দেশৰ প্ৰধানমন্ত্ৰী নৰেন্দ্ৰ মোদীৰ আহবান মৰ্মে বীৰ শ্বহীদ সকলৰ স্মৃতিসৌধ নিৰ্মাণত জাতি ধৰ্ম বৰ্ণ নিৰ্ব্বিশেষে প্ৰতিগৰাকী লোকৰ অংশগ্ৰহণৰ উদ্দেশ্যে প্ৰতিটো পৰিয়ালৰ পৰা চলিছে পৱিত্ৰ ভূমি সংগ্ৰহ অভিযান৷ এই উপলক্ষে নদুৱাৰ সমষ্টিৰ বিধায়ক পদ্ম হাজৰিকাৰ উদ্যোগত সমষ্টিটোৰ প্ৰতিটো গাঁও পঞ্চায়তৰ লগতে উত্তৰ ছিলাবন্ধা গাঁও পঞ্চায়তৰ এলেকাধীন লোক সকলৰ পৰিয়াল সমুহৰ গৃহৰ পৰাও চলিছে পৱিত্ৰ ভূমি সংগ্ৰহ অভিযান ৷
শুক্ৰবাৰে পুৱা চতিয়া সমষ্টিৰ জীয়া ভৰলী কন্যকা বহুমুখী কৃষি পামত এই ভূমি গ্ৰহণ কাৰ্যসুচীৰ শুভাৰম্ভ কৰে বিধায়ক পদ্ম হাজৰিকাই ৷ কাৰ্য্যসুচীৰ শুভাৰম্ভ কৰি বিধায়ক গৰাকীয়ে কয় – দেশৰ স্বাধীনতাৰ বাবে আত্ম বলিদান দিয়া বীৰ শ্বহীদ সকলৰ স্মৃতি সৌধ নিৰ্মানত অংশগ্ৰহণৰ বাবে এই পবিত্ৰ ভূমি সংগ্ৰহ কৰা হৈছে ৷ গাঁও পঞ্চায়তৰ পৰা জিলা আৰু ৰাজ্যিক পৰ্যায়লৈকে এই পৱিত্ৰ ভূমি সংগ্ৰহ অভিযান চলিব ৷ ভূমি গ্ৰহণৰ শুভাৰম্ভনী অনুষ্ঠানত জীৱিকা সখী সকলৰ লগতে পঞ্চায়তৰ সকলো শ্ৰেণীৰ কৰ্মকৰ্তাই অংশগ্ৰহণ কৰে।