২০২৪ চনৰ সাধাৰণ নিৰ্বাচনত ৰাইজৰ দলে অসমৰ কোনো এটা সমষ্টিতেই প্ৰতিদ্বন্দ্বিতা আগবঢ়োৱাৰ পৰা বিৰত থাকিব। শিৱসাগৰৰ বিধায়ক অখিল গগৈৰ সামাজিক মাধ্যমত এটা পোষ্ট, পোষ্টটোত তেওঁ কৈছে –
“২৬ অক্টোবৰ, ২০২৩ তাৰিখে গুৱাহাটীৰ হোটেল লিলিত অনুষ্ঠিত হোৱা ১২ টা বিৰোধী ৰাজনৈতিক দলৰ বৈঠকত ৰাইজৰ দলে আগন্তুক ২০২৪ চনৰ লোকসভা নিৰ্বাচনত প্ৰতিদ্বন্দ্বিতাৰ দৌৰৰ পৰা আঁতৰি অহাৰ সিদ্ধান্ত আনুষ্ঠানিকভাৱে অৱগত কৰি বিৰোধী ঐক্যমণ্চৰ প্ৰাৰ্থীৰ বিজয় নিশ্চিত কৰিবলৈ সৰ্বতোপ্ৰকাৰে জঁপিয়াই পৰাৰ বাবে প্ৰস্তাৱ দিয়ে। আমি জানো দলৰ কৰ্ণধাৰ সমিতিৰ এই ঐতিহাসিক সিদ্ধান্তত দলক আৱেগিকভাৱে ভাল পোৱা কৰ্মীসকলে মুঠেও ভাল নাপাব। সকলো দলৰ কৰ্মীয়ে নিজৰ দলৰ প্ৰাৰ্থিত্ব বিচাৰে। কিন্তু বিজেপিক পৰাভূত কৰাৰ ঐতিহাসিক প্ৰয়োজনত দলে এনে চৰম ত্যাগৰ সিদ্ধান্ত লৈছে।আশাকৰো দলৰ সন্মানীয় কৰ্মীসকলে বিষয়টো অনুধাৱন কৰিব পাৰিব।
আজিৰ সভাত ঐক্যৱদ্ধ বিৰোধী দলৰ নিৰ্বাচনী প্ৰস্তুতিত বিলম্ব হোৱা বাবে আমি উদ্বেগ প্ৰকাশ কৰি চাৰিটা পৰামৰ্শ আগবঢ়াও—-
১) অচিৰেই সচিবালয় স্থাপন কৰি এটা ঠাইৰ পৰা নিৰ্বাচনী প্ৰস্তুতি আৰম্ভ কৰা।
২) ন্যূনতম উমৈহতীয়া কাৰ্যসূচী তৈয়াৰ কৰা।
৩) যথাসম্ভৱ শীঘ্ৰে প্ৰাৰ্থীৰ তালিকা প্ৰস্তুত কৰা।
৪) পৃথক পৃথককৈ নহয়, সকলো দলে একেলগে প্ৰচাৰ অভিযান আৰম্ভ কৰা।
তলত দলৰ ঐতিহাসিক প্ৰস্তাৱটো উদ্ধৃত কৰা হ’ল:
ৰাইজৰ দলৰ কৰ্ণধাৰ সমিতিৰ প্ৰস্তাৱ:
আজি ইংৰাজী ২৫ অক্টোবৰ ২০২৩ তাৰিখে ৰাইজৰ দলৰ মুখ্য কাৰ্যালয়ত সভাপতি অখিল গগৈৰ সভাপতিত্বত অনুষ্ঠিত হোৱা দলৰ কৰ্ণধাৰ সমিতিৰ বৈঠকে অসমৰ ১২ দলীয় বিৰোধী ৰাজনৈতিক ঐক্যমঞ্চৰ বিষয়টো পুংখানুপুংখ আৰু গভীৰভাৱে আলোচনা কৰি নিম্নলিখিত প্ৰস্তাৱটি দলৰ কাৰ্যনিৰ্বাহক, সাধাৰণ পৰিষদ আৰু ১২ দলীয় বিৰোধী ৰাজনৈতিক ঐক্যমঞ্চলৈ প্ৰেৰণ কৰাৰ সিদ্ধান্ত গ্ৰহণ কৰে।
“২০২৪ চনৰ সাধাৰণ নিৰ্বাচনটো দেশৰ ৰাজনৈতিক ইতিহাসৰ আটাইতকৈ জটিল আৰু স্পৰ্শকাতৰ নিৰ্বাচন। এই নিৰ্বাচনে আমাৰ দেশৰ গণতন্ত্ৰ, দেশৰ সংবিধান, দেশৰ যুক্তৰাষ্ট্ৰীয় ব্যৱস্থা আৰু দেশৰ সম্পদ তথা বজাৰৰ অধিকাৰ দেশবাসীৰ হৈ থাকিবনে নাই এই মৌলিক বিষয় সমূহ নিৰ্ণয় কৰিব। ২০২৪ চনৰ এই সাধাৰণ নিৰ্বাচনত বিজেপি দল পুনৰবাৰ ক্ষমতাসীন হ’লে আমাৰ দেশখন একনায়কত্ববাদী আৰু ধৰ্মীয় মৌলবাদী ৰাষ্ট্ৰলৈ পৰ্যৱসিত হোৱাৰ প্ৰবল আশংকা থাকিব। এনেস্থলত সকলো গণতান্ত্ৰিক, ধৰ্মনিৰপেক্ষ আৰু দেশৰ বিচিত্ৰতাৰ মাজত ঐক্যত বিশ্বাসী ৰাজনৈতিক দলে আগন্তুক ২০২৪ চনৰ নিৰ্বাচনটোক সৰ্বোচ্চ ত্যাগ কৰি হ’লেও বিজেপি নেতৃত্বাধীন চৰকাৰখনক ক্ষমতাচ্যুত কৰাটো সময়ৰ আহ্বান বুলি গণ্য কৰিব লাগিব। সেয়েহে আজি ২৫ অক্টোবৰ ২০২৩ তাৰিখে ৰাইজৰ দলৰ কৰ্ণধাৰ সভাই সৰ্বসন্মতিক্ৰমে প্ৰস্তাৱ গ্ৰহণ কৰে যে আগন্তুক ২০২৪ চনৰ সাধাৰণ নিৰ্বাচনত ৰাইজৰ দলে অসমৰ কোনো এটা সমষ্টিতেই প্ৰতিদ্বন্দ্বিতা আগবঢ়োৱাৰ পৰা বিৰত থাকি অসমৰ ১৪খন লোকসভা আসনত প্ৰতিদ্বন্দিতা আগবঢ়াব লগীয়া বিৰোধী ঐক্যৰ প্ৰাৰ্থীৰ বিজয় সু-নিশ্চিত কৰিবলৈ সৰ্বতোপ্ৰকাৰে জঁপিয়াই পৰিব। ৰাইজৰ দলৰ এই সিদ্ধান্তই অসমৰ বিজেপি বিৰোধী ৰাজনৈতিক দলসমূহক দলীয় স্বাৰ্থৰ উৰ্দ্ধত গৈ ঐক্যৱদ্ধভাৱে দেশ, জাতি আৰু জনগণৰ হকে সৰ্বোচ্চ ত্যাগৰ বাবে উদ্বুদ্ধ কৰিব বুলি আশা প্ৰকাশ কৰে।”