টীয়ক চন্দ্ৰ কমল বেজবৰুৱা মহাবিদ্যালয়ৰ উচ্চতৰ মাধ্যমিকৰ দ্বিতীয় বৰ্ষত অধ্যয়নৰত দুই ছাত্ৰৰ কালি বৰ্হি ৰাজ্য নগালেণ্ডত সংঘটিত হোৱা এক পথ দুৰ্ঘটনাত মৃত্যু হোৱা ঘটনাই সমগ্ৰ টীয়কতে এক শোকাৱহ পৰিবেশৰ সৃষ্টি কৰিছে। জানিব পৰা মতে মহাবিদ্যালয়ৰ পৰা বাহিৰে বাহিৰেই বন্ধুৰ সৈতে ফটো তুলিবলৈ বন্ধুৰ স্কুটিৰে নগালেণ্ড পাইছিলগৈ। ফটো তুলি ঘূৰি আহোঁতে নগালেণ্ডৰ মোককচোং জিলাৰ মাকলোম্বা থানাৰ অন্তৰ্গত চাংকি বস্তিৰ সমীপত AS 04 AB 9974 নম্বৰৰ স্কুটি সহ দুই যুৱক প্ৰায় ২০০ ফুট তলত পাহাৰৰ খাৱৈত পৰি থিতাতে দুই ছাত্ৰৰ মৃত্যু হয়।
দুৰ্ঘটনাত মৃত্যু হোৱা ছাত্ৰদ্বয় হৈছে শিৱসাগৰ জিলাৰ জাঁজী গড়মূৰ ব্ৰাহ্মিণ গাঁৱৰ আকাশ গোৱালা আৰু টীয়কৰ তামূলীছিগাৰ চাপৰি গাঁৱৰ দ্বীপজ্যোতি গগৈ। পুত্ৰক হেৰুৱাই অস্থিৰ হৈ পৰিছে দ্বীপজ্যোতিৰ পিতৃ সুৰেন গগৈ আৰু মাতৃ মীৰা গগৈৰ লগতে আত্মীয় স্বজন।ইতিমধ্যে নগালেণ্ড আৰক্ষীয়ে মৃতদেহ উদ্ধাৰ কৰি টীয়ক আৰক্ষীকৰ সৈতে যোগাযোগ কৰিছে আৰু পৰিয়ালৰ লোক ইতিমধ্যে মৃতদেহ আনিবলৈ ৰাওনা হৈছে।আজি সমগ্ৰ পৰিবেশ শোকাকুল হৈ পৰিছে, এজন উদিয়মান ফটোগ্ৰাফাৰ হেৰুৱাই শোকত ভাঙি পৰিছে তেওঁৰ সহপাঠী, লগতে বন্ধুসকল।
