শোণিতপুৰত বৰো ধানৰ খেতিত ধানৰ পৰিৱৰ্তে ওলাইছে পতান
কৃষি বিভাগৰ ফালৰ পৰা আৰম্ভ হৈছে চৰজমিন তদন্ত
শোণিতপুৰ জিলাত শেহতীয়াকৈ কৃষকৰ বৰো ধানৰ খেতিত ধানৰ পৰিৱৰ্তে পতান ওলোৱা ঘটনাৰ প্ৰকৃত কাৰণ উলিওৱাৰ লগতে এই সমস্যাটো শীঘ্ৰে সমাধানৰ বাবে শোণিতপুৰ জিলা কৃষি বিভাগে যোৱা ১৪ মে’ তাৰিখৰ পৰা আৰম্ভ কৰিছে চৰজমিন তদন্ত। জিলাখনৰ তেজপুৰ ভোজখোৱা চাপৰিৰ কেইগৰাকীমান কৃষকে নিজেই ক্ৰয় কৰি অনা বৰো ধানৰ বীজৰ পৰা উৎপাদিত ধাননি পথাৰত ধানৰ পৰিৱৰ্তে পতান ওলোৱা সমস্যাৰ সমাধানৰ বাবে শোণিতপুৰ জিলা কৃষি বিষয়া প্ৰাঞ্জল শৰ্মাৰ নেতৃত্বত এটা বিভাগীয় প্ৰতিনিধি দলে ডিপোটা কৃষি চক্ৰৰ অন্তৰ্গত
প্ৰগতিশীল কৃষক জামালুদ্দিনৰ ধাননি পথাৰত উপস্থিত হৈ চৰজমিন তদন্ত আৰম্ভ কৰাৰ লগতে সকলো যাৱতীয় পদক্ষেপ গ্ৰহণ কৰাৰ কথা সদৰি কৰে। ইতিমধ্যেই পতান ওলোৱা এই বিষয়টো উপযুক্ত পৰীক্ষাৰ বাবে কৃষি বিজ্ঞান কেন্দ্ৰৰ সহায় বিচাৰিছে জিলা কৃষি বিভাগে।
বিষয়টো সন্দৰ্ভত অঞ্চলটোৰ কৃষকসকলৰ সৈতে মতবিনিময় কৰি উচিত ব্যৱস্থা গ্ৰহণৰ প্ৰতিশ্ৰুতি প্ৰদান কৰিছে শোণিতপুৰ জিলা কৃষি বিভাগে। ইয়াৰ উপৰিও কৃষকসকলে বীজ ক্ৰয় কৰি অনা নিৰ্দিষ্ট বীজ ভাণ্ডাৰ তথা সাৰৰ দোকাননত গৈ তন্ন তন্নকৈ পৰীক্ষা কৰিলে বিভাগীয় প্ৰতিনিধিৰ দলটোৱে। কৃষিক্ষেত্ৰ পৰিদৰ্শনৰ সময়চোৱাত প্ৰতিনিধি দলটোক সংগ দিয়ে মহকুমা কৃষি বিষয়া জাকিৰ হুছেইন, সহকাৰী কৃষি পৰিদৰ্শক বেদান্ত বিকাশ দাস, জিলা মিডিয়া বিশেষজ্ঞ বিতোপন শইকীয়াৰ লগতে সংশ্লিষ্ট বিষয়াববীয়া সকলে।