বঢ়মপুৰ , ২১ নৱেম্বৰ : বৰ্তমান সময়ৰ প্ৰতিযোগিতামূলক পাঠ্যক্ৰমৰ জৰিয়তে শিশুৰ শিক্ষণ প্ৰণালী অধিক জটিল আৰু যান্ত্ৰিক কৰি তোলা হৈছে, সেইসময়তে নগাঁও জিলাৰ বঢ়মপুৰৰ এখন অগ্ৰণী শিক্ষানুষ্ঠান জ্ঞানদীপ জাতীয় বিদ্যালয়ে (jatiya vidyalaya) পাঠ্যক্ৰমৰ বিষয়সমূহক সজীৱ আৰু সাৱলীল কৰিবলৈ সৰল আৰু সহজে বোধগম্য হোৱাকৈ এক সুন্দৰ পন্থা অৱলম্বন কৰি দাঙি ধৰিলে উৎকৃষ্ট নিদৰ্শন ।
বঢ়মপুৰ জ্ঞানদীপ জাতীয় বিদ্যালয়ৰ আদৰণীয় পদক্ষেপপ্ৰচলিত শিক্ষা ব্যৱস্থাৰ বিপৰীতে বিদ্যালয়খনিয়ে পাঠ্যপুথিৰ বিষয় বা অধ্যায়ক জীৱন্ত ৰূপত উপস্থাপন কৰাৰ উদ্দেশ্য আগত ৰাখি শিশুসকলে সহজে বুজি পাবলৈ বা মনত ৰাখিবলৈ যাতে কোনো অসুবিধাৰ সন্মুখীন নহয়,তাৰ বাবে বিদ্যালয়খনিয়ে অভিনৱ পন্থা আৰু পদ্ধতি অৱলম্বন কৰি সমাদৰ লাভ কৰিছে জনমানসত। বিদ্যালয়খনৰ ষষ্ঠ শ্ৰেণীত অধ্যয়নৰত এজাক শিশুৱে তেওঁলোকৰ অসমীয়া পাঠ্যপুথিত থকা অসমৰ সত্ৰ-অনুষ্ঠান শীৰ্ষক অধ্যায়টিত উল্লেখ থকা অসমীয়া সমাজ জীৱনত নৱবৈষ্ণৱ ধৰ্মৰ প্ৰচাৰ আৰু প্ৰসাৰৰ বাবে মহাপুৰুষ শ্ৰীমন্ত শঙ্কৰদেৱ আৰু মাধৱদেৱৰ দ্বাৰা উল্লেখযোগ্য অৱদান হিচাপে সৃষ্টি হোৱা সত্ৰসমূহৰ ভূমিকা, নামঘৰত ভকতসকলৰ নাম – কীৰ্তনৰ লগতে শাস্ত্ৰ ব্যাখ্যা , সত্ৰ – নামঘৰসমূহৰ আধ্যাত্মিক পৰিৱেশ , শংকৰদেৱে ধৰ্ম প্ৰচাৰৰ সুবিধাৰ কাৰণে সৃষ্টি কৰা শ্ৰী শ্ৰী কৃষ্ণৰ ৰাসলীলা আৰু ভাওনা আদি ছাত্ৰ – ছাত্ৰীসকলে নৃত্য, গীত আৰু অভিনয়ৰ যোগেদি প্ৰদৰ্শন কৰি আজি বিদ্যালয়খনত উপস্থিত থকা অভিভাৱক আৰু স্থানীয় ৰাইজক মন্ত্ৰমুগ্ধ কৰি তোলে ।
ছাত্ৰ – ছাত্ৰীসকলে অধ্যায়টিত উল্লেখ থকা বিভিন্ন চৰিত্ৰ যেনে- সত্ৰাধিকাৰ, ডেকা সত্ৰাধিকাৰ, মেধি, মুক্তিয়াৰ, খাটনিয়াৰ, পাচনি, আলধৰা, পালধৰীয়া, সুত্ৰধাৰ, গায়ন-বায়ন, নামঘৰীয়া আদি সাৱলীল আৰু নিখুঁত অভিনয়ৰে বিদ্যালয়খনত এক আধ্যাত্মিক পৰিৱেশ সৃষ্টি কৰাৰ লগতে উপস্থিত ৰাইজৰ দৃষ্টি নিৱদ্ধ কৰি ৰাখে । সত্ৰ বা নামঘৰ সমূহৰ প্ৰচলিত পৰম্পৰা সমূহক দাঙি ধৰি সেই পবিত্ৰ অনুষ্ঠান সমূহত কেনেকৈ পূৱা-গধূলি ঈশ্বৰৰ আৰাধনা কৰা হয়,গধূলি ডবাত হৰিধ্বনি তুলি কেনেকৈ শ্ৰীহৰিৰ গুণাণুকীৰ্তন কৰা হয়, নিতৌ শাস্ত্ৰ পাঠ আৰু ব্যাখ্যা কিদৰে কৰা হয় সেইসমূহ অভিনয়ৰ মাজেৰে সজীৱ ৰূপত তুলি ধৰাৰ প্ৰয়াস কৰে শিশুসকলে । ভাদমহীয়া নাম-প্ৰসঙ্গ, প্ৰসঙ্গীয়া নাম, ভাগৱত পাঠ আৰু ভাওনা আদিৰো জীৱন্ত ছবি দাঙি ধৰে সফলতাৰে । ছাত্ৰ -ছাত্ৰীসকলে বিভিন্ন চৰিত্ৰৰ বাবে প্ৰয়োজনীয় ৰূপসজ্জাৰ লগতে সাজ-পোছাক আদি পৰিধান কৰি পাঠ্যপুথিত থকা অধ্যায়টিক আৰু অধিক প্ৰাণৱন্ত কৰি তোলে । তাৰ লগে লগে সত্ৰাধিকাৰ সকলৰ নিৰ্দেশত কেনেকৈ ধৰ্মপ্ৰচাৰ কৰা হৈছিল, কিদৰে অসমীয়া গ্ৰাম্য জীৱনৰ সামাজিক সমস্যা সমূহ বা গোচৰ আৰু ওজৰ আপত্তিসমূহ নিষ্পত্তি কৰাৰ ক্ষেত্ৰত নামঘৰ সমূহে এক গুৰত্বপূৰ্ণ ভূমিকা পালন কৰিছিল, সেয়াও অভিনয়ৰ মাজেৰেই ফুটাই তোলে ছাত্ৰ-ছাত্ৰীসকলে ।
