দৈনন্দিন বাৰ্তা ডেস্ক : ক’ৰোনা ভাইৰাছৰ সংক্ৰমণ বৃদ্ধি পোৱাৰ প্ৰতি লক্ষ্য ৰাখি তামিলনাডুত লকডাউনৰ ম্যাদ বৃদ্ধি কৰা হৈছে৷ তামিলনাডু চৰকাৰে ক’ৰোনো ভাইৰাছ সংক্ৰমণ ৰোধ কৰিবৰ বাবে ৩১ আগষ্টলৈকে লকডাউনৰ সীমা বঢ়াই দিছে৷ অৱশ্যে কেতবোৰ শিথিলতা অৱলম্বন কৰিছে৷ ইপিনে আগষ্টৰ দেওবাৰবোৰত সম্পূৰ্ণ লকডাউন কৰা হৈছে৷ দেওবাৰবোৰত কেৱল জৰুৰীকালীন সেৱাহে অব্যাহত থাকিব৷ উল্লেখ্য যে বুধবাৰৰ দিনালৈকে তামিলনাডুত ক’ভিড-১৯ত মুঠ ২৩৪১১৪ জন লোক আক্ৰান্ত হৈছে৷ অৱশ্যে ১৭২৮৮৩ জন লোক আৰোগ্য হৈছে৷ ইয়াৰে ভিতৰত ৫৭৪৯০ জনৰ সক্ৰিয়৷ তদুপৰি ৰাজ্যখনত ক’ৰোনাত আক্ৰান্ত হৈ ৩৭৪১ জন লোকৰ মৃত্যু হৈছে৷ উল্লেখ্য যে শেষৰ সপ্তাহৰ কেইটামান দিনত তামিলনাডুত প্ৰতিদিনে ৭০০০ লোক সংক্ৰমিত হৈছিল৷ মে’ আৰু জুন মাহত ৰাজ্যখনৰ ৰাজধানী চেন্নাইত অৱস্থা গুৰুতৰ হৈছিল৷ ৰাজ্যখনত লকডাউনত শিথিল কৰা অনুসৰি কোম্পানীবোৰত ৭৫ শতাংশ কৰ্মচাৰীৰে কাম কৰিব পাৰিব৷ পুৱা ৬ বজাৰ পৰা সন্ধিয়া ৭ বজালৈকে ৫০ শতাংশ আসনত ব্যৱস্থা কৰি হোটেলবোৰ খুলিব পাৰিব৷ শাকপাচলি আৰু গেলামালৰ দোকান পুৱা ৬ বজাৰ পৰা সন্ধিয়া ৭ বজালৈকে খুলিব পাৰিব৷ ই-কমাৰ্চৰ সকলো সামগ্ৰী বিতৰণ কৰিব পাৰিব ৷
