই ৰখাটো কিন্তু প্ৰতিগৰাকী ৰাজনৈতিক নেতাৰেই দায়িত্ব আৰু কৰ্তব্য। আমাৰ সমাজত উঠি অহা যুৱ প্ৰজন্মক যদি ৰাজনীতিৰ প্ৰতি আকৰ্ষিত কৰিব লাগে তেনেহলে গুণগত ৰাজনীতি আৰু মূল্যবোধৰ ৰাজনীতিক প্ৰতিষ্ঠা কৰাটো অতিকৈ প্ৰয়োজনীয়। যদি ৰাজনৈতিক নেতাসকলে নতুন প্ৰজন্মৰ ৰাজনৈতিক নেতাসকলক গুণগত আৰু মূল্যবোধৰ ৰাজনীতিৰ প্ৰতি আকৰ্ষিত কৰাৰ পৰিবৰ্তে ৰাজনৈতিক মানদণ্ড অৱক্ষ হবলৈ ধৰা এক ধাৰাৰ সৈতে আগবঢ়াই লৈ যাবলৈ চেষ্টা কৰে তেনেহলে ৰাজনীতিত কেতিয়াও গুণগত মানদণ্ড আৰু মূল্যবোধ জীয়াই নাথাকিব।