গুৱাহাটী বিশ্ববিদ্যালয়ত আন্তঃৰাষ্ট্ৰীয় ড্ৰাগছ সেৱন বিৰোধী দিৱস উদযাপন

জালুকবাৰী ,৩০ জুন: ভাৰত চৰকাৰৰ গুৱাহাটী মণ্ডল নাৰ্কটিকছ কণ্ট্ৰল ব্যুৰো(এনচিবি) আৰু গুৱাহাটী বিশ্ববিদ্যালয় এন এছ এছ কোষৰ উদ্যোগত গুৱাহাটী বিশ্ববিদ্যালয় চৌহদত ২৬ জুনত আন্তঃৰাষ্ট্ৰীয় ড্ৰাগছ সেৱন আৰু অবৈধ সৰবৰাহ বিৰোধী দিবস উদযাপন কৰা হয়। ৰাষ্ট্ৰসংঘই ঘোষণা কৰা অনুসৰি ড্ৰাগছ সেৱন আৰু অবৈধ সৰবৰাহ প্ৰতিৰোধ আৰু প্ৰতিহত কৰিবলৈ বিশ্বজুৰি এই দিৱস পালন কৰা হয়। অনুষ্ঠান উদ্বোধন কৰি বিশ্ববিদ্যালয়ৰ ছাত্ৰ কল্যাণ সঞ্চালক তথা এন এছ এছ কোষৰ কাৰ্যসূচী সমন্বয়ক, ড° ৰঞ্জন কুমাৰ কাকতিয়ে ড্ৰাগছ সেৱনৰ পৰা হোৱা বিপদ আৰু যুৱক-যুৱতী আৰু জাতিটোৰ ওপৰত ইয়াৰ ক্ষতিকাৰক প্ৰভাৱৰ বিষয়ে ব্যাখ্যা কৰে। ডাঃ কাকতিয়ে সকলো অংশগ্ৰহণকাৰীকে ৰাইজৰ মাজত সজাগতা সৃষ্টি কৰি সমাজৰ পৰা এই বিপদ সম্পূৰ্ণৰূপে নিৰ্মূল কৰিবলৈ আহ্বান জনায়।

ইয়াৰ পিছতে অংশগ্ৰহণকাৰীসকলে ড্ৰাগছৰ পৰা আঁতৰি থাকিবলৈ শপত বাক্য পাঠ কৰে। এনচিবি, গুৱাহাটীৰ চোৰাংচোৱা বিষয়া মিষ্টাৰ পি.এন. ঝা , এন চি বিৰ কনিষ্ঠ চোৰাংচোৱা বিষয়া ৰোহিত কুমৰ জাইমনে সামগ্ৰিকভাৱে সমাজত ড্ৰাগছ সেৱনৰ কুপ্ৰভাৱৰ বিষয়ে ব্যাখ্যা কৰে। বিষয়াসকলে আৰু কয় যে আমি বিশ্বব্যাপী ড্ৰাগছ সমস্যাৰ বিৰুদ্ধে যুঁজিবলৈ আমাৰ প্ৰচেষ্টাক বৃদ্ধি কৰি এনে এখন পৃথিৱী সৃষ্টি কৰোঁ য’ত ব্যক্তিসকলে সুস্থ আৰু পৰিপূৰ্ণ জীৱন যাপন কৰিবলৈ সক্ষম হয়। গুৱাহাটী বিশ্ববিদ্যালয়ৰ এন এছ এছৰ স্বেচ্ছাসেৱক, বিষয়া আৰু সদস্যসকলে. এই অনুষ্ঠানত অংশগ্ৰহণ কৰে।