নাগৰিকত্ব সংশোধনী আইন আৰু ইআইএ বাতিলৰ দাবীত মানৱ শৃংখল কাৰ্য্যসূচী : আছু আৰু যুৱ ছাত্ৰৰ প্ৰতিবাদত কপিল টংলাৰ আকাশ বতাহ

টংলা : সোমবাৰে টংলা আঞ্চলিক আছু আৰু যুৱ ছাত্র পৰিষদে টংলা চহৰৰ মাজমজিয়াৰ মঙ্গলদৈ ভুটিয়াচাং পথৰ কাষত জাতিধ্বংসী নাগৰিকত্ব সংশোধানী আইন ২০১৯ বাতিলৰ লগতে কেন্দ্ৰীয় পৰিবেশ মন্ত্ৰালয়ে ই আই এ ২০২০ গৃহীত কৰিব বিচৰা হঠকাৰী সিদ্ধান্ত প্ৰত্যাহাৰৰ দাবীত মানৱ শৃঙ্খল কাৰ্য্যসূচী ৰূপায়ন কৰে। টংলা আঞ্চলিক ছাত্র সন্থাৰ সভাপতি প্ৰাঞ্জল ডেকা আৰু সম্পাদক ৰিংকু ডেকাৰ লগতে ওদালগুৰি জিলা অসম জাতীয়তাবাদী যুৱ ছাত্ৰ পৰিসদৰ উপ সভাপতি নিলয় চলিহাই উপস্থিত থকা উক্ত প্ৰতিবাদী কাৰ্যসূচীত ই আই এ বাতিল কৰক, আমি কা বিৰোধী কৰো, অবৈধ বাংলাদেশী হুঁচিয়াৰ, অসমত অসমীয়া গিৰী চলিবই, অসম খন দ্বিতীয় ত্ৰিপুৰা হব নিদিওঁ, কেন্দ্ৰীয় চৰকাৰ হুঁচিয়াৰ, হিমন্ত বিশ্ব শৰ্মা হুঁচিয়াৰ, সৰ্বানন্দ সোণোৱাল হুঁচিয়াৰ, নাৰী শক্তি জিন্দাবাদ, হয় কা বাতিল কৰক নহ’লে আমাক গ্ৰেপ্তাৰ কৰক, ধৰ্মৰ নামত ৰাজনীতি নচলিব আদি শ্লোগানেৰে প্ৰতিবাদীসকলে ৰাজপথত উত্তাল কৰি তোলে। কাৰ্য্যসূচীৰ মাজতে টংলা আঞ্চলিক ছাত্র সন্থাৰ সভাপতি প্ৰাঞ্জল ডেকাই সংবাদ মাধ্যমৰ আগত কয় যে আজিৰ পৰা যদি আমি ৫ মাহ আগুৱাই যাও লকডাউন দিয়াৰ আগত অসমৰ জনগনৰ মাজত ক্ষোভৰ জুই জ্বলি আছে কিন্তু মহামাৰীৰ ভয়াবহতাৰ বাবেহে সেয়া স্হবিৰ হৈ পৰিছিল, কিন্তু সেই সময়তে কেন্দ্রীয় চৰকাৰ আৰু অসমত সৰ্বানন্দ সোণোৱালৰ নেতৃত্বত বিজেপি চৰকাৰখনে এটাৰ পিছত এটা হঠকাৰী অসম বিৰোধী সিদ্ধান্ত আমাৰ ওপৰত জাপি দি আছে। প্ৰথমতে (কা) আনিলে আৰু (কা)ৰ বিৰোধী যিখন আন্দোলন সেই আন্দোলনখনক কোনো গুৰুত্ব নিদিলে। বৰঞ্চ অসম মাতৃৰ বুকুৰ ৫ গৰাকীৰ মাতৃৰ বুকু সুধা কৰি ৫ গৰাকীকৈ অসম সন্তানক হত্যা কৰিলে। চিআৰপিএফৰ বুট জোটাৰ গুৰ সোধালে বহু ছাত্র-ছাত্রীৰ বুকুত সেয়া আমি পাহৰা নাই। লকডাউনৰ সুযোগ লৈ অসমীয়া লোকৰ যি কৃষিভূমি সেয়া বহিৰাগত উদ্যোগপতিৰ হাতত প্ৰদান কৰিব বিচাৰিছিল সেয়া প্ৰতিহত কৰিলোঁ অসমৰ জনগণে। তাৰ পিছতে পুনৰবাৰ অসমৰ জনগনক জাপি দিব বিচাৰিছে (ই আই এ ২০২০) যি পৰিবেশ প্ৰভাৱ নিৰূপন অধিসূচনা সেইখন তেওঁলোকে জাপি দিব বিচাৰিছে। অসমৰ জনগণে যদি এতিয়াই প্ৰতিবাদ সেইখনো পুনৰবাৰ (কা)ৰ দৰেই আইনলৈ পৰিবৰ্তন কৰিব তেতিয়া অসমৰ জনগণৰ প্ৰাকৃতিক সম্পদৰ ওপৰত থকা যি অধিকাৰ সেই অধিকাৰ হেৰাই পেলাব। যদি অতি শীঘ্রেই এই (ই আই এ) বাতিল নকৰে পুনৰবাৰ কা আন্দোলনৰ দৰেই পৰিস্থিতি হব। বিজেপি নেতৃত্বাধীন কেন্দ্রীয় চৰকাৰ আৰু অসম চৰকাৰক আমি সকীয়াই দিব বিচাৰিছো যে অসমৰ প্ৰাকৃতিক সম্পদৰ ওপৰত চকু নিদিব। অন্যথা ২০২১ৰ বিধানসভা নিৰ্বাচনত ইয়াৰ ফল ভুগিব লাগিব।