আমেৰিকান ডলাৰৰ বিপৰীতে ভাৰতীয় মুদ্ৰা মঙলবাৰে টকাৰ মূল্য সৰ্বকালৰ বাবে সৰ্বনিম্ন স্তৰলৈ নামি আহে। ইয়াৰ বিপৰীতে আমেৰিকান ডলাৰ শক্তিশালী হৈ পৰিছে। মঙলবাৰে ভাৰতীয় মুদ্ৰাৰ মূল্য ৮৪.৭৫ টকালৈ হ্ৰাস পায়। যদিও দিনৰ শেষত সামান্য বৃদ্ধি পাই ৮৪.৬৮ টকা হয়। আনহাতে, ডলাৰৰ সূচকাংক ১০৬.৫০ লৈ বৃদ্ধি পাইছে। বিশ্লেষকসকলে কয় যে টকাৰ মূল্য আৰু অধিক হ্ৰাস পালেহেঁতেন, কিন্তু ভাৰতৰ কেন্দ্ৰীয় বেংক আৰ বি আইৰ হস্তক্ষেপে কিছু পৰিমাণে বাধা প্ৰদান কৰিছে। অৱশ্যে ধাৰাবাহিকভাৱে টকাৰ মূল্য হ্ৰাসক লৈ উদ্বিগ্ন হৈ পৰিছে ব্যৱসায়ীসকল। টকা সুস্থিৰ কৰাৰ বাবে কেইবামাহো ধৰি বজাৰত হস্তক্ষেপ কৰি আহিছে আৰ বি আইয়ে।
সোমবাৰেও ০.২৫ শতাংশ হ্ৰাস পাইছে টকা। সেইটো আছিল ছমাহৰ ভিতৰত আটাইতকৈ ডাঙৰ হ্ৰাস। স্থানীয় মুদ্ৰাৰ এই হ্ৰাসৰ মূল কাৰণ হ’ল ভাৰতৰ জিডিপি বৃদ্ধিৰ চিন্তা। এএনজেডৰ অৰ্থনীতিবিদ তথা বজাৰ বিশ্লেষক ধীৰাজ নিমে কয়, “ভাৰতৰ জিডিপি বৃদ্ধিৰ দুৰ্বলতাই বিনিয়োগকাৰীৰ আত্মবিশ্বাস স্তব্ধ কৰিব পাৰে। আনহাতে, শেহতীয়াকৈ আৰ বি আইৰ বৈদেশিক মুদ্ৰাৰ মজুত হ্ৰাস পোৱাৰ ফলতো টকাৰ হ্ৰাস ত্বৰান্বিত হৈছে।” ভাৰতৰ বৈদেশিক মুদ্ৰাৰ মজুত যোৱা ২৭ ছেপ্টেম্বৰৰ তুলনাত দুমাহত ৪৮ বিলিয়ন ডলাৰ হ্ৰাস পাইছে। এনে পৰিস্থিতিত ডলাৰৰ বিপৰীতে টকাৰ মূল্য হ্ৰাস বন্ধ কৰিবলৈ আৰ বি আইয়ে মুদ্ৰা বজাৰত তীব্ৰ হস্তক্ষেপ কৰিছে। ২৭ ছেপ্টেম্বৰত ভাৰতৰ বৈদেশিক মুদ্ৰাৰ মজুত সৰ্বকালৰ সৰ্বোচ্চ ৭০৫ বিলিয়ন ডলাৰলৈ বৃদ্ধি পায়। আৰ বি আইৰ শেহতীয়া হিচাপ অনুসৰি যোৱা ২২ নৱেম্বৰত দেশৰ বৈদেশিক মুদ্ৰাৰ মজুত ১.৩১ বিলিয়ন ডলাৰ হ্ৰাস পাই ৬৫৬.৫৮ বিলিয়ন ডলাৰ হৈছে। ইপিনে বিশেষজ্ঞসকলে কয় যে মজুত হ্ৰাস পোৱাৰ কাৰণ হ’ল ডলাৰৰ বহিঃপ্ৰবাহ বৃদ্ধি। জুলাই-ছেপ্টেম্বৰ ত্ৰৈমাসিকত ভাৰতৰ জিডিপি বৃদ্ধি ৫.৪ শতাংশলৈ হ্ৰাস পাইছে, যিটো প্ৰায় দুবছৰৰ ভিতৰত সৰ্বনিম্ন। যোৱা বছৰৰ একে সময়ছোৱাত দেশৰ বৃদ্ধিৰ হাৰ ৮.১ শতাংশ। মূলতঃ উৎপাদন খণ্ডৰ মন্দাৱস্থাৰ বাবেই বৃদ্ধি হ্ৰাস পাইছে। যিটো দেশৰ অৰ্থনীতিৰ বাবে চিন্তাৰ কাৰণ। কিন্তু এতিয়াও দ্ৰুতগতিত বৃদ্ধি পোৱা অৰ্থনীতিত আছে ভাৰত। কাৰণ চলিত বৰ্ষৰ জুলাই-ছেপ্টেম্বৰ ত্ৰৈমাসিকত চীনৰ বৃদ্ধি ৪.৬ শতাংশ। ইয়াৰ পূৰ্বে ২০২২-২৩ বিত্তীয় বৰ্ষৰ অক্টোবৰ-ডিচেম্বৰ ত্ৰৈমাসিকত ভাৰতৰ জিডিপি বৃদ্ধি ৪.৩ শতাংশলৈ লেহেমীয়া হৈছিল। দেশৰ মুঠ মূল্য সংযোজিত ৫.৬ শতাংশ, যিটো পূৰ্বৰ ত্ৰৈমাসিকত ৬.৮ শতাংশ।
জুলাই-ছেপ্টেম্বৰ ত্ৰৈমাসিকত কৃষি খণ্ডত ৩.৫ শতাংশ বৃদ্ধি পাইছে, যিটো পূৰ্বৰ ২ শতাংশ আছিল। কিন্তু উৎপাদন খণ্ডৰ বৃদ্ধিৰ গতি পূৰ্বৰ ত্ৰৈমাসিকত ৭ শতাংশৰ তুলনাত ২.২ শতাংশলৈ হ্ৰাস পাইছে।
INDIAN MONEY: অধিক হ্ৰাস পাইছে ভাৰতীয় টকাৰ মূল্য