বিশেষকৈ অনুষ্ঠানটিৰ আঁত ধৰা ষষ্ঠ শ্ৰেণীৰ ছাত্ৰী ক্ৰমে অলংকৃতা কাশ্যপ আৰু মূৰ্ছনা বৰাৰ সুন্দৰ বাকশৈলীয়ে সকলোকে মোহিত কৰে ।এই ক্ষেত্ৰত বিদ্যালয়খনৰ শিক্ষক – শিক্ষয়ত্ৰীসকলেও তেওঁলোকক পূৰ্ণ সহযোগিতা আগবঢ়ায় । অনুষ্ঠানভাগ উপস্থাপন কৰাক লৈ ছাত্র-ছাত্ৰীসকলৰ মাজত দেখা যায় ব্যাপক উৎসাহ। অনুষ্ঠানটিত বিভিন্ন চৰিত্ৰত অভিনয় কৰা বিদ্যালয়ৰ ছাত্ৰ – ছাত্ৰীসকল ক্ৰমে – বিদিশা বৰা ( শ্ৰী কৃষ্ণ) , পাহি শইকীয়া ( ৰাধা), প্ৰিয়ংকা বৰা ( গোপী) , ৰিম্পী শইকীয়া ( গোপী) , দিচান বৰা ( সত্ৰাধিকাৰ আৰু শংখচূড় ) , নিয়ৰ নীলিম ( ডেকা সত্ৰাধিকাৰ আৰু শংখচূড়) , ভাৰ্গৱ লামা ( শংখচূড় আৰু গায়ন- বায়ন) ,ধ্ৰুৱজিত শৰ্মা ( মেধি আৰু গায়ন -বায়ন) , ধৰম টকবি ( নামঘৰীয়া আৰু পাঠক ) , ঋতিক এন শিৱম ( পাচনি ) , সৌৰভ জ্যোতি শইকীয়া ( খাটনিয়াৰ ) , দিবাকৰ ডেকা ( আলধৰা) , হৰজিত কাকতি ( সূত্ৰধাৰ) , ৰণবীৰ পাটৰ ( মুক্তিয়াৰ আৰু শংখচূড়) , হীৰক জ্যোতি দাস ( পালধৰীয়া) । অনুষ্ঠানটি আৰম্ভ হয় ছাত্ৰী বনশ্ৰী শইকীয়াৰ সুকণ্ঠত নিগৰা এটি বৰগীতেৰে । তাৰ লগতে অলংকৃতা কাশ্যপ আৰু সুদৰ্শনা বৰাই সত্ৰীয়া নৃত্য পৰিৱেশন কৰি অধিক আকৰ্ষণীয় কৰি তোলে। আজিৰ সমগ্র অনুষ্ঠানটিৰ সন্দৰ্ভত সামগ্ৰিক পৰিকল্পনা আৰু পৰিচালক হিচাপে দায়িত্বত থকা বিদ্যালয়খনৰ প্ৰধান শিক্ষক শিৱ বৰ্মনে কয় যে – ছাত্ৰ-ছাত্ৰীসকলৰ বাবে আগবঢ়োৱা পাঠ্যক্ৰমসমূহক এনেদৰে জীৱন্ত ৰূপত আগবঢ়ালে পাঠৰ বিষয়বস্তু সমূহ তেওঁলোকৰ বাবে অধিক মনোগ্ৰাহী হয় । সেয়েহে বৰ্তমানে প্ৰতিযোগিতামূলক শিক্ষা ব্যৱস্থাৰ মাজত তেওঁলোকক Parrot Learning নকৰাই, তাৰ পৰিৱৰ্তে নাটকীয় ৰূপদানৰ মাজেৰে বা পাঠসমূহক সম্ভৱ হ’লে আলেখ্য প্ৰস্তুত কৰাৰ পঠন-পাঠন শৈলী বাছি ল’লে অধিক ফলপ্ৰসূ হয় । সেয়েহে কেতিয়াবা খেলৰ মাজেৰে আৰু কেতিয়াবা নাট্য ৰূপত বা আলেখ্য ৰূপত তেওঁলোকৰ গুণগত শিক্ষণ পদ্ধতি বাছি ল’ব লাগে । পাঠগ্ৰহণ কৰোঁতে যেনেকৈ আনন্দ পাব পাৰি, তেনেকৈ পাঠদান কৰিও আনন্দ লাভ কৰিব পাৰে । তাৰ বাবে ছাত্ৰ-ছাত্ৰীসকলক শিকোৱাৰ প্ৰতি থাকিব লাগিব আন্তৰিকতা আৰু আগ্ৰহ । আজিৰ অনুষ্ঠানটিৰ বাবে অভিভাৱকসকলে বিদ্যালয়খনিৰ এনে প্ৰয়াসক ভূয়সী প্ৰশংসা কৰে আৰু বিদ্যালয়খনিৰ উত্তৰোত্তৰ কামনা কৰে