বাঘজানৰ ঘটনাৰ সন্দৰ্ভত বাঘজান মিলনজ্যোতি যুৱ সংঘৰ সংবাদমেল : অইল ইণ্ডিয়া আৰু ৰাজ্য চৰকাৰক শেষ সকীয়নি : অন্যথা সমজুৱা আত্মজাহৰ দৰে ভয়ঙ্কৰ কাৰ্যসূচীৰ লোৱাৰ ভাবুকি ।

ডিৰাক সীমান্ত : যোৱা ২৭ মে’ৰ পূৱা বাঘজান বি জি আৰ ৫ নং গেছ কুপত বিস্ফোৰণ সংঘটিত হৈ অপৰিবৰ্তিত অৱস্থাত নিৰ্গমন হৈ আছিল তেল সংমিশ্ৰিত গেছ । চিংগাপুৰৰ পৰা অহা বিশেষজ্ঞ দলটোৱে ১৪ দিনৰ দিনা তেল সংমিশ্ৰিত গেছ নিৰ্গমণ নিয়ন্ত্ৰণ কৰিবলৈ চেষ্টা কৰাৰ সময়তে অগ্নিকাণ্ডৰ সূত্ৰপাত ঘটিছিল । অগ্নিকাণ্ডত জাহ গল বহুজনৰ ঘৰ-বাৰী । অগ্নিকাণ্ডৰ সূত্ৰপাত ঘটা আজি ১৪ দিন পাৰ হৈ যোৱাৰ পিছতো জুই নিৰ্বাপন কৰিবলৈ সক্ষম হোৱা নাই ।  বিস্ফোৰিত দিন ধৰি অঞ্চলটোৰ ৰাইজে ভয়ত  নিজৰ আপোন ঘৰ-বাৰী এৰি আশ্ৰয় শিবিৰত থাকিব লগা হৈছে । এতিয়াও অগ্নিকাণ্ডৰ ফলতে অঞ্চটো ভূকম্পমানে বিৰাজ কৰি ৰাখিছে । যাৰ ফলত ঘৰসমূহত মেলিছে বৃহৎ বৃহৎ ফাট ।  বাঘজান ৫ নং গেছ কূপৰ কাণ্ডই সমগ্ৰ বাঘজানৰ লগতে মাগুৰি মতাপুং বিল আৰু ডিব্ৰু ছৈখোৱা ৰাষ্ট্ৰীয় উদ্যানৰ জৈৱ বৈচিত্ৰৰ প্ৰতি কঢ়িয়াই অনা ভাবুকিৰ প্ৰতি লক্ষ্য ৰাখি  যোৱা ১৯ জুন তাৰিখে অসম প্ৰদূষণ নিয়ন্ত্ৰণ পৰিষদে WB/DIB/T-396/08-09/243-A/131 নং পত্ৰ যোগে বাঘজান তৈলক্ষেত্ৰৰ সকলো ড্ৰিলিং আৰু খনন কায্য বন্ধ কৰিবলৈ জাননী জাৰি কৰিছিল যদিও নাটকীয়ভাবে উক্ত পত্ৰখন উঠাই লোৱাত ক্ষোভ প্ৰকাশ কৰিছে বাঘজান মিলনজ্যোতি যুৱ সংঘই । বিপদাপন্ন হৈ পৰা জীৱকুল, মৎস্যকুল তথা জৈৱ-বৈচিত্ৰৰ ভাৰসাম্য প্ৰতি গুৰুত্ব প্ৰদান কৰি এই সকলোবোৰৰ নিৰাপত্তা সুনিশ্চিত কৰিবলৈ দাবী জনোৱাৰ লগতে ক্ষতিগ্ৰস্তসকলক উচিত তথা দীৰ্ঘম্যাদী ক্ষতিপূৰণ দিবলৈ যুৱ সংঘই দাবী জনাইছে । বৃহত্তৰ  বাঘজানত বৰ্তমান সময়ত এক অৰ্থনৈতিক বিপৰ্যয়ে দেখা দিছে ৷ বাঘজানৰ জৈৱ বৈচিত্ৰৰ প্ৰতি নামি আহিছে ঘোৰ আমানিশা ৷ প্ৰদূষিত হৈ পৰিছে বাঘজানৰ বায়ু, পানী, মাটি সকলো ৷ যাৰ বাবে তাৎক্ষণিকভাৱে সকলো ধৰণৰ দাবী পূৰণ কৰিবলৈ শেষ বাৰৰ কাৰণে ৰাজ্য চৰকাৰৰ লগতে অইল ইণ্ডিয়া লিমিটেডক আহ্বান জনাইছে সংঘৰ কৰ্মকৰ্তা সকলে ৷ অন্যথা সমজুৱা আত্মজাহৰ দৰে চৰম সিদ্ধান্ত লোৱাৰ ভাবুকি প্ৰদান কৰিছে ৷